Зайцев Алексей Иванович

Алексей Иванович Зайцев 1940 ҫулхи ҫӗртмен 27-мӗшӗнче Чӑваш АССРти Канаш районӗнчи Кивӗ Шелттем ялӗнче ҫуралнӑ. Шелттемри вӑтам шкула вӗренсе пӗтернӗ, унтан Улатӑрти вӑрман техникин техникумне вӗренме кӗнӗ, ӑна 1962 ҫулта вӗренсе пӗтернӗ^[1].

Ӗҫлеме хӑйӗн специальноҫӗпе Красноярск крайӗнче тытӑннӑ. Ҫарта хӗсметре пулнӑ. Ҫартан таврӑнсан ӑна Шӑмӑршӑ район хаҫачӗн редакцине фотокорреспондент пулса ӗҫлеме янӑ. 1967 ҫулта Комсомольски район хаҫачӗн редакцине куҫнӑ, унта вӑл литература сотрудникӗ тата ҫырусен пайӗн пуҫлӑхӗ пулса ӗҫленӗ^[1].

1976 ҫултанпа 13 ҫул хушши Шелттем ял канашӗн ӗҫтӑвкомне ертсе пынӑ^[1]. 1990 ҫулта журналистикӑна таврӑннӑ, ял хуҫалӑх пайӗн пуҫлӑхӗ, яваплӑ секретарь, редактор ҫумӗ, унтан виҫӗ ҫул ҫурӑ — Комсомольски район хаҫачӗн редакторӗ пулса ӗҫленӗ. 2000 ҫулта пенсие тухнӑ^[1][2].

Тивӗҫлӗ канӑва тухсан, 2002 ҫултанпа ӑна Шелттем ял тӑрӑхӗнчи ветерансен канашӗн председателӗ пулма суйланнӑ, общество ӗҫне хастар хутшӑннӑ, пӗччен пурӑнакан пенсионерсен пурӑнмалли условисене тӗрӗслес ӗҫе хутшӑннӑ, социаллӑ службӑсемпе тачӑ ҫыхӑнса ӗҫленӗ^[2].

Алексей Зайцев чӑвашла ҫырнӑ проза хайлавӗсемпе пьесӑсен авторӗ. Унӑн чи паллӑ ӗҫӗсен шутне «Кӗтмен туй», «Синкерлӗ кун», «Каҫа юлнӑ куккук» калавсем, ҫавӑн пекех «Манӑн хӗрлӗ мӑкӑнӗм» тата «Ҫын сӑмахӗ» пьесӑсем кӗреҫҫӗ. «Кӗтмен туй» пьесӑна Чӑваш ҫамрӑксен театрӗн сцени ҫинче 2000 ҫулта лартнӑ^[1]. Ҫавӑн пекех вӑл «Чемпион» кӗнекен авторӗ^[1].

• Журналистсен пӗрлӗхӗн пайташӗ (1990)^[1];
• «Ӗҫ ветеранӗ» хисеплӗ ят^[2];
• Медальсемпе тата Хисеп хучӗсемпе чысланӑ^[1].

• Арӑмӗ — Зайцева Галина Кузьминична.
• Хӗрӗ — Зайцева-Ильина Татьяна Алексеевна, Раҫҫей театрпа кино актриси, эстрада юрӑҫи,Чӑваш Республикин тава тивӗҫлӗ артисчӗ (2008).
• Кӗрӳшӗ — Вячеслав Ильин, артист, режиссёр, продюсер.
• Мӑнкӗсем — Станислав, Максимилиан.