Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Толик Хураски вӑтам шкулӗ

Толик Хураски вӑтам шкулӗ — Шупашкар муниципаллӑ округӗнчи Толик Хураски ялӗнче вырнаҫнӑ пӗтӗмӗшле вӑтам пӗлӳ паракан шкул.

Адресӗ: Чӑваш Республики, Шупашкар районӗ, Толик Хураски ялӗ, Шкул урамӗ, 1-мӗш ҫурт[1].

Директорӗ: Пилюгина Валентина Валерьевна[2].

Историиӗ

1913 ҫулта Енккасси[3] ялӗнче чиркӳ прихучӗн пуҫламӑш шкулне уҫнӑ пулнӑ. Вӑл Никита Артемьев пӳртӗнче вырнаҫнӑ пулнӑ. Малтанхи вӗрентекен пулса Елизавета Ефремова ӗҫленӗ. 1915 ҫулта ҫак класа Томаккассинчи Иван Степанов ҫуртне куҫарнӑ. 1917 ҫулта 4-мӗш класс ачисем вӗренсе тухнӑ та шкула хупнӑ[4].

Ҫав вӑхӑтрах Ҫӑкалӑхьялта I ступеньлӗ шкул ӗҫленӗ, унта ачасене Нестер Гранацкий вӗрентнӗ. 1916–1917 ҫулсенче кунта икӗ класс пулнӑ, анчах 1922 ҫулта шкула хупнӑ[4].

Толик Хураскинче I ступеньлӗ шкула 1925 ҫулта уҫнӑ, вӑл Василий Никитин пӳртӗнче вырнаҫнӑ пулнӑ. Пӗрремӗш класа тӗрлӗ ӳсӗмри ачасене йышӑннӑ — 9 ҫултан пуҫласа 13 ҫулчченех. Тӑватӑ ҫул иртнӗ хыҫҫӑн пӗрремӗш ачасем вӗренсе тухнӑ[4].

1930 ҫулта ялта ултӑ ҫул вӗренттекен шкул ӗҫлеме пуҫланӑ, тепӗр ҫулталӑкран — колхоз ҫамрӑкӗсен шкулӗ. Ҫиччӗмӗш класран пӗрремӗш хут 1933 ҫулта вӗренсе тухнӑ. 1934 ҫулта колхоз ҫамрӑкӗсен шкулӗ ватам шкул пулса тӑнӑ. 1935 ҫулта ачасем ҫӗнӗ шкул ҫуртӗнче вӗренме тытӑннӑ, кивӗ ҫуртӗнче вара вӗрентекенсем пурӑнма пуҫланӑ[5].

1935 ҫулта шкул директорӗн вырӑнне Фёдоров Алексей Фёдоровича лартнӑ. Вӑтам шкултан чи пӗрремӗш ҫамрӑксем 1937 ҫулта вӗренсе тухнӑ: вӑтам пӗлӳ илни ҫинчен 29 хӗрпе каччӑ аттестат илнӗ. Малалла директор тилхепине унччен Кӳкеҫ вӑтам шкулӗнче завуч пулса ӗҫленӗ Сергеев Степан Сергеевич хӑй аллине илнӗ. 1939 ҫулта Толик Хураски шкулне ҫавӑн пекех Кӳкеҫри шкултан математика вӗрентекен Яковлев Константин Яковлевича куҫарнӑ, юпа уйӑхӗнче вӑл директор пулса тӑнӑ[5].

Тӑван Ҫӗршывӑн Аслӑ вӑрҫи пуҫланас умӗн шкулта 500 ача патнелле вӗреннӗ, вӗсем Шупашкарпа Сӗнтӗрвӑрри районӗсенчи 37 ялсенчен кунта ҫӳренӗ. Пурӗ 17 класс пулнӑ. Вӑрҫа хыҫҫӑн классен шучӗ 30 тарана ҫитнӗ, ачасен шучӗ те 1000 ҫитсе пынӑ[5].

1941 ҫулхи кӗркунне шкул ҫуртне вӗҫев шкулне (лётчик-истребительсене хатӗрленӗ) панӑ, ачасем вара ялти халӑхӑн ҫурчӗсенче вӗреннӗ. 1944 ҫулта вӗҫев шкулне фронт ҫывӑхнерех куҫарнӑ та ачасем хӑйсен тӑван шкул ҫуртне вӗренме куҫнӑ[4].

Яковлев Константин Яковлевич фронта 1942 ҫулхине тухса кайнӑ, ун вырӑнне шкул директорӗ И.Р. Осипов пулса тӑнӑ. Константин Яковлевич 1946 ҫулта вӑрҫӑран таврӑннӑ хыҫҫӑн каллех директор пуканне йышӑннӑ, ку тивӗҫе вӑл 1959 ҫулччен пурнӑҫланӑ. 1959–1964 ҫулсенче шкул директорӗ пулса Романов Иван Романович ӗҫленӗ, кайран 22 ҫул хушши — Кузьмин Григорий Кузьмич. 1985–1989 ҫулсенче шкул директорӗ Иванов Игнат Иванович пулнӑ, кайран нумай ҫул хушши — Колпакова Светлана Георгиевна[4].

1995 ҫулта хальхи икӗ хутлӑ шкул ҫуртне туса лартнӑ[5].

Хальхи вӑхӑтра

Шкулта спорт залӗ, стадион, спорт лапамӗ пур. Ҫавӑн пекех шкулта акт залӗ, вулавӑш, 50 вырӑнлӑ столовӑй пур[6].

Шкулта вӗренекен ачасене вӗри апатпа тивӗҫтереҫҫӗ. Ку тӗлӗшпе «Атлашевски» агрофирма» ТМЯП-па килӗшӳ тунӑ[7].

Ӑнлантарусем

  1. ^ Основные сведения (выр.). Муниципальное бюджетное общеобразовательное учреждение "Толиковская средняя общеобразовательная школа" Чебоксарского муниципального округа Чувашской Республики.
  2. ^ Руководство (выр.). Муниципальное бюджетное общеобразовательное учреждение "Толиковская средняя общеобразовательная школа" Чебоксарского муниципального округа Чувашской Республики.
  3. ^ Халӗ Толик Хураски ялӗ шутӗнче.
  4. ^ 1, 2, 3, 4, 5 Чуваш. Респ., Адм. Чебоксарского района, МБУК "Центральная библиотека" Чебоксарского района. Энциклопедия Чебоксарского района. — Центральная библиотека Чебоксарского района, 2014. — Т. 1. — С. 392-393. — 505 с.
  5. ^ 1, 2, 3, 4 Энциклопедия Чебоксарского района : Толиковская средняя общеобразовательная школа (выр.). Энциклопедии. Цифровая библиотека НБ ЧР.
  6. ^ Материально-техническое обеспечение и оснащенность образовательного процесса. Доступная среда (выр.). Муниципальное бюджетное общеобразовательное учреждение "Толиковская средняя общеобразовательная школа" Чебоксарского муниципального округа Чувашской Республики.
  7. ^ Организация питания в образовательной организации (выр.). Муниципальное бюджетное общеобразовательное учреждение "Толиковская средняя общеобразовательная школа" Чебоксарского муниципального округа Чувашской Республики.

Вуламалли

  • Чуваш. Респ., Адм. Чебоксарского района, МБУК "Центральная библиотека" Чебоксарского района. Энциклопедия Чебоксарского района. — Центральная библиотека Чебоксарского района, 2014. — Т. 1. — С. 392-393. — 505 с.

Каҫӑсем

Темӑпа ҫыхӑннисем

Категорисем