Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Магуськин Борис Флегонтович

Борис Флегонтович Магуськин (1928 ҫулхи пушӑн 8-мӗшӗ, Хĕрлĕ Чутай — 2006 ҫулхи кӑрлачӑн 3-мӗшӗ; хӑш-пӗр ҫӑлкуҫсенче — Флегентович[1]) — совет саманин тата Раҫҫейӗн инженер-геодезисчӗ, техника ӑслӑлӑхӗсен докторӗ (1998), профессор (2002), геодезипе картографи отличникӗ. Чӑваш Енре ҫуралнӑ. Геодези виҫевӗсене математика мелӗпе тишкерес енӗпе специалист, тӗплӗнрех тунӑ чи пӗчӗк тӑваткалсен меслетне шутласа кӑлараканӗ[2].

Пурнӑҫӗ

Малтанхи ҫулӗсем

Борис Флегонтович Магуськин 1928 ҫулхи пушӑн 8-мӗшӗнче Чӑваш Республикинчи Хӗрлӗ Чутай районӗнчи Хӗрлӗ Чутай ялӗнче ҫуралнӑ[2].

Пӗлӳ илни

Магуськин 1951 ҫулта Мускаври геодези, аэрофотоӳкерӳ тата картографи инженерӗсен институтне (МИИГАиК) «Астрономипе геодези» специальноҫпе вӗренсе пӗтернӗ[3]. Каярахпа вӑл ҫак институтрах аспирантурӑна (1961) вӗренсе пӗтернӗ[2].

Ӗҫӗ-хӗлӗ тата ӑслӑлӑхри ҫул-йӗрӗ

1951–1958 ҫулсенче Магуськин Свердловскри аэрогеодези предприятийӗнче ӗҫленӗ[2]. Ӗҫри ҫитӗнӳсемшӗн ӑна предприятин Хисеп кӗнекине кӗртнӗ[3].

1961–2006 ҫулсенче Борис Флегонтович Урал патшалӑх университечӗн астрономи кафедринче ассистент, аслӑ вӗрентекен, доцент тата профессор пулса ӗҫленӗ[1]. 1995 ҫултанпа вӑл физика факультечӗн профессорӗн тивӗҫӗсене пурнӑҫласа пынӑ[2], 2002 ҫулта вара ӑна профессор ӑслӑлӑх ятне панӑ[1].

Магуськин аслӑ геодезипе, Ҫӗр ӗлкин теорийӗпе, математикӑлла картографипе, геодези виҫевӗсене математика мелӗпе тишкерессипе, геодези тытӑмӗсене танлаштарассипе, сфероидлӑ геодезипе тата топографи черченийӗпе лекци курсӗсен программисене хатӗрленӗ[3].

1998 ҫулта ӑна техника ӑслӑлӑхӗсен жокторӗн ӑслӑлӑх степенне панӑ[1].

Пурнӑҫӗн юлашки ҫулӗсем

Борис Флегонтович Магуськин 2006 ҫулхи кӑрлачӑн 3-мӗшӗнче Екатеринбургра вилнӗ[2].

Ӑслӑлӑх ӗҫӗ-хӗлӗ

Магуськинӑн ӑслӑлӑх интересӗсен тытӑмӗ — геодези виҫевӗсене математика мелӗпе тишкересси[1]. Унӑн ӑслӑлӑхри тӗп ҫитӗнӗвӗ — тӗплӗнрех тунӑ чи пӗчӗк тӑваткалсен меслетне шутласа кӑларни[3].

Борис Флегонтович — геодезипе топографин актуаллӑ ыйтӑвӗсемпе ҫыхӑннӑ 80 яхӑн ӑслӑлӑх ӗҫӗн авторӗ[1].

Унӑн пичетленсе тухнӑ ӗҫӗсен хушшинче:

  • «О вероятнейшей оценке математического ожидания»;
  • «Об одном принципе обработки измерений»[1].

Хисепӗсем

  • «Геодезипе картографи отличникӗ» паллӑ — икӗ хутчен[3];
  • Раҫҫей Федерацийӗн Вӗрентӳ министерствин Хисеп хучӗ (2001)[1].

Ӑнлантарусем

  1. ^ 1, 2, 3, 4, 5, 6, 7, 8 Магуськин Борис Флегентович (учёный; 08.03.1928–03.01.2006). Наследие Чувашии. Национальная библиотека Чувашской Республики. Пӑхнӑ кун: 2025 ҫулхи утӑн 14-мӗшӗ.
  2. ^ 1, 2, 3, 4, 5, 6 Магуськин Борис Флегонтович. Чувашская энциклопедия. Пӑхнӑ кун: 2025 ҫулхи утӑн 14-мӗшӗ.
  3. ^ 1, 2, 3, 4, 5 Магуськин Борис Флегонтович. biography.ideafix.su. Пӑхнӑ кун: 2025 ҫулхи утӑн 14-мӗшӗ.

Вуламалли

  • Абруков В.С. Магуськин Борис Флегонтович — Электронла чăваш энциклопедири статья.
  • Магуськин Борис Флегонтович // Известные земляки Красночетайского района. — Красные Четаи, 2022.

Каҫӑсем

Категорисем