Родионов Михаил Егорович

1915 ҫулхи чӳк уйӑхӗн 15-мӗшӗнче Раҫҫей Империйӗнчи Чӗмпӗр кӗпӗрнинчи Улатӑр уесӗнчи Милютино ялӗнче (халӗ — Чӑваш Республикинчи Пӑрачкав районне кӗрет) хресчен кил-йышӗнче ҫуралнӑ. Ялхуҫалӑх техникумне вӗренсе пӗтернӗ хыҫҫӑн Архангельск облаҫӗнче ӗҫленӗ, унтан 1938 ҫулта Хӗрлӗ Ҫара чӗнсе илнӗ.

1941 ҫулхи ҫурла уйӑхӗнчен пуҫласа Карел фронтӗнче 23 гварди стрелоксен дивизийӗн 426 стрелоксен полкӗнче пулемётчик пулса ҫапӑҫнӑ.

Михаил Родионов 1941 ҫулхи чӳкӗн 7-мӗшӗнче Карел-Финн ССРӗнчи Лоух станцийӗ патӗнче паттӑрлӑх кӑтартнӑ, аманнӑскер темиҫе сехет хушши фашистсен атакине пулемёт вучӗпе чарса тӑнӑ, унтан, тыткӑна лекес мар тесе, хӑйне те, пулемётне те, тӑшмансене те граната сирпӗтсе тӗп тунӑ.

Карелири Лоух районӗнчи Сосновый посёлокра тӑванла вилтӑпринче пытарнӑ.

СССР Аслӑ Канашӗн Президиумӗн 1943 ҫулхи нарӑс уйӑхӗн 22-мӗшӗнчи Указӗпе Родионов Михаил Егорович хӗрлӗ армееца ҫар командованийӗн хушӑвӗсене лайӑх пурнӑҫланӑшӑн, нимӗҫ фашисчӗсемпе ҫапӑҫнӑ чух паттӑрлӑхпа хӑюлӑх кӑтартнӑшӑн Совет Союзӗн Паттӑрӗ ятне (вилнӗ хыҫҫӑн) панӑ^[1], хисеплӗ ятпа пӗрле Ленин орденне тата «Ылтӑн Ҫӑлтӑр» медальне тивӗҫнӗ.

• Совет Союзӗн Паттӑрӗ^[2] (22.2.1942);
• Ленин орденӗ;
• «Ылтӑн Ҫӑлтӑр» медаль.

• Паттӑр ятне Архангельскри, Сосновый посёлокӗнчи, Пӑрачкаври тата тӑван Милютино ялӗнчи урамсене панӑ;
• Унӑн ятне Архангельскри 59-мӗш шкула панӑ^[3];
• Архангельскри 59-мӗш шкул ҫине асӑну хӑми вырнаҫтарнӑ;
• М. Е. Родионова хӑй ҫапӑҫнӑ ҫар чаҫӗн списокне ӗмӗрлӗхех кӗртнӗ;
• Пӑрачкаври Ҫӗнтерӳ лапамӗнче Совет Союзӗн Паттӑрне чысласа 8 стела вырнаҫтарнӑ;
• Пӑрачкаври район музейӗнче Пӑрачкав районӗнче ҫуралса ӳснӗ 8 Совет Союзӗн Паттӑрне халалласа экспозици йӗркеленӗ.