Ҫӗньял тӗп шкулӗ

1884 ҫулхи ҫӗртмен 25-мӗшӗнче Ҫӗньял ялӗнче земство училищине уҫнӑ. Вӑл 1880 ҫулта Шӑмӑш ялӗнче уҫалнӑ чиркӳ прихучӗн шкулӗ ҫинче никӗҫленнӗ пулнӑ^[2].

Ачасене чи малтанах Алексей Семёнович Лосанов вӗрентнӗ^[3]. Шкулта 4 уйрӑм пулнӑ, 2 ҫын вӗрентнӗ. Шкултан вӗренсе тухни пирки 8 арҫын ачапа 4 хӗрача свидетельство илнӗ. 1884–1907 ҫулсенче пӗтӗмӗшле шкултан 75 арҫын ача тата 45 хӗрача вӗренсе тухнӑ^[2].

1930 ҫулта шкул ҫичӗ ҫул вӗрентекен шкул пулса тӑнӑ. 1960 ҫулта вал сакӑр ҫул вӗрентекен шкул пулса тӑнӑ. 1964 ҫулта ватам шкул шайне хӑпарнӑ^[2].

1946–1955 ҫулсенче шкултан 535 ача вӗренсе тухнӑ, 1961–1970 ҫулсенче — 777 ача, 1966–1980 ҫулсенче — 620 ача^[4].

1954 ҫулччен шкул пилӗк уйрӑм ҫуртра вырнаҫнӑ пулнӑ. Вӗсенчен пери кӑна, икӗ хутлӑскер, уроксем ирттерме юрӑхлӑ пулнӑ. 1954 ҫулта шкул валли ятарлӑ ҫурт туса лартнӑ, унта 8 класс вӗренме пултарнӑ^[5].

1980-мӗш ҫулта шкул ҫӗр ҫулхи юбилейне палӑртма хатӗрленнӗ май 464 ача вӗренмелӗх ҫӗнӗ шкул ҫуртне туса лартнӑ^[5].

2019 ҫулхи юпан 9-мӗшӗнги Чӑваш Республикин Шупашкар район Администрацийӗн Постановленийӗпе килӗшӳллӗн Ҫӗньял вӑтам шкулӗ Пӗтӗмӗшле пӗлӳ паракан тӗп шкул пулса тӑнӑ^[5].

• Ласанов Алексей Иванович^[6];
• Воинова Екатерина Семеновна;
• Исаков Василий Николаевич (Татюк);
• Столяров Алексей Николаевич (1931—1937);
• Кириллов Леонид Кириллович (1937—1939);
• Федоров Николай Федорович (1939—1942);
• Ильина Нина Ильинична (1942—1944);
• Аверкиев Сергей Аверкиевич (1944—1945);
• Еремеева Вера Осиповна (1945—1947);
• Машанов Алексей Аркадьевич (1947—1950);
• Александров Арсений Александрович (1950—1953);
• Илларионов Петр Илларионович (1953—1962);
• Михайлов Геннадий Михайлович (1962—1964);
• Остеров Владимир Филиппович (1964—1966);
• Владимирова Аниса Леонидовна (1966—1997);
• Николаев Петр Николаевич (1997—2004);
• Захаров Александр Геннадьевич (2004—2014);
• Карсаков Вячеслав Анатольевич (2014—2019);
• Савин Сергей Михайлович — (2019 ҫулхи чӳкӗн 25-мӗшӗнчен—?)^[5].

Шкулӑн спорт залӗ, спорт лапамӗсемлӗ (2 футбол уйӗ) стадион, 200 вырӑнлӑ акт залӗ, 54 вырӑнлӑ столовӑй, 1 компьютер кабинечӗ, тата технологи кабинечӗ пур. Вӗренӳ процесне тивӗҫлӗ шайра йӗркелемешкӗн шкулӗн 14 компьютер пур (1 комьютерпа 10 ачана тивӗҫтернӗ). Пуҫламӑш классен кабинечӗсенче компьютер, МФУ тата мультимедиа проекторӗсем пур^[7].

Шкулта ҫавӑн пекех музей пӳлӗмӗ пур^[7].

Ачасене шкула шкул автобусӗ илсе ҫӳрет. Ҫапла май пурӗ 38 ачана шкула ҫитереҫҫӗ тата киле ӑсатаҫҫӗ^[7].

Шкулти хӑрушсӑрлӑха сыхлама 4 видеокамера пулӑшать^[7].

Ачасене вӗри апатпа тивӗҫтереҫҫӗ. Ку тӗлӗшпе «Атлашевски» агрофирма» ТМЯП-па килӗшӳ тунӑ^[8].