Пӗтӗм тӗнчери блогер кунӗ
| Уяв | |
| Пӗтӗм тӗнчери блогер кунӗ | |
| Ӳкерчĕк:Международный день блогера.jpg | |
| Тӗсӗ | Професси уявӗ |
|---|---|
| Официаллӑ | International Weblogger’s Day |
| Ҫирӗплетнӗ | 2004 |
| Палӑртаҫҫӗ | кашни ҫул |
| Кун | ҫӗртме, 14 |
| Ҫыхӑннӑ | блогинг |
Пӗтӗм тӗнчери блогер кунӗ (акăл. International Weblogger’s Day, ҫавӑн пекех InWeDay ятпа паллӑ) — ҫӗртмен 14-мӗшӗнче паллӑ тӑвакан ҫулленхи уяв. Ҫак куна пӗтӗм тӗнчери интернет-авторсене халалланӑ, уява вӗсене пӗрлештерме, блогинга кашни хӑй шухӑшне палӑртма май паракан тата шухӑшӗсемпе ылмашӑнма пулӑшакан хатӗр пек сарма йӗркеленӗ.
Професси ҫинчен
Блогер вӑл — блога тытса тӑракан, тӑтӑшах унта мӗн те пулин вырнаҫтаракан, аудиторине хӑйӗн шухӑшӗсемпе, опычӗпе тата пӗлӗвӗпе паллаштаракан ҫын. Блог тытса тӑни хобби евӗр те, ҫак ӗҫе професси шайӗнче ертсе пыни те пулма пултарать.
Хӑйсен блогӗсене професси шайӗнче тытса пыракан блогерсем тӗрлӗ меслетсемпе усӑ курса укҫа ӗҫлесе илме пултараҫҫӗ:
- Реклама: блогра реклама баннерӗсем тата контекстлӑ реклама вырнаҫтарни.
- Партнёрлӑ программӑсем: ытти компанисен таварӗсемпе пулӑшӑвӗ пирки пӗлтерни вӗсем пирки информаци сарни ҫинче укҫа ӗҫлесе илни.
- Спонсорлани: спонсор тӳленӗ постсем вырнаҫтарнӑшӑн компанисенчен пулӑшу илни.
- Хӑйсем хатӗрленӗ тавара е пулӑшу ӗҫӗсене сутни: вӗсен шутне блогер хатӗрленӗ кӗнеке, курс, консультаци е ытти тавар кӗреҫҫӗ. Професси шайӗнче ӗҫлекен блогерсем час-часах лайӑх текстсем ҫырма пӗлеҫҫӗ, вӗсен маркетинг енчен тата халӑх тетелӗсене тытса пырас ӗҫре пысӑк опыт пур. Вӗсем аудиторие илӗртекен, хӑйсен блогӗнче юлма хистекен контент ӑсталама пӗлеҫҫӗ, блогпа паллашакансен статистикине тишкереҫҫӗ, пысӑкрах ҫитӗнӳсем тума хӑйсен ӑсталӑхне ӳстерес енӗпе тӑрӑшаҫҫӗ[1].
Уяв историйӗ
Пӗтӗм тӗнчери блогер кунне тӑвас шухӑш 2004 ҫулта, блогингпа аппаланакансене пурне те пӗрлештерес шухӑшлӑ блогерсен ушкӑнӗ хушшинче, ҫуралнӑ. Чи малтанах ку шухӑша 40 ытла ҫӗршыври 500-е яхӑн блогер ырланӑ, 2004 ҫулхи ҫӗртмен 14-мӗшӗнче пӗрремӗш Пӗтӗм тӗнчери блогер кунне ирттернӗ[2]. 2007 ҫулта ку шухӑша ытти блогсен хуҫисем те ырланӑ, ӑна ирттерессипе килӗшсе, вӗсемпе пӗр шухӑшлӑ пулнине ҫирӗплетсе хӑйсен страницисенче постсем вырнаҫтарнӑ[3].
