Назаренко Светлана Анатольевна

Светлана Назаренко 1970 ҫулхи юпа уйӑхӗн 17-мӗшӗнче Фрунзе (халӗ Бишкек) хулинче ҫуралнӑ. Ҫичӗ ҫултан пуҫласа Асли ача-пӑча концерт хорӗн солистки пулнӑ.

Ашшӗ — Анатолий (1950—2003), амӑшӗ (1950—2016).

12 ҫулта республикӑри халӑх пултарулӑх конкурсӗнче юрланӑ, ун хыҫҫӑн ӑна Рафаил Сарлыков студине чӗнсе илнӗ. Каярахпа вӑл Сарлыковӑн «Аракет» ансамблӗн (Кыргызстанӑн халӑх ансамблӗ) йышне кӗнӗ.

Кӗҫех вӑл хӑйӗн упӑшки Алексей Лесников («Пирамида» радио директорӗ пулнӑскер) ертсе пынипе соло карьерине пуҫланӑ. СНГ территорийӗнчи фестивальсене хутшӑннӑ, ҫав шутра «Бухара» (2-мӗш вырӑн), «Тянь-Шань» (1-мӗш вырӑн), «Ялта» фестивалӗсене, ҫавӑн пекех «Ялта-Мускав-транзит» фестиваль финалне тухнӑ. «Спокойная ночь» тата «Сломанное радио» магнитоальбомсем ҫырса кӑларнӑ. 1996 ҫулта «Музыка снов» ятлӑ CD-альбом (Кыргызстанри пӗрремӗш CD-релизсенчен пӗри), 1999 ҫулта — «Чай с ароматом клубники» альбом кӑларнӑ.

1991—1998 ҫулсенче «Пирамида» радиостанцийӗнче автор тата программа ертӳҫи пулса ӗҫленӗ. 2001 ҫулта Киргизи ӳнер институтӗнчен «эстрада вокалӗ» специальность илсе хӗрлӗ дипломпа вӗренсе тухнӑ.

2001 ҫулта Мускава куҫса килсен, Светлана Алексей Лесниковпа, Дмитрий тата Леонид Притула тӑвансемпе тата Мария Притулӑпа пӗрле «Город 312» ушкӑна йӗркеленӗ. Ушкӑн ячӗ Бишкек хулин телефон кодне пӗлтерет.

2007 ҫулта Киргизи Республикин тава тивӗҫлӗ артисчӗ ята тивӗҫнӗ.

2015 ҫулта ӑна «Бишкек хулин хисеплӗ гражданинӗ» ятпа чысланӑ. 2016 ҫулта культура тата ӳнер сферинчи ҫитӗнӳсемшӗн «Данк» («Мухтав») медальпе наградӑланӑ.

2015 ҫулхи кӗркунне «Пӗрремӗш канал» эфирӗнчи «Точь-в-точь» шоун виҫҫӗмӗш сезонне хутшӑнса виҫҫӗмӗш вырӑн йышӑннӑ.

2016 ҫултанпа, ушкӑнри ӗҫпе пӗрлех, Игорь Матвиенко продюсер центрӗ ертсе пынипе соло репертуарпа ӗҫлеме пуҫланӑ. 2017 ҫулта «Вспоминай обо мне, когда пойдёт дождь» клип тухнӑ («Викинг» фильм саундтрекӗ).

2018 ҫулта «Дарак ыры» («Йывӑҫ юрри») пӗрремӗш киргиз мюзиклӗ валли саундтрек ҫырма хутшӑннӑ.

COVID-19 чирӗпе чирлесе ирттернӗ хыҫҫӑн йывӑр чирлесе ӳкнӗ. 2023 ҫулта артисткӑн анлӑ инсульт пулса иртнӗ, ҫавна пула концертсене ирттерессине вӑхӑтлӑха чарса лартма тивнӗ. Реабилитаци вӑхӑтӗнче «Город 312» ушкӑнри вокалист вырӑнне Диана Макарова йышӑннӑ.

2025 ҫулхи юпа уйӑхӗн 30-мӗшӗнче Ая вӑрах вӑхӑт хушши тӑхтав тунӑ хыҫҫӑн пӗрремӗш хут сцена ҫине тухнӑ. Вӑл «Русское радио» юбилейне тата «Ылтӑн граммофон» премине халалланӑ церемонире юрланӑ. Хускану функцийӗсем туллин юсанса ҫитменнине пула артистка «Останусь» хита креслӑра ларса юрланӑ^[1].