Хомлинсем

Наталипе Сергей Шевченкӑн пултарулӑх проектне виҫӗ ҫул хушшинче пурнӑҫа кӗртнӗ. Пӗрремӗш кӳлепе Калининградра 2018 ҫулта вырнаҫӑннӑ. Юлашки хомлинсем хулари хӑйсен вырӑнӗсене 2021 ҫулхи утӑ уйӑхӗнче йышӑннӑ^[5]. Кӳлепесене пурне те бронзӑран ӑсталанӑ^[2]. Вӗсен ячӗсене вырӑнти ҫынсем халӑх тетелӗнче сасӑлав ирттерсе суйласа илнӗ^[6].

Пурӗ ҫичӗ персонаж пур^[2][5]:

• Карл мучи — 2018 ҫулхи ҫӗртмен 3-мӗшӗнче Кант утравӗ патне илсе ҫитерекен Пыл кӗперӗ ҫине вырнаҫтарнӑ^[6].
• Марта кинеми — 2018 ҫулхи авӑнӑн 27-мӗшӗнче Янтарь музейӗ ҫумӗнче вырнаҫӑннӑ^[7].
• Витёк моряк — 2019 ҫулхи утӑн 26-мӗшӗнче Тӗнче океанӗн музейӗ патӗнчи ҫыран карлӑкӗ ҫине вырнаҫнӑ^[8].
• Уля мӑнук — Калининград зоопаркӗпе юнашар 2020 ҫулхи ҫӗртмен 19-мӗшӗнче вырнаҫтарнӑ^[9].
• Лео ашшӗ — 2020 ҫулхи утӑн 21-мӗшӗнче — Янтарь кунӗнче^[10] — Калининград облаҫӗн ӳкерӳ ӳнер музейӗ патӗнче вырнаҫтарнӑ^[11].
• Варя амӑшӗпе Пӗчӗк Антошка — шӑп та лӑп ҫулталӑкран, 2021 ҫулхи утӑн 21-мӗшӗнче, кӑтартнӑ. Пӗрремӗш кӳлепе Врангель башни патӗнче, иккӗмӗшӗ — Амалиенаури (Калининградри ӗлӗкхи район, унта нимӗҫ виллисем сыхланса юлнӑ) «Альтес Хаус» музей ҫумӗнче^[12].

Авторсен шухӑшӗпе кӳлепесене хулари чи паллӑ вырӑнсенче вырнаҫтарнӑ^[5]. Ҫапла май юмахри сӑнарсемсем 8,7 тӑршшӗ тӑсӑлакан туризм маршрутне йӗркеленӗ, ун тӑрӑх экскурсисемпе квестсем ирттереҫҫӗ.

Эпир ҫак сӑнарсем паллӑ вырӑнсен хӑйне евӗрлӗ талисманӗ тата амулечӗ пулса тӑнине асӑрхарӑмӑр. Ҫапла вара эпир палӑртса хунӑ концепци пурнӑҫа кӗчӗ: ҫичӗ хомлина куртӑм-тӑк — Калининградри чи паллӑ ҫичӗ вырӑна ҫитсе куртӑм^[5], — палӑртнӑ Наталья Шевченко.

Регионӑн культурӑпа туризм министрӗ Андрей Ермак хомлинсем хула символӗсенчен пӗри пулса тӑрасса шаннине палӑртнӑ^[5].

2022 ҫулта ҫак пӗчӗк кӳлепесем Раҫҫейӗн халиччен тӗл пулман чи тӗлӗнтермӗш халӑх арт-объекчӗсен энциклопедине кӗнӗ^[2].

Хомлинсем — юмахри сӑнарсен кил-йышӗ, вӗсен ӳсӗмӗ аслӑ ӑруран пуҫласа чи пӗчӗккисем таран. 20 см таран ҫӳллӗш пӗчӗк кӳлепесем ырӑ кӑмӑллӑ сӑн-сӑпатлӑ, пуҫӗсем вӗсен пропорциллӗ мар пысӑк тата хӑлхисем вара кулӑшла тӑсӑк^[13].

Хомлин сӑнарӗ Калининградри чи паллӑ ҫутҫанталӑк паллисенчен пӗринпе — янтарьпе, ӑна чавса кӑларнипе тата туса кӑларассипе ҫыхӑннӑ. Хулари халапсем тӑрӑх хомлинсем тахҫантанпах ҫын хушшинче пурӑнаҫҫӗ, ахаль чухне ҫывӑраҫҫӗ, ҫӗрле вара, хула ҫыннисем ҫывӑрнӑ вӑхӑтра, вӑранаҫҫе те вӑй парса тӑракан, вӑрӑм ӗмӗрпе тивӗҫтерекен хаклӑ чула тупса тирпейлеҫҫӗ^[14].

