Анисичкин Фёдор Иванович

1915 ҫулхи ҫӗртмен 2-мӗшӗнче (кивӗ стильпе — 15-мӗшӗнче) Рязань кӗпӗрнин Касимов уесӗнчи Култук ялӗнче чухӑн хресчен кил-йышӗнче ҫуралнӑ. Наци енӗпе — вырӑс. 1920-мӗш ҫулсен вӗҫӗнче кил-йышӗпе пӗрле Ҫӗпӗр тӑрӑхне пурӑнма куҫнӑ. 1931 ҫулта Краснозёрск районӗнчи Первомайски салинчи вӑтам шкултан, 1933 ҫулта Анжер ту-промышленнӑҫ училищинчен (Томск крайӗ), 1939 ҫулта Ҫӗн Ҫӗпӗр педагогика институтӗнчен вӗренсе тухнӑ. Новосибирск облаҫӗнчи Краснозёрск районӗнчи Половински вӑтам шкулӗн директорӗ пулса ӗҫленӗ.

1939 ҫулта ҫара илнӗ. Артиллери полк шкулне вӗренме кӗнӗ, унтан вӗренсе тухсан тупӑ командирӗ пулса тӑнӑ. 1941 ҫулта кӗҫӗн лейтенантсен курсӗ хыҫҫӑн взвод командирне лартнӑ. 1941 ҫулхи утӑ уйӑхӗнчен пуҫласа Тӑван Ҫӗршывӑн Аслӑ вӑрҫине хутшӑннӑ. 1941 ҫулхи ҫурла уйӑхӗнче контузи пулнӑ. Сывалнӑ хыҫҫӑн Сталинград патӗнчи ҫапӑҫусене хутшӑннӑ, уншӑн ӑна «За отвагу» медальпе чысланӑ. Ҫавӑн пекех Курск ҫапӑҫӑвне тата Днепр урлӑ каҫнӑ ҫӗре хутшӑннӑ. Калинин, Ҫеҫенхир, 2-мӗш тата 3-мӗш Украина фрончӗсенче ҫапӑҫнӑ. ВКП (б) /КПСС пайташӗ 1943 ҫултанпа.

Фёдор Анисичкин хӗсметре тӑнӑ 69-мӗш гварди стрелоксен дивизийӗн 139-мӗш гварди артиллери полкӗ наступлени вӑхӑтӗнче Днепр патне пынӑ. 1943 ҫулхи юпан 7-мӗшӗнче чи малтисен шутӗнче Градижск (халӗ Полтава облаҫӗн Глобинск районӗ) ялӗ патӗнче Днепр урлӑ каҫнӑ. Тӑшман вут-ҫулӑмӗ айӗнче хӑйӗн взводӗнчи виҫӗ туппине тӳрӗ наводка ҫине вырнаҫтарса тӑшман ҫине пеме тытӑннӑ, ҫапла вара пехотӑна юханшыв урлӑ каҫма май туса панӑ. Плацдармшӑн ҫапӑҫнӑ чухне вӑл ертсе пыракан взвод танксене хирӗҫ перекен орудие, икӗ пулемёта пӗтернӗ, ытти подразделенисемпе пӗрле тӑшманӑн виҫӗ контратакине сирсе янӑ.

Юпан 10-мӗшӗнче, нимӗҫсен контратакине сирсе, Фёдор Анисичкин взвочӗ тӑшманӑн 5 танкне — 2 «тигра» тата 3 вӑтам танкне ҫапса аркатнӑ. Ҫапӑҫу пынӑ вӑхӑтра аманнӑ, анчах стройрах юлнӑ.

Корсунь-Шевченко операцинче капитан пулса батарея, кайран дивизион командирӗ пулнӑ.

СССР Аслӑ Канашӗн Президиумӗн 1944 ҫулхи нарӑсӑн 22-мӗшӗнчи хушӑвӗпе Днепр юханшывӗ урлӑ каҫнӑ чухне командовани ҫар заданийӗсене кӑтартуллӑ пурнӑҫланӑшӑн, юханшывӑн сылтӑм ҫыранӗнче ҫапӑҫури ҫитӗнӳсене аталантарнӑшӑн тата паттӑрлӑхпа паттӑрлӑх кӑтартнӑшӑн Анисичкин Фёдор Иванович гварди лейтенантне Ленин орденӗпе тата «Ылтӑн Ҫӑлтӑр» медальпе (№2587) чысласа Совет Союзӗн Паттӑрӗ хисеплӗ ят панӑ^[4].

1945 ҫулхи ака уйӑхӗнче Венӑшӑн пынӑ ҫапӑҫусенче йывӑр аманнӑ.

1946 ҫултанпа — саппасра. Пенсиччен Новосибирск хулинчи 40-мӗш шкулта учительте ӗҫленӗ.

1998 ҫулхи авӑн уйӑхӗн 21-мӗшӗнче вилнӗ. Новосибирскра пытарнӑ.

• Совет Союзӗн Паттӑрӗ (22.02.1944, «Ылтӑн Ҫӑлтӑр» медаль № 2587);
• Ленин орденӗ (22.02.1944);
• икӗ Тӑван Ҫӗршыв вӑрҫин орденӗн I степенӗ;
• Тӑван Ҫӗршыв вӑрҫин орденӗн II степенӗ;
• Хӗрлӗ Ҫӑлтӑр орденӗ;
• «Хисеп палли» орден;
• «Хӑюлӑхшӑн» медаль;
• ытти медаль.

• Новосибирскра Фёдор Иванович Анисичкин пурӑннӑ ҫурт ҫине (Ядринцевская, 27) асӑну хӑми вырнаҫтарнӑ.
• Паттӑр ячӗпе унӑн тӑван ялӗнчи шкулӑн пионер дружини хисепленнӗ.
• 428 гварди Звенигород Хӗрлӗ Ялавлӑ ракета полкӗн территоринче Ф. И. Анисичкин кӗтесне вырнаҫтарнӑ.
• 2010 ҫултанпа Новосибирск облаҫӗнчи Краснозерски 2-мӗш вӑтам шкул Ф. И. Анисичкин ячӗпе хисепленет.
• Спас-Клепики хулинче Ф. И. Анисичкин бюстне вырнаҫтарнӑ.
• Паттӑрӑн портретне Новосибирск варринчи Первомайски паркӗнче стела ҫине вырнаҫтарнӑ.
• Паттӑр портретне Тума хула евӗр посёлокри щит ҫине вырнаҫтарнӑ.

 Анисичкин Фёдор Иванович «Ҫӗршыв Паттӑрӗсем» сайтра