Агилов Павел Сергеевич
| Ҫын пирки | |
| Агилов Павел Сергеевич |
Агилов Павел Сергеевич (1930 ҫулхи нарӑсӑн 10-мӗшӗ, Йăранар, Элĕк районĕ,Чӑваш АССР[1]) — нумай ҫул хушши Вӑрнар район культура ҫурчӗн директор тивӗҫне пурнӑҫланӑ ҫын[1].
Кун-ҫулӗ
1947–1950 — Вӑрнар вӑрманпромхуҫалӑхӗнче вӑрман касса стахановец ята тивӗҫнӗ[1].
1950–1955 ҫулсенче хӗсметре пулнӑ, ҫар ҫыннин тивӗҫне тинӗс ҫар флотӗнче пурнӑҫланӑ, I статья старшини таран ӳснӗ[2].
Ҫартан таврӑннӑ хыҫҫӑн Канашри механизаци училищинче (1956), Ҫӗрпӳри культпросвет (1965) училищинче пӗлӳ илнӗ[2].
Партин облаҫри комитечӗн политпросвещени ҫурчӗ ҫумӗнчи марксизмпа ленинизм университетне вӗренсе пӗтернӗ[2].
Тивӗҫлӗ канӑва тухнӑ хыҫҫӑн Ҫарӑклӑ ял клубне пулӑшма тытӑннӑ, ӑна тӗслӗхлӗ ял клубӗ шайне хӑпартнӑ[1].
Ӗҫӗ-хӗлӗ
Вӑрнар районӗн культура сферинче 40 ҫул тӑрмашнӑ: малтан район культура ҫурчӗн директорӗ пулнӑ, кайран ӑна «Химик» культура ҫурчӗн директорне лартнӑ. Вӑл район культура ҫурчӗ ҫумӗнче халӑх театрне, ташӑпа юрӑ халӑх ансамбльне йӗркелеме вӗсен ӗҫне аталантарма нумай вӑй хунӑ[3][4].
Павел Сергеевич — I категориллӗ киномеханик[1].
Вӑл кашни культура мероприятине хутшӑнать — ветерансен хорӗнче юрлать, халӑх театрӗнче вылять, юрӑпа ташӑ ансамбльте те хӑйне хастар кӑтартать.
Вӑл Вӑрнар хула тӑрӑхӗн депутачӗ пулнӑ, Вӑрнар поселокне хӑтлӑлатас ыйтусене ҫӗкленӗ[5].
Павел Агилов сӑвӑ ҫырать, хӑйӗн сӑввисемпе тата ытти авторсен хайлавӗсене тӗпе хурса юрӑсем кӗвӗлет. Сӑввисенче — тӑван тавралӑх, ҫутҫанталӑк. Хӑшӗ-пӗрине ҫынсене те халалланӑ. Сӑввисем район хаҫачӗсенче пичетленнӗ[6][7].
Сӑввисем
- «Эс ӑҫта-ши чун савни?» («Ҫӗнтерӳ ҫулӗ», 1992, ҫурла, 5);
- «Сана курасчӗ ӗмӗр чӗрӗ» («Ҫӗнтерӳ ҫулӗ», 1992, чӳк, 5);
- «Вӑрнар вӑрмань — хитре вӑрман» («Ҫӗнтерӳ ҫулӗ», 2000, нарӑс, 15);
Хисепӗсем
Павел Сергеевича ҫак наградӑсемпе чысланӑ[2]:
- «Тӑван ҫӗршывӑн 1941–1945 ҫҫ. аслӑ вӑрҫи вӑхӑтӗнче хастар ӗҫленӗшӗн» медаль;
- «Тӑван ҫӗршывӑн 1941–1945 ҫҫ. аслӑ вӑрҫинче ҫӗнтернӗренпе 50 ҫул ҫитни» юбилей медалӗ;
- «Ӗҫ ветеранӗ» медаль;
- тата ыттисем.
1995 ҫулта ӑна Чӑваш Республикин мусӑк обществин тава тивӗҫлӗ ӗҫченӗ, 2000 ҫулта Чӑваш Республикин тава тивӗҫлӗ культура ӗҫченӗ хисеплӗ ятсемпе чысланӑ[2].
2016 ҫулта Агилов Павел Сергеевича Раҫҫей Федерацийӗн коммунистсен партийӗн «Партири хастарлӑхшӑн» орденӗпе чысланӑ[8].
Ӑнлантарусем
- ^ 1, 2, 3, 4, 5 Энциклопедия Вурнарского района / Рос. Федерация, Чуваш. Респ. ; [сост.: В. А. Иванов, М. А. Васильев]. — Чебоксары : ИПК "Чувашия", 2004. — 300, [1] с. — 31–32 с.
- ^ 1, 2, 3, 4, 5 Агилов Павел Сергеевич
- ^ https://gov.cap.ru/SiteMap.aspx?gov_id=886&id=2911494&title=Narodnij_teatr_quotCharshavquot&ysclid=ltgv3igvo1712217604
- ^ https://днт21.рф/teams/narodnyy-teatr-charshav/
- ^ https://gov.cap.ru/laws.aspx?gov_id=317&id=58975
- ^ «Ҫӗнтерӳ ҫулӗ», 1992, ҫурла, 5
- ^ «Ҫӗнтерӳ ҫулӗ», 2000, нарӑс, 15
- ^ https://kprf121.ru/wp-content/uploads/ChebPravda2016%E2%84%9646.pdf
Каҫӑсем
- Агилов Павел Сергеевич (выр.) «Энциклопедии» сайт.
Вуламалли
- Энциклопедия Вурнарского района / Рос. Федерация, Чуваш. Респ. ; [сост.: В. А. Иванов, М. А. Васильев]. — Чебоксары : ИПК "Чувашия", 2004. — 300, [1] с. — 31–32 с.
- «Чӳречерен пӑхрӑм — уйӑх куртӑм» / А.Иванов — «Храсчен сасси», 1999, утӑ, 13.
- «Ӗмӗтсене пурнӑҫа кӗртнӗ» / Т. Тимукова — «Ҫӗнтерӳ ҫулӗ», 2000, нарӑс, 15.