Карл мучи

Карл мучи — 2018 ҫулта вырнаҫтарнӑ пӗрремӗш хомлин кӳлепи. Вӑл тирпейлӗ тумпа, сӑмси ҫине пенсне ҫакнӑ, интеллигент Карл йывӑҫпа ӗҫлеме юратать, вырӑнти курӑксенчен вӗретнӗ чей сӑйлама юратать, нихӑҫан та хурланмасть^[6][15].

Марта кинеми

Карл арӑмӗ — Марта кинеми — чӗнтӗрлӗ калпак тӑхӑннӑ, аллине вӑл виҫӗ ҫулҫӑллӑ клевер тытнӑ. Вӑл янтарь музейне кӗнӗ ҫӗрти бойницӑна вырнаҫнӑ. Унӑн урисем патӗнче пысӑках мар хутаҫ выртать, автор каланӑ тӑрӑх унта хӗвел чулне пытарнӑ^[7].

Лео ашшӗ

Лео ашшӗ — хомлинсен ҫемйинче чи пултаруллӑскер. Ахальтен мар вӑл ӳкерӳ ӳнер музейӗ патӗнче шухӑша путса вырнаҫнӑ — хула пурнӑҫне шухӑшлӑн сӑнать^[11][16].

Варя амӑшӗ

Лео арӑмӗ — Варя амӑшӗ — Врангель башнинчи чӳречерен сывлӑша чуптуса илнӗ пек сӑнарланнӑ^[12].

Витёк моряк

Ҫамрӑк хомлин Витя Тӗнче океанӗн музейӗ патӗнче «Витязь» ятлӑ ӑслӑлӑхпа тӗпчев карапӗпе юнашарти ҫыран хӗрринчи карлӑк ҫинче хут карапра вырнаҫнӑ. Ку сӑнар ҫак тӑрӑхӑн тепӗр паллӑ вырӑна — Балти тинӗсӗпе тинӗс промыселне — сӑнласа парать^[8][17].

Уля мӑнук

Пӗчӗк Уля Калининград зоопаркӗ ҫумӗнчи шуй ҫинче сатуррӑн ярӑнать^[9].

Пӗчӗк Антошка

Йӑл кулӑллӑ пӗчӗк Антошка — хомлинсенчен чи кӗҫӗнни. Унӑн шӑлаварӗ ҫинче пысӑк тӳмме пур. Вӑл Густав Гроссманнӑн кёнигсберг негоцианчӗн «Альтес Хаусӑн» музей-хваттерӗ ҫумӗнчи парапет ҫинче рехетленсе выртать^[12].

Малтанхи икӗ хомлинсен кӳлепине вырнаҫтарнӑ хыҫҫӑн 2019 ҫулхи пуш уйӑхӗн 20-мӗшӗнче Калининград тата Балти архиепископӗ Серафим Калининград облаҫӗн кӗпӗрнаттӑрӗ Антон Алиханов ячӗпе хатӗрленӗ уҫӑ ҫырӑвӗнче халӑх халаплӑхӗ шутланакан хӗрт-суртсен кӳлеписене вырнаҫтарассине сивленӗ. Унӑн шухӑшӗпе, ҫакнашкал сӑнарсем наци культурин аталанӑвне сиенлӗ витӗм кӳреҫҫӗ тата христианлӑх витӗмӗпе йӗркеленнӗ культура еткерлӗхӗн хакне чакараҫҫӗ^[18], «халӑха суя тӗнлӗхӗн тӗттӗм ӗмӗрӗсем патне тавӑраҫҫӗ тата славянсен ансат национализмӗ шайне антарса лартаҫҫӗ»^[19].

Регионти культурӑпа туризм министрӗ Андрей Ермак ӑнлантарнӑ тӑрӑх, хомлинсем Калининградри паллӑ вырӑнсене популяризацилес тӗлӗшпе усӑ кӳреҫҫӗ^[4]:

Хомлинсен кӳлеписем нимӗнле хӗрт-суртсемпе те, нимӗнле тӗнпе те, ҫӗнӗрен чӗрӗлнӗ суя тӗнпе те пач ҫыхӑнман — вӗсем йӑлтах кӑмӑла ҫӗклемелли кӳлепесем^[4].

Юмахри сӑнарсене ӑсталакансен проекта чарса лартма тивнӗ, ҫапах та хулара пурӑнакансем халӑх тетелӗнче хомлинсене хӳтӗлесе флешмоб йӗркеленӗ^[20].