Упамсар (Çĕнĕ Малыкла районĕ)

Çарăмсанăн хĕрри Упамсар,
Чун йăпанчĕ кунта сахал мар.

Сарлака та çеремлĕ урам,
Чунăма яр уçам та ярам.

Хапăллать хăнана ял çынни:
Хыпарлать — мĕн кивви, мĕн çĕнни.

Савăнсах парнелет ыррине —
Чун-чĕре тепĕнчи юррине.

...Шурлăхри тĕмери çĕрпÿртре —
Аптаратнă çĕлен те ÿпре.

Ушахран инçе мар çеçенхир,
Ах, анчах ыйхуна ĕнтĕ сир:

Хирелле ĕслеме тухсанах,
Тапăнать хир хурахĕ сана.

Ав, хуралçă лерен систерет:
Сăмала çунтарса тĕтĕрет.

Акапауç таврашне пăрахсах
Вирхĕнетĕн киле хăвăртрах.

Каçса кĕр те эс ил кĕпере —
Тыт кистен, сыхă тăр хÿтĕре.

Ан çунтарччăр пур-çук пурлăхна,
Ан сÿнтарччăр лутра кил-çуртна...

Юр юрлаççĕ ялти ватăсем,
Савнăç-хуйхă чĕртен кĕвĕсем...

Вăйă-кулă, уяв, юрату —
Пурте кĕнĕ-пĕрлешнĕ тату.

Хĕн килсен те, этем хуçăлман,
Чун çути-илемрен уйрăлман.