Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Кӳкеҫри 1-мӗш вӑтам шкул

Кӳкеҫри 1-мӗш вӑтам шкул — Шупашкар муниципаллӑ округӗн центрӗнче, Кӳкеҫре, вырнаҫнӑ вӑтам шкул.

Адрес: Шупашкар муниципаллӑ округӗ, Кӳкеҫ посёлокӗ, Шкул урамӗ, 3-мӗш ҫурт[1].

Директор: Петров Людмила Васильевна[2].

Историйӗ

Хӑйӗн кун-ҫулне 1886 ҫулта пуҫланӑ. Ҫакӑн пирки 1888 ҫулта тухнӑ «Народные училища Казанской губернии» кӗнекере ҫапла ҫырнӑ[3]:

Оригиналлӑ текст (выр.)

«Кугесьевская школа грамоты в д. Кугесь Абашевского прихода, где жителей мужчин 233, женщин 219, открыта 13 января 1886 года».

«Апаш прихучӗн Кӳкеҫ ялӗнчи хутла вӗрентекен Кӳкеҫ шкулне 1886 ҫулхи кӑрлачӑн 13-мӗшӗнче уҫнӑ, ялта 233 арҫын, 219 хӗрарӑм пурӑнать.»

Чи малтанах шкул уйрӑм ҫын пӳртӗнче вырнаҫнӑ пулнӑ. Ачасене пӗлӳ панӑ пӗрремӗш вӗрентекен Матвей Григорьев пулнӑ, вӑл Алькеш салинчи хӑй тӗллӗн хутла вӗреннӗскер пулнӑ. Пурӗ 28 ача вӗреннӗ. Пӳрт пысӑк пулманран икӗ тапхӑрта вӗреннӗ[3].

Пӗрремӗш вӗренекенсен йышӗнче Саша Капитонов пулнӑ, каярах вӑл хӑй те вӗрентекен пулма вӗренсе тухнӑ. 1915 ҫулта вӑл тунӑ проектпа шкул валли ятарлӑ ҫурт туса лартнӑ. Пӗтӗмӗшле ачасене пӗлӳ парас ӗҫе вӑл хӑйӗн пурнӑҫӗнчи 50 ҫулне уйӑрнӑ. Ҫавӑн пекех нумай ҫул хушши шкулта ӗҫленисен ретӗнче Патерекри Агеносова Ольга Владимировнӑна асӑнма пулать. Хӑйӗн юратнӑ ӗҫӗпе, ачасене пӗлӳ парассипе, вӑл 55 ҫул тӑрмашнӑ[3].

1917 ҫул хыҫҫӑн шкул ячӗ нумай хутччен улшӑннӑ. 1934 ҫултанпа вӑл вӑтам шкул шутланнӑ. 1937 ҫулта вӑтам шкултан пӗрремӗш ачасем вӗренсе тухнӑ[3].

undefined

Вӑрҫӑ пуҫланнӑ хыҫҫӑн вӗрентекенсем, арҫынсем, пурте тенӗ пекех фронта тухса кайнӑ. 1943 ҫулта шкулӑн пӗр ҫуртӗнче Ленинградран куҫса килнӗ тӑлӑх ачасен ҫурчӗ ӗҫленӗ[3].

1954 ҫулта шкул валли икӗ хутлӑ ҫурт туса лартнӑ, проектне унчченхи директор Александр Николаев хатӗрленӗ пулнӑ. Ҫакӑн хыҫҫӑн шкул директорӗ пулса 23 ҫул хушши Ташков Василий Никитич ӗҫленӗ[3].

1979 ҫулта шкулӑн ҫӗнӗ 3 хутлӑ ҫурчӗ хута кӗнӗ. Вӑл вӑхӑтра директор пулса ӗҫленӗ Михаил Попов тӑрӑшнипе ҫурта ҫулталӑк хушшинче хӑпартнӑ[3].

Шкултан вӗренсе тухнӑ паллӑ ҫынсем

Кӳкеҫри шкултан ҫак паллӑ ҫынсем вӗренсе тухнӑ[3]:

Хальхи вӑхӑтра

Шкул виҫӗ хутлӑ ҫуртра вырнаҫнӑ. Шкулта акт тата спорт залӗсем, спорт площадки, технологипе кулинари кабинечӗ, вулавӑш, ӑсталӑх лаҫҫи тата ҫавӑн пекех, сенсорлӑ пӳлӗм, медицина тата процедура кабинечӗсем пур[4].

Шкулта пуҫламӑш классем валли 14 пӳлӗм пур. Вырӑс чӗлхи кабинечӗсем — 4, математика кабинечӗ — 4. Унсӑр пуҫне шкулта ют чӗлхе вӗренмелли 3 кабинет пур, информатикӑпа ИКТ предмечӗсене вӗренмелли — 2 кабинет. Тӑван чӗлхе кабинечӗсем те иккӗ, ҫавӑн пекех ИЗО тата труб кабинечӗсем иккӗ, историпе обществознани вӗренмелли кабинетсем те иккӗ. Биологи, хими, географи, музыка кабинечӗсем пӗршер[4].

Шкулта вӗренекен ачасене вӗри апатпа тивӗҫтереҫҫӗ. Шкулта кухня тата 150 вырӑнлӑ столовӑй пур[4]. Апатпа ачасене «Атлашевски» агрофирма» ТМЯП тивӗҫтерет[5].

Ҫавӑн пекех пӑхӑр

Ӑнлантарусем

  1. ^ Основные сведения (выр.). Муниципальное бюджетное общеобразовательное учреждение "Кугесьская средняя общеобразовательная школа №1" Чебоксарского муниципального округа Чувашской Республики.
  2. ^ Руководство (выр.). Муниципальное бюджетное общеобразовательное учреждение "Кугесьская средняя общеобразовательная школа №1" Чебоксарского муниципального округа Чувашской Республики.
  3. ^ 1, 2, 3, 4, 5, 6, 7, 8 Леонид Павлов. Школа грамоты – в частном доме (выр.). Тӑван Ен (5 нарӑсӑн 2016).
  4. ^ 1, 2, 3 Материально-техническое обеспечение и оснащенность образовательного процесса. Доступная среда (выр.). Муниципальное бюджетное общеобразовательное учреждение "Кугесьская средняя общеобразовательная школа №1" Чебоксарского муниципального округа Чувашской Республики.
  5. ^ Организация горячего питания в образовательной организации (выр.). Муниципальное бюджетное общеобразовательное учреждение "Кугесьская средняя общеобразовательная школа №1" Чебоксарского муниципального округа Чувашской Республики.

Каҫӑсем

Темӑпа ҫыхӑннисем

Категорисем