Шупашкар экономикӑпа технологи колледжӗ

Шупашкар экономикӑпа технологи колледжне 1962 ҫулхи ҫӗртме уйӑхӗн 2-мӗшӗнче РСФСР Ял хуҫалӑх продукчӗсене туса илессипе хатӗрлекен министерствин 48 № приказне тӗпе хурса йӗркеленӗ. Вӑл вӑхӑтра вӗренӳ заведенине Шупашкар планпа экономика техникумӗ тенӗ, учет профессийӗсен специалисчӗсене: бухгалтерсене, плановиксене, экономистсене хатӗрленӗ^[1][2].

Колледж историйӗн хӑш-пӗр тапхӑрӗсем:

• 1978 ҫулта «Тырӑ упрамалли тата тирпейлемелли технологи» специальнӑҫлӑ технологи уйрӑмӗ уҫӑлнӑ^[2].
• 1979 ҫулта колледжа Чӑваш АССРӗнчи ятарлӑ вӑтам вӗренӳ заведенийӗсем валли база тесе палӑртнӑ^[1].
• 1993 ҫулта техникума республикӑра пӗрремӗш Шупашкар экономикӑпа технологи колледжӗ — пысӑк шайри вӑтам професси пӗлӗвӗ паракан вӗренӳ заведенийӗ туса хунӑ^[1].
• 1994 ҫулта колледж «Ҫӑкӑр, кондитер тата макарон изделийӗсен технологийӗ» специальноҫа вӗрентме йышӑнма пуҫланӑ^[2].
• 1996 ҫултанпа ЧР Архив ӗҫӗсен патшалӑх комитечӗ хушнипе пӗрремӗш хут «Управление документаци тӗлӗшӗнчен тивӗҫтересси тата архив тӗпчевӗ» специальноҫпа абитуриентсене йышӑннӑ.
• 1999 ҫулта технологи уйрӑмӗнче «Йӳҫетекен производствӑсен технологийӗ тата эрех тӑвасси» специальноҫ уҫнӑ^[2].
• 2003 ҫултанпа колледжра «Обществӑлла апатлану продукцийӗн технологийӗ» специальноҫ уҫма йышӑннӑ. Ҫак ҫул-йӗре аталантарма 2007 ҫулта «Обществӑлла апатлану службине йӗркелесси» специальноҫ уҫнӑ.
• 2002 тата 2007 ҫулсенче колледжа продукци (услугӑсен) пахалӑхӗ енӗпе пысӑк кӑтартусем тунӑшӑн Чӑваш Республикин Президенчӗн премине панӑ^[2].
• 2005 тата 2008 ҫулсенче колледж «Раҫҫейри чи лайӑх 100 тавар» программа-конкурсӑн регионти тапхӑрӗн лауреачӗ («Услуги» номинацире), 2008 ҫулта «Продукципе услугӑсен пысӑк пахалӑхӗпе конкурентлӑхӗшӗн» Атӑлҫи тӑрӑхӗнчи пахалӑх премийӗн лауреачӗ пулса тӑнӑ^[2].
• 2017 ҫулта вӗренӳ заведенине «Пулӑшу сферинчи малта пыракан колледж» статуспа тивӗҫтернӗ тата вӑл инклюзивлӑ вӗрентӳ енӗпе профессиллӗ тӗп организаци пулса тӑнӑ^[1].

Колледжра 20 тӗрлӗ специальнӑҫа вӗрентеҫҫӗ^[3]:

• Ӳсентӑран чӗр таварӗн апат-ҫимӗҫ технологийӗ (квалификаци — «Техник-технолог»);
• Управлени докуменчӗсемпе тивӗҫтересси тата архив тӗпчевӗ (квалификаци — «Управленипе архив ӗҫне документсемпе тивӗҫтерекен специалист»);
• Чрезвычайлӑ лару-тӑрура оперативлӑ (васкавлӑ) реакци йӗркелесси (квалификаци — «Васкавлӑ чӗнӳсене йышӑнакан тата тирпейлекен специалист»);
• Экономика тата бухгалтер учечӗ (отрасльсемпе) (квалификаци — «Бухгалтер»);
• Пушар хӑрушсӑрлӑхӗ (квалификаци — «Пушар хӑрушсӑрлӑхӗн специалисчӗ»);
• Чрезвычайлӑ лару-тӑрура хӳтӗлесси (квалификаци — «Чрезвычайлӑ лару-тӑрура хӳтӗлекен специалист»);
• Банк ӗҫӗ (квалификаци — «Банк ӗҫӗн специалисчӗ»);
• Пилотсӑр авиаци системисене ӗҫлеттересси (квалификаци — «Пилотсӑр вӗҫекен аппаратсен операторӗ»);
• Повар тата кондитер ӗҫӗ (квалификаци — «Повар тата кондитер ӗҫӗн специалисчӗ»);
• Илем индустрийӗн технологийӗсем (квалификаци — «Илемлӗх индустрийӗн специалисчӗ»);
• Ҫӑмӑл промышленноҫ изделийӗсене конструкцилесси, моделлесси тата ӑсталамалли технологи (квалификаци — «Технолог-конструктор»);
• Ҫӗвӗҫ (квалификаци — ҫӗвӗҫ);
• Туризм тата тараватлӑх (квалификаци — «Туризм тата тараватлӑх специалисчӗ»);
• Социаллӑ хӳтлӗх правипе йӗркелӗвӗ (квалификаци — «Юрист»);
• Информаци тытӑмӗсемпе программӑласси (квалификаци — «Веб тата мультимедиа приложенийӗсем хатӗрлекен»);
• Ҫӗвӗҫ (квалификаци — «Натураллӑ тата искусствӑлла пусмасенчен тумтир ҫӗлекен специалист»);
• Информаци тытӑмӗсемпе ресурссен операторӗ (квалификаци — квалификациллӗ рабочи, служащи — «Информаци тытӑмӗсемпе ресурссен операторӗ»);
• Правӑна сыхлас ӗҫ (квалификаци — «Юрист»);
• Кухньӑра ӗҫлекен (квалификаци — «Кухньӑри рабочи»);
• Парикмахер искусстви (квалификаци — «Парикмахер»).

• Колледж сайчӗ
• «Контактра» тетелти страници