Давиде Астори

Давиде Астори 1987 ҫулхи кӑрлачӑн 7-мӗшӗнче Бергамо провинцинчи Сан-Джованни-Бьянко хулинче ҫуралнӑ. Профессионалла футболла выляма вырӑнти «Понтизола» клуб академийӗнче пуҫланӑ. 2001 ҫулта унтан вӑл «Милан» ҫамрӑксен ушкӑнне куҫнӑ^{[7][8][9][10][11]}.

2006/07 сезонра футболиста «Пиццигеттоне» клуба тара выляма панӑ^[7][12], унта вӑл 27 вӑйӑ ирттерсе 1 гол ҫапса кӗртнӗ^[13]. Тепӗр ҫулта Давидене С1-А ярӑмри «Кремонезе» клуб тара илнӗ^[7], унӑн йышӗнче вӑл плей-оффа (унта ку ушкӑн «Читтаделлӑна» выляса янӑ) ҫитнӗ^[14].

2008 ҫулхи ҫулла «Кальяри» клуб «Милантан» Астори ҫине 50 % правине 1,2 млн евро тӳлесе туяннӑ^[15]. Авӑн уйӑхӗн 14-мӗшӗнче А ярӑмра «Сиенӑпа» матч ирттернӗ чухне Астори ушкӑн йышӗнче пӗрремӗш хут выляма тухнӑ^[16]. Пурӗпе пӗрремӗш сезонра клубра вӑл 11 вӑйӑ ирттернӗ, вӗсенчен 10 — А ярӑмра тата пӗрре — Итали Кубокӗнче^[17].

Тепӗр ҫулхине «Кальярире» Давиде валли тӗп йышра яланхи вырӑн уйӑрса панӑ: футболист 34 матч ирттерсе 2 гол ҫапса кӗртнӗ («Фиорентинӑпа» «Кьево» хапхисене), ҫапла май контракт ҫумхуҫин, «Миланӑн», тимлӗхне тивӗҫнӗ^[18][19]. 2010 ҫулхи ҫӗртмен 25-мӗшӗнче «Кальяри» «Миланпа» Астори малашне те «россоблюшӑн» выляма пултарасси пирки калаҫса татӑлнӑ^[20][21]. Ҫав вӑхӑтрах футболист хӑй те маларах «пӗр сӑмахсӑрах «Милана» таврӑнӑп» тесе каланӑ^[22]. 2011 ҫулхи ҫулла «Милан» Давидене каялла тавӑрас тенӗ, анчах та милансен Адриано Галлиани вице-президенчӗпе тата «Кальярин» Массимо Челлино президент хушшинчи хутшӑнусем кӑткӑс пулнӑран ӗҫ тухман^[23]. Унтан та ытларах, ҫӗртмен 22-мӗшӗнче «Кальяри» выляканӑн контракчӗн правин юлнӑ 50 % тӳлесе илнӗ^[24].

Юпа уйӑхӗн 23-мӗшӗнче «Наполипе» иртнӗ матчра Астори Эсекьель Лавессипе ҫапӑнса^[25] пӗчӗк ура туни шӑммине хуҫнӑ, ҫавна пула 2,5 уйӑх хушши вӑййа тухайман^[26]. Нарӑс уйӑхӗнче хӳтӗлевҫӗпе Раҫҫейри икӗ клуб, Мускаври «Спартак»^[27] тата Махачкалари «Анжи», кӑсӑкланнӑ, «Анжи» футболистшӑн 15 млн евро сӗннӗ^[28]. Футболист хӑй «хӗрлӗ-шуррисен» ушкӑнне куҫма килӗшнӗ пулнӑ, анчах та Массимо Челлино «Кальяри» президенчӗ килӗшӗве алӑ пусма килӗшмен — сезон варринче вӑл хӑйӗн чи лайӑх вылякана ҫухатасшӑн пулман^[29].

2015 ҫулхи ҫурлан