Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Ҫирӗклӗ Шӑхаль вӑтам шкулӗ

Ҫирӗклӗ Шӑхаль вӑтам шкулӗ — Елчӗк муниципаллӑ округне кӗрекен Ҫирӗклӗ Шӑхаль ялӗнче вырнаҫнӑ вӑтам шкул.

Адресӗ: Елчӗк муниципаллӑ округӗ, Ҫирӗклӗ Шӑхаль ялӗ, Ҫӗнтерӗве 40 ҫул урам, 18 ҫурт.

Шкул директорӗ — Карчиков Виктор Виталиевич[1].

Историйӗ

Чӑваш Республикинчи Елчӗк районӗнчи Ҫирӗклӗ Шӑхаль ялӗнче шкул 1908 ҫулта уҫӑлнӑ, Теччӗ кантонӗн Курнавӑш вулӑсӗнчи 1 ступеньлӗ земство шкулӗ шутланнӑ.

Пурӗ 12-14 ача вӗреннӗ, 1-мӗш класа икӗ ҫулта пӗрре пухнӑ. Ачасене пурне те пӗр учитель вӗрентнӗ. Уроксене харпӑр ҫынсен ҫурчӗсенче ирттернӗ. Кунти ялсенчен тухнӑ пирвайхи учительсем: Григорьев Н. Г., Григорьев И. Г., Порфирьев К. П., Петров В. И.

20-мӗш ҫулсен вӗҫӗнче — 30-мӗш ҫулсен пуҫламӑшӗнче А. Пушков (Акчел) вӗрентекен пуҫарӑвӗпе шкулта пионер организацине, комсомол ячейкине йӗркеленӗ, ачасемпе ҫамрӑксене пултарулӑх патне явӑҫтарнӑ. 1926—1932 ҫулсенче шкул ҫумӗнче ликпункт (вулама-ҫырма пӗлменлӗхе пӗтермелли пункт) ӗҫленӗ.

1935 ҫулта пуҫламӑш шкултан тулли мар вӑтам шкул туса хунӑ. Шкула Ҫирӗклӗ Шӑхаль, Мучар, Кармал тата Элпуҫ ялӗсен ачисем ҫӳренӗ. Ҫав ҫулах пуҫласа шкулӑн харпӑр ҫуртне туса хута янӑ.

1961 ҫулта шкул 8 ҫул вӗренмелли, 1966 ҫулта — вӑтам, 1989 ҫулта пӗтӗмӗшле пӗлӳ паракан вӑтам шкул статусне илнӗ. Пӗр хушӑ шкулта 9-10мӗш классенче вӗренекен Кармал, Элпуҫ, Кӳлпуҫ, Хӑвӑлҫырма, Тӗмер ачисем валли интернат ӗҫленӗ. Шкулта 15 класс пулнӑ, 400-е яхӑн ача вӗреннӗ.

1962 ҫулта пуҫламӑш 3 класс валли йывӑҫ ҫурт туса лартнӑ. 1970 ҫулта пӗр класс тата столовӑй вырнаҫмалӑх тепӗр ҫурт тунӑ.

1984 ҫулта ялӑн ҫурҫӗр енче Шупашкарти «Стротрест-4» предприяти 2 хутлӑ кирпӗч ҫурт туса хута янӑ, унта вӗренӳ тата ӗҫ пӳлӗмӗсем, столовӑй, мастерскӑй, спортзал тата акт залӗ — вӗренӳпе ӗҫ процессне йӗркелемелли пур май та ҫителӗклӗ[2].

Хальхи вӑхӑтра

Шкулта 16 вӗренӳ пӳлӗмӗ, спортзал, библиотека, хоккей площадки, апатлану пӳлӗмӗ, мастерскӑй пур. Шкул ҫумӗнче ӗҫе хӑнӑхтармалли, сӑнавсем ирттермелли 0,8 гектар ҫӗр пур.

Шкула 2004 ҫулта газпа ӑшӑтаҫҫӗ. Кӳршӗ ялсенчен ачасене шкул автобусӗпе турттараҫҫӗ.

Шкул библиотекинче 8 пин ытла кӗнекепе тӗрлӗ пособисем: учебниксем — 3094, илемлӗ литература — 3570, ытти материалсем[3].

Шкул директорӗсем

  • Смычков Константин Григорьевич (1933—1936),
  • Каринкин Макар Митрофанович (1936—1943),
  • Никонова Федора Никоновна (1943—1944),
  • Хмельников Сергей Александрович (1944—1955),
  • Данилов Семен Ильич (1955—1960),
  • Карсакова Лидия Алексеевна (1960—1963),
  • Сазонов Олимпий Алексеевич (1963),
  • Чернов Иван Дмитриевич (1963—1964),
  • Евдокимова Нина Александровна (1964—1968),
  • Шелтуков Сильвестр Иванович (1968—1983, 1985—2001),
  • Васильев Виктор  Порфирьевич (1983—1985, 2001—2003, 2004—2006),
  • Чернов Николай Александрович (2003—2004),
  • Карчиков В. В. (2006 ҫултан пуҫласа)[2].    

Шкулта вӗреннӗ паллӑ ҫынсем

  • Карсаков Л. П. — академик, профессор, геологипе минералоги ӑслӑлӑхӗсен докторӗ,
  • Перепёлкин И. А. — профессор, математика ӑслӑлӑхӗсен докторӗ,
  • Перепёлкин П. А. — физикӑпа математика ӑслӑлӑхӗсен кандидачӗ, Ленин премийӗн лауреачӗ.

Ӑнлантарусем

  1. ^ Руководство (выр.). Муниципальное бюджетное общеобразовательное учреждение «Кильдюшевская средняя общеобразовательная школа Яльчикского муниципального округа Чувашской Республики».
  2. ^ 1, 2 История Кильдюшевской СОШ (выр.). Сайт Кильдюшевской СОШ.
  3. ^ Материально- техническое обеспечение и оснащенность образовательного процесса. Доступная среда (выр.). Муниципальное бюджетное общеобразовательное учреждение «Кильдюшевская средняя общеобразовательная школа Яльчикского муниципального округа Чувашской Республики».

Вуламалли

  • Яльчикский район. Краткая энциклопедия. — 156 стр.

Каҫӑсем

Категорисем