Ястребова Антонина Михайловна
Ястребова Антонина Михайловна (1925 ҫулхи авӑнӑн 28-мӗшӗ, Васюринская, Динская районӗ, Краснодар крайӗ — 2005 ҫулхи ҫурлан 10-мӗшӗ, Восход, Улатӑр районӗ, Чӑваш Республики) — совет ялхуҫалӑх производствинче малта пыракан, Улатӑр районӗнчи «Стемасский» совхозри агроном. Социализмла Ӗҫ Паттӑрӗ (1966)[1].
Пурнӑҫӗпе ӗҫӗ-хӗлӗ
1925 ҫулхи авӑнӑн 28-мӗшӗ Краснодар крайӗн Динская районӗнчи Васюринская станицинче хресчен кил-йышӗнче ҫуралнӑ[1].
Краснодар иҫӗм ҫырлипе пахчаҫимӗҫ институтне вӗренсе пӗтернӗ хыҫҫӑн Краснодар крайӗнчи «Агроном» совхозра уйрӑм агрономӗ, уй-хир техникӗ пулса ӗҫленӗ. 1951 ҫулхи нарӑс уйӑхӗнче Ястребовсен ҫемйи упӑшкин тӑван вырӑнӗсене – Улатӑр районне — куҫса килнӗ, Антонина Михайловна «Стемасский» совхоза агромелиоратора ӗҫлеме кӗнӗ[1].
1956 ҫулта вӑл махорка цехне ертсе пынӑ, совхозра агроном-махорковед ӗҫне пурнӑҫланӑ[1].
Вӑл ертсе пынипе махорка ӳстермелли ятарлӑ пусӑ ҫаврӑнӑшӗсем, тӑпрана тирпейлемелли тата удобренисем кӗртмелли рационаллӑ йӗрке-тытӑм туса хатӗрленӗ[1].
А. М. Ястребова вунӑ бригадӑран тӑракан хӑйӗн коллективӗпе 220 гектар лаптӑк ҫинче махорка ӳстернӗ. Пӗтӗм лаптӑкран 1965 ҫулта вӗсем гектартан 29,6 центнер тухӑҫ пухса илнӗ[1].
СССР Аслӑ Канашӗн Президиумӗн 1966 ҫулхи ака уйӑхӗн 30-мӗшӗнчи хушӑвӗпе ҫӗрулми, пахчаҫимӗҫ, улма-ҫырла тата иҫӗм ҫырли туса илес тата хатӗрлес ӗҫре тунӑ ҫитӗнӳсемшӗн Антонина Михайловна Ястребована Ленин орденӗпе «Ҫурлапа Мӑлатук» ылтӑн медаль парса Социализмла Ӗҫ Паттӑрӗн ятне панӑ[1].
1967 ҫулта Краснодар крайӗнчи махорководсен семинарӗнче пулнӑ хыҫҫӑн А. М. Ястребова агроном унти опыта ӗҫе кӗртнӗ, гектартан 35 центнер чӗртавар тухӑҫне илнӗ, 1969 ҫулта вара экспериментлӑ махорка пуҫтаракан машинӑна хута янӑ[1].
1977 ҫултанпа агрохимик пулса ӗҫленӗ, кайран «Стемасский» совхозӑн тӗп агрономӗ[1].
Каярах совхозра пахчаҫимӗҫ ӳстерекенсен бригадине ертсе пынӑ, вӑл 1980 тата 1985 ҫулсенче Пӗтӗм Раҫҫейри социализм ӑмӑртӑвӗсенче призлӑ вырӑнсене ҫӗнсе илнӗ[1].
Улатӑр районӗнчи Восход посёлокӗнче пурӑннӑ, 2005 ҫулхи ҫурла уйӑхӗн 10-мӗшӗнче вилнӗ[1].
Хисепӗсем
- Чӑваш АССРӗн тава тивӗҫлӗ агрономӗ (1965)[1],
- Социализмла Ӗҫ Паттӑрӗ (30.04.1966),
- икӗ Ленин орденӗ (30.04.1966 № 366132, 11.12.1973),
- «Ҫурлапа Мӑлатук» ылтӑн медаль (30.04.1966 № 12213),
- «Ӗҫри хастарлӑхшӑн» медаль,
- «Ӗҫри хастарлӑхшӑн. В. И. Ленин ҫуралнӑранпа 100 ҫул ҫитнине асӑнса» медаль (06.04.1970),
- медальсем
Астӑвӑм
- 2017 ҫулхине Краснодар хулинче Кубаньпе Адыгея Социализмла Ӗҫ Паттӑрӗсен ячӗсемпе асӑну хӑми вырнаҫтарнӑ.
Вуламалли
- Антонина Ястребова (1925-2005) // Хыпар. — 2018. — 30 чӳк/ноябрь (№ 134/135). — С. 14 : сӑн ӳкерчӗк.
- Яковлев, В. Ҫӗре юратсан / В. Яковлев // Коммунизм ялавӗ. — 1971. — 26 март.
- Игнатьев, М. В. Светлой памяти Ястребовой Антонины Михайловны / М. В. Игнатьев // Советская Чувашия. — 2005. — 13 авг. — С. 6.
- Мадебейкин, И. Н. Ястребова Антонина Михайловна / И. Н. Мадебейкин // Краткая чувашская энциклопедия. — Чебоксары, 2001. — С. 521.
- Мадебейкин, И. Н. Ястребова Антонина Михайловна / И. Н. Мадебейкин // Чувашская энциклопедия. — Чебоксары, 2011. — Т. 4 : Си-Я. — С. 751.. — См. текст
- Юдин, Б. Любовь к земле : [о А. М. Ястребовой] / Б. Юдин // Наши земляки — Герои Социалистического Труда : [сб. очерков] / ред.: Г. А. Грабовецкая, Н. С. Павлов. — Чебоксары, 1971. — С. 183-188 : фот.
- Ястребова Антонина Михайловна // Ими гордится Чувашия. — Чебоксары, 1987. — С. 13-131.
- Ястребова Антонина Михайловна // Энциклопедия агропромышленного комплекса Чувашской Республики. — Чебоксары, 2017. — С. 675-676.
- Ястребова Антонина Михайловна : [некролог] // Алатырские вести. — 2005. — 13 авг.