Патреккел тӗп шкулӗ
Патреккел тӗп шкулӗ — Елчӗк муниципаллӑ округне кӗрекен Патреккел ялӗнче вырнаҫнӑ тӗп шкул.
Адресӗ: Елчӗк муниципаллӑ округӗ, Патреккел ялӗ, Ленин урамӗ, 79в ҫурт.
Шкул директорӗ — Петрова Ольга Геннадиевна[1].
Историйӗ
Чӑваш Республикинчи Елчӗк районӗнчи Патреккел ялӗнче шкул 1845 ҫултах уҫӑлнӑ, икӗ ӗмӗре яхӑн хушӑра вӑл тӗрлӗ ятлӑ та пулса курнӑ.
1845 ҫулта Патреккелте ял прихут училищи уҫӑлни ҫинчен Патшалӑх пурлӑхӗн министерствинче ҫырса хунӑ. Вӑл чӑваш земство училищи шутланнӑ. Малтанхи вӑхӑтра ачасене уйрӑм ҫынсен ҫурчӗсенче вӗрентнӗ.
1861 ҫултан шкула ялти чиркӳ шучӗпе тытса тӑнӑ, ун чух вӑл 4 ҫул вӗренмелли шкул пулнӑ. 1889—1890 ҫулсенче шкулта 70 ача, вӗсенчен 2-шӗ — хӗрача, вӗренни паллӑ.
1925 ҫулта пуҫламӑш шкулӑн йывӑҫ ҫуртне туса лартнӑ.
1936 ҫулта Патреккел ял Канашӗн укҫи-тенкипе Акчел тата Патреккел ялӗсен хушшинче йывӑҫ шкул ҫуртне туса лартнӑ, 7 класс вӗренмелли шкул пулса тӑнӑ.
1960 ҫулта вӗренекенсем Свердлов ячӗллӗ колхоз укҫи-тенкипе туса лартнӑ 2 хутлӑ йывӑҫ ҫуртра вӗренме тытӑннӑ, 8 класс вӗренмелли шкул пулса тӑнӑ. Кунта 12 класс пӳлӗмӗ пулнӑ. Кунта Патреккел, Акчел тата Элекҫей Тимеш ялӗсенчен 169 ача вӗреннӗ.
1989 ҫулччен сакӑр ҫул вӗренмелли шкул, унтан — пӗтӗмӗшле пӗлӳ паракан тулли мар вӑтам шкул, 1992—1993 вӗренӳ ҫулӗнчен пуҫласа вӑтам шкул шутланнӑ.
1996 ҫулта шкулта спортзал туса хута янӑ.
1984 ҫултанпа шкулта таврапӗлӳ музейӗ ӗҫлет, унччен 1961 ҫулта йӗркеленӗ таврапӗлӳ кӗтесӗ пулнӑ. Ӑна йӗркелекенсем — Захаров И. Е. истори учителӗ тата Иванов В. Е. географи учителӗ.
2009 ҫулта шкулӑн ҫӗнӗ ҫуртне туса лартнӑ[2].
Хальхи вӑхӑтра
Шкулта 16 вӗренӳ пӳлӗмӗ, спортзал, библиотека, хоккей площадки, апатлану пӳлӗмӗ, мастерскӑй пур. Шкул ҫумӗнче ӗҫе хӑнӑхтармалли, сӑнавсем ирттермелли 0,8 гектар ҫӗр пур.
Шкула 2004 ҫулта газпа ӑшӑтаҫҫӗ. Кӳршӗ ялсенчен ачасене шкул автобусӗпе турттараҫҫӗ.
Шкул библиотекинче 8 пин ытла кӗнекепе тӗрлӗ пособисем: учебниксем — 3094, илемлӗ литература — 3570, ытти материалсем[3].
Шкул директорӗсем
- Пушков А. Е. (1936—1941),
- Ястребова Н. А. (1941—1945),
- Романов Б. Р. (1948—1967),
- Енейкин А. Н. (1967—1971),
- Герасимов А. В. (1971—1977),
- Ишмуратов А. Ф. (1978—2001),
- Иванов Н. П. (2001—2009),
- Петрова О. Г. (2009 ҫултанпа).
Шкулта вӗреннӗ паллӑ ҫынсем
- Доброхотова Т. А., медицина ӑслӑлӑхӗсен докторӗ,
- Иванов А. Ф., Ленин орденӗн кавалерӗ,
- Миллин П. В., Ленин орденӗн кавалерӗ,
- Миллин А. М., ҫӑмӑл атлет, тӗнче класлӑ спорт мастерӗ,
- Миллин Н. П., нумай ҫул хушши Елчӗк район администрацийӗн ертӳҫи пулнӑскер,
- Борисов Г. А., Чӑваш АССР тата РСФСР тава тивӗҫлӗ культура ӗҫченӗ, Патрекккел халӑх хорӗн ертӳҫи,
- Борисова П. Г., эстрада юрӑҫи,
- Енейкин А. Н., журналист, Чӑваш Республикин ҫамрӑксен патшалӑх премийӗн лауреачӗ, Ҫеҫпӗл Мишши ячӗллӗ преми лауреачӗ.
Ӑнлантарусем
- ^ Руководство (выр.). Муниципальное бюджетное общеобразовательное учреждение "Байдеряковская основная общеобразовательная школа Яльчикского муниципального округа Чувашской Республики".
- ^ История школы (выр.). Муниципальное бюджетное общеобразовательное учреждение "Байдеряковская основная общеобразовательная школа Яльчикского муниципального округа Чувашской Республики".
- ^ МАТЕРИАЛЬНО-ТЕХНИЧЕСКОЕ ОБЕСПЕЧЕНИЕ И ОСНАЩЕННОСТЬ ОБРАЗОВАТЕЛЬНОГО ПРОЦЕССА. ДОСТУПНАЯ СРЕДА (выр.). Муниципальное бюджетное общеобразовательное учреждение "Байдеряковская основная общеобразовательная школа Яльчикского муниципального округа Чувашской Республики".
Вуламалли
- Яльчикский район. Краткая энциклопедия. — 44-45 стр.