Ҫӗнӗ Пуянкасси вӑтам шкулӗ

Ҫӗнӗ Пуянкассинче икӗ класлӑ шкула 1885 ҫулта уҫнӑ. Ачасене Степан Яковлевич Скворцов вӗрентнӗ. Вӑтам уйрӑмра 8 ача пулнӑ, кӗҫӗннинче — 12^[2].

1905 ҫултанпа вӑл хутла вӗрентекен шкул пулса тӑнӑ. Заведующийӗ Тӑвай-Тимеш чиркӗвӗн священникӗ Гаврил Спиридонов пулнӑ, ачасене ҫав чиркӳриех Громов Н. псаломщик вӗрентнӗ^[2].

1918 ҫулта шкул 1-мӗш ступеньлӗ совет шкулӗ пулса тӑнӑ. 1934 ҫулта ачасене ҫичӗ ҫул вӗрентме пуҫланӑ, 1972 ҫултан — сакӑр ҫул, 1982 ҫулта вӑл вӑтам шкул пулса тӑнӑ^[3].

1982 ҫулта 320 ача вӗренмелӗх шкулӑн ҫӗнӗ кирпӗч ҫуртне хута янӑ^[3].

Шкул директорӗ пулса нумай ҫул хушши Иванов А.И. (1958–1968), Степанов Г.С. (1972–1986), Михайлова М.П. (1986–1996), Ильин В.И. (1996–2006), Кириллов Сергей Павлович (2006 ҫултан) ӗҫленӗ^[3].

Шкулта компьютер класӗ пур. Техника тӗлӗшӗнчен пурӗ 18 компьютер, 1 ноутбук, 7 принтер, 7 проектор, цифра фотоаппарачӗ пур. Ачасене апатпа тӑрантармашкӑн 80 вырӑнлӑ столовӑй пур, пахча-ҫимӗҫ ӳстермешкӗн шкул ҫумӗнче вӗренӳпе опытлӑ лаптӑк вырнаҫнӑ^[2].

Шкул вулавӑшӗнче 8 пин ытла кӗнеке, вӗсенчен 6500 — илемлӗ литература, 1000 вӗрену кӗнеки. Вулавӑшра словарьсем, справочниксем, ача-пӑча энциклопедийӗсем, медиатека пур^[3].

Шкул ачисене спорт енӗпе аталантарма шкулта спорт залӗ, футбол уйӗ, чупмалли ҫул тата ытти хатӗр пур^[3].

2018–2019 вӗренӳ ҫулӗнче 75 ача вӗреннӗ, шкулта 9 класс-комплект пӗлӳ илнӗ. Шкулта ҫавӑн пекех шкул умӗнхи ушкӑн та пур, 2018–2019 вӗренӳ ҫулӗнче унта 20 ача ҫӳренӗ^[3].

Шкулта таврапӗлӳ музейне йӗркеленӗ^[2].