Елесин Михаил Васильевич
Елесин Михаил Васильевич (1918, Ельцовка[d] — 1952 ҫулхи ҫӗртмен 10-мӗшӗ, Барнаул[d]) — Тӑван Ҫӗршывӑн аслӑ вӑрҫинче Хӗрлӗ Ҫар кӗҫӗн сержанчӗ, Совет Союзӗн Паттӑрӗ (29.10.1943)[1] [2] [3].Совет Союзĕн Паттăрĕн чысне илнĕ вăхăтра Воронеж фрончӗн 38-мĕш çарĕн 180-мĕш стрелокĕсен дивизийӗн 42-мĕш стрелоксен полкĕн отделени командирĕ, кĕçĕн сержант.
Пурнӑҫӗпе ӗҫӗ-хӗлӗ
Михаил Елесин 1918 ҫулта Ельцовка ялӗнче ҫуралнӑ (халӗ — Алтай крайӗн Ельцовка районӗ). Пуҫламӑш пӗлӳ илнӗ, унтан Ельцовкӑра «Хӗрлӗ кустарь» артелӗнче ӗҫленӗ.
1941 ҫулта Елесина Хӗрлӗ Ҫара хӗсмете чӗннӗ. Кемӗрте кӗҫӗн командирсен шкулне вӗренсе пӗтернӗ. 1942 ҫулхи ҫӗртмен 1-мӗшӗнчен пуҫласа — Тӑван Ҫӗршывӑн аслӑ вӑрҫин фрончӗсенче. Сталинград, Воронеж, 1-мӗш тата 2-мӗш Украина фрончӗсенче ҫапӑҫнӑ. Сталинградпа Курск ҫапӑҫӑвӗсене, Украина ССРне ирӗке кӑларнине хутшӑннӑ.
1943 ҫулхи кӗркунне кӗҫӗн сержант Михаил Елесин 42-мӗш стрелок полкӗн (180-мӗш стрелок дивизийӗ, 38-мӗш ҫар, Воронеж фрончӗ) уйрӑмне ертсе пынӑ. 1943 ҫулхи авӑнӑн 6-мӗшӗнче Иваницкое ялӗ (Сумы облаҫӗ) ҫумӗнчи ҫапӑҫура Елесин тӑшман траншейине ҫитнӗ те ал ҫапӑҫӑвӗнче тӑшманӑн 10 яхӑн салтакне пӗтернӗ, кайран чакса пыракан тӑшман пайӗсене хӑваласа, нимӗҫ автоматчикӗсем ларнӑ ҫурта гранатӑсемпе пӑрахса ҫунтарнӑ. Елесинӑн уйрӑмӗ Смелое тата Великие Бубны ялӗсене (Ромны районӗ) ирӗке кӑларма пулӑшнӑ. 1943 ҫулхи авӑнӑн вӗҫӗнче вӗсем Днепра Киевран ҫурҫӗрелле тухнӑ.
1943 ҫулхи юпан 7-мӗшӗнче Елесинӑн уйрӑмӗ Лютеж ялӗ (Вышгород районӗ, Киев облаҫӗ) таврашӗнче Днепр урлӑ каҫнӑ. 1943 ҫулхи юпан 10-мӗшӗнче Новые Петровцы ялӗ таврашӗнче Елесин 141,4 ҫӳллӗшне ярса илме тата тӑшманӑн хирӗҫ атакӗсене чакарма хутшӑннӑ, нумай тӑшман салтакӗпе офицерне пӗтернӗ.
СССР Аслӑ Канашӗн Президиумӗн 1943 ҫулхи юпан 29-мӗшӗнчи Указӗпе «Днепр урлӑ каҫнӑ чухне тата плацдарм ҫинчи ҫапӑҫусенче кӑтартнӑ хастарлӑхпа паттӑрлӑхшӑн» кӗҫӗн сержант Михаил Елесина Совет Союзӗн Геройӗн аслӑ ятне панӑ, Ленин орденӗпе тата 4500 номерлӗ «Ылтӑн Ҫӑлтӑр» медалӗпе чысланӑ.
Киеве ирӗке кӑларнине, Корсунь-Шевченковский, Умань-Ботошани операцисене, Молдави ССРне, Румыние, Венгрие, Австрие, Чехословакине ирӗке кӑларнине хутшӑннӑ. 1945 ҫулхи ҫурла уйӑхӗнче Елесина демобилизациленӗ. Тӑван ҫӗршывне таврӑннӑ.
1952 ҫулхи ҫӗртмен 10-мӗшӗнче вилнӗ, Барнаулти Булыгин ҫӑвинче пытарнӑ.
Унсӑр пуҫне темиҫе медальпе чысланӑ.
Елесин ячӗпе Ельцовкӑра тӑкӑрлӑка ят панӑ, Барнаулта палӑк лартнӑ.
Ӑнлантарусем
- ^ Елесин Михаил Васильевич. Архивланӑ 2012 ҫулхи ҫурлан 17-мӗшӗ.
- ^ Елесин Михаил Васильевич. Архивланӑ 2012 ҫулхи ҫурлан 4-мӗшӗ.
- ^ Елесин Михаил Васильевич. Наградной лист. Страницы:1.2.
