Шӑмӑш тӗп шкулӗ

1880 ҫулта хурал пӳртӗнче чиркӳпе прихут шкулне уҫнӑ пулнӑ. Тӑватӑ ҫултан земство управи хушӑвӗпе вӑл пӗр класлӑ чиркӳпе прихут шкулӗ пулса тӑнӑ. Каярахпа ӑна хутла вӗрентекен шкул теме пуҫланӑ^[2].

1888 ҫулта шкула вӑхӑтлӑха Ҫӗньяла куҫарнӑ, унта вӑл малтан хупах пулнӑ пӳртре вырӑн тупнӑ. 1903 ҫулта Шӑмӑшра шкул валли ятарлӑ йывӑҫ ҫурт хӑпартнӑ^[3].

Чи малтанхи шкул заведующийӗ Вишневский Павел Иванович священник пулнӑ, хӑй вӑхӑтӗнче вӑл Хусанти ӑс-хавӑл семинаринчи курсра вӗреннӗ. Пӗрремӗш вӗрентекен — Зайков Антоний Фёдорович пулнӑ, шкул отчётӗнче ун пирки «чӑвашран тухнӑ хресчен» тесе палӑртнӑ^[2].

1903 ҫулхи раштавӑн 20-мӗшӗ тӗлне шкулта 49 арҫын ача тата 14 хӗрача вӗреннӗ^[3].

1932–1936 ҫулсенче ялта шкул валли йывӑҫ ҫурт туса лартнӑ. 1960-мӗш ҫулсенче шкулӑн тепӗр ҫурт хушӑннӑ — Ҫӗнӗ Шупашкар хули сарӑлма тытӑнсан Тӗкӗрҫ ялӗнчи ҫыннисене хулара хваттерсем панӑ, шкул ҫуртне вара сӳтсе Шӑмӑша куҫарнӑ. Ӑна ялта унччен лартнӑ чиркӳ вырӑнӗнче ҫӗнӗрен пуҫтарнӑ^[2].

Тӗрлӗ вӑхӑтра шкул директорӗсем пулнӑ^[3]:

• Вишневский Павел Иванович священник,
• Осипов Леонтий Осипович,
• Сергеев Александр Сергеевич,
• Столяров Сергей Фомич,
• Данилов Григорий Степанович (1938–1941, 1946–1947),
• Николаев Леонид Николаевич (1941–1942),
• Чумакова (Белоусова) Варвара Ивановна (1943–1946),
• Александров Георгий Александрович (1947–1953),
• Егоров Ананий Егорович (1953–1956, 1957–1968),
• Иванова Александра Григорьевна (1956–1957),
• Григорьев Михаил Григорьевич (1968–1980),
• Семёнова Галина Порфирьевна (1980–1986),
• Иванов Александр Дмитриевич (1986–2001),
• Иванова Надежда Анатольевна (2001–?),
• Князева Зарема Олеговна ()^[4].

Хальхи вӑхӑтра шкул икӗ хутлӑ тимӗр-ботонран тунӑ ҫуртра вырнаҫнӑ. 2021–2022 вӗренӳ ҫулӗнче 61 ача вӗреннӗ. Вӗрентекенсен шучӗ: 11 ҫын^[5].

Шкул ҫумӗнче пахча-ҫимӗҫ ӳстермелли лаптӑк пур^[5]. Шкулта вӗренекен ачасене вӗри апатпа тивӗҫтереҫҫӗ — ку ӗҫе «Атлашевски» агрофирма» ТМЯП пурнӑҫлать^[6].