Кӳкеҫ лицейӗ
Кӳкеҫ лицейӗ — Шупашкар районӗн центрӗ шутланакан Кӳкеҫре вырнаҫнӑ лицей.
Лицей адресӗ: Шупашкар районӗ, Кӳкеҫ, Пӗрремӗш май урамӗ, 13а ҫурт[1]
Лицей директорӗ: Григорьева Анжела Ивановна[2]
Историйӗ
Кӳкеҫри лицея 1988 ҫулхи авӑнӑн 1-мӗшӗнче уҫнӑ[1].
Паллӑ вӗрентекенӗсем
- Пахомова Наталия Терентьевна (1956 ҫ.ҫ.) — акӑлчан чӗлхи вӗрентекенӗ.
- Смородинов Юрий Витальевич (1961 ҫ.ҫ.) — 1990–2001 ҫулсенче географи вӗрентнӗ; Апаш вӑтам шкулӗн директорӗ.
Хальхи вӑхӑтра
Шкул виҫӗ хутлӑ ҫуртра вырнаҫнӑ.
Шкулӑн вулавӑш (пурӗ 24 700 кӗнеке пур), волейбол площадки, стадион, спорт залӗ, акт залӗ пур. Ҫавӑн пекех ачасене вӗренмешкӗн медиастуди, хими пӳлӗмӗ вырнаҫнӑ[3].
Ачасене вӗри апатпа тивӗҫтереҫҫӗ. Ку тӗлӗшпе «Центр» ТМЯП-па (Шупашкар хули) килӗшӳ тунӑ. Ачасене апатланма шкулта 200 ҫын вырнаҫӑнма пултаракан столовӑй пур. Сахал тупӑшлӑ ҫемьесенчи ачасене ҫур хакпа ҫитереҫҫӗ[4].
2009–2010 ҫулсенче лицей пурнӑҫне ҫутатакан «Объектив» шкул хаҫатне кӑларассине йӗркеленӗ[5].
2025 ҫулхи нарӑсӑн 4-мӗшӗнче лицейри чылай ача столовӑйӗнче ҫитернӗ апатпа наркӑмӑшланнӑ. Пӗрине пульницӑна вырттарнӑ[6].
Ҫитӗнӗвӗсем
Лицей ҫитӗнӗвӗсен шутне районти олимпиадӑсенче 531 вырӑн йышӑннине, вӗсенчен 245 хутӗнче ҫӗнтерӳҫӗсем пулса тӑнине кӗртме пулать. Республика шайӗнче иртнисенче 31 вырӑн йышӑннӑ, Раҫҫей шайӗнче иртнисенче — 1 вырӑн. Лицей биологи, хими, информатика, математика, технологи, вырӑс чӗлхи, чӑваш чӗлхи тата физкультура енӗпе ачасене лайӑх вӗрентни енӗпе паллӑ[5].
«Кугеҫ лицейӗ» муниципаллӑ вӗренӳ учрежденийӗ икӗ пин ытла ачана вӗрентсе кӑларнӑ; вӗсен шутӗнче 64 ача ылтӑн медальпе, 96-шӗ - «Вӗренӳре ятарлӑ ҫитӗнӳсемшӗн» кӗмӗл медальпе вӗренсе пӗтернӗ[5].
Вӗренсе тухакан пур ача та вырӑс чӗлхипе тата математикӑпа ППЭ формипе экзамена ӑнӑҫлӑ тытаҫҫӗ. 97% ытла ача ытти предметсемпе экзамен суйлаҫҫӗ. Лицейран вӗренсе тухнисем Мускаври, Санкт-Петербургри, Хусанти, Чулхулари, Сарӑтури тата ытти хуласен хисеплӗ аслӑ шкулӗсенче вӗренме кӗреҫҫӗ[5].
Юнашар вырнаҫнисем
- «Ягодка» ача пахчи (Совет урамӗ, 67а ҫурт).
Ӑнлантарусем
- ^ 1, 2 Основные сведения (выр.). Муниципальное бюджетное общеобразовательное учреждение "Кугесьский лицей" Чебоксарского муниципального округа Чувашской Республики.
- ^ Руководство (выр.). Муниципальное бюджетное общеобразовательное учреждение "Кугесьский лицей" Чебоксарского муниципального округа Чувашской Республики.
- ^ https://fs.edu21.cap.ru/content24/48/kuglic-rcheb/cc9e507e-4168-4114-baa1-60b3e6ec9f2b/mto-soo.pdf
- ^ Организация питания в образовательной организации (выр.). Муниципальное бюджетное общеобразовательное учреждение "Кугесьский лицей" Чебоксарского муниципального округа Чувашской Республики. Пӑхнӑ кун: 2025 ҫулхи нарӑсӑн 10-мӗшӗ.
- ^ 1, 2, 3, 4 25 лет Кугесьскому лицею (выр.), Чăваш Республикин Шупашкар муниципаллă округĕ (2013-10-04).
- ^ Софья Савнеш. Кӳкеҫри лицейра ачасем наркӑмӑшланнӑ (чăв.), Чӑваш халӑх сайчӗ (2025-02-05).