Ҫак уявӑн тӗллевӗ — блогерсем хӑйсен ҫитӗнӗвӗсемпе ыттисене паллаштарма, пӗлтерӗшлӗ темӑсене сӳтсе явма тата пӗтӗм тӗнчери интернет-авторсен пӗрлешӗвӗнче пулнине палӑртма пултарни. Ҫавӑн пекех унӑн тӗллевӗсем хушшинче — интернетпа медиа аталантарас ӗҫне блогерсен тӳпине палӑртасси, ҫӗнӗ авторсене блогсем уҫма тата вӗсен ӑсталӑхне аталантарма пулӑшасси, блогерсене ҫутатакан пӗлтерӗшлӗ темӑсем ҫине тимлӗх уйӑрасси.
Уява пӗрремӗш хут палӑртнӑ май вӗсем хӑйсен онлайн-дневникӗсенче ятарлӑ постсем пичетленӗ, хӑш-пӗр хуласенче вара офлайн-тӗлпулусем иртнӗ, унта блогерсем ыттисемпе паллашма пултарнӑ, хӑйсен проекчӗсене вӗсемпе сӳтсе явма пултарнӑ[4].
2000-мӗш ҫулсен варри тӗлне Пӗтӗм тӗнчери блогерӑн кунӗ блогосферӑра пӗлтерӗшлӗ пулӑм пулса тӑнӑ. Ҫак кун тӗнчен мӗнпур кӗтесӗсенчи блогерсем ятарлӑ постсем пичетленӗ, хӑйсен шухӑшӗсемпе ҫитӗнӗвӗсем ҫинчен каласа панӑ, ҫавӑн пекех онлайн мелпе те, офлайн мелпе те тӗрлӗ мероприятие хутшӑннӑ.
Уяв йӑлисем
Ҫак кун блогерсем пӗр-пӗрне хавхалантару сӑмахӗсем ҫыраҫҫӗ, хӑйсем кӑмӑлланӑ каналсемпе тата ресурссемпе паллаштараҫҫӗ, ҫавӑн пекех аудиторипе интерактивлӑ мероприятисем ирттереҫҫӗ. Хӑш-пӗр ҫӗршывсенче ҫак куна халалласа блогерсен офлайнри тӗлпулӑвӗсем иртеҫҫӗ, унта контент хатӗрлекенсем ӗҫтешӗсемпе паллашма пултараҫҫӗ. Раҫҫейре те ҫак кун ҫулсерен «чӗрӗ» блогерсен тӗлпулӑвӗсем иртеҫҫӗ.
Пӗтӗм тӗнчери блогер кунӗпе пӗрле тӗнчере тата Блог кунӗ (акăл. Blog Day) те пур. Ӑна ҫурлан 31-мӗшӗнче уявлаҫҫӗ[5].
Пӗтӗм тӗнчери блогер кунне кирек мӗнле интернет-контента хатӗрлекен те — унӑн каналне ҫырӑннисен йышне пысӑках мар пулин те, блог теми расна пулсан та — палӑртма пултарать[6].
Ҫавӑн пекех пӑхӑр
- Блог
- Фрилансер кунӗ
- Интернет-журналистика
- Халӑх тетелӗсем
Ӑнлантарусем
- ^ Международный день блогера. ast.ru (14.06.2023).
- ^ «Международный день блогера» час общения. ФКУ «Цифровая культура» (14.06.2024).
- ^ Международный день блогера. «Тюменская областная научная библиотека имени Дмитрия Ивановича Менделеева».
- ^ Wayback Wednesday: International Webloggers Day 2004. Cosmic Observation. Тĕрĕсленĕ 28 Ҫу уйӑхӗн 2024.
- ^ 14 июня отмечается Международный день блогера. Информационный портал «РЕВИЗОР.РУ» (14.06.2022).
- ^ Международный день блогера в 2023 году — история и особенности праздника. «МИЦ «Известия» (13.06.2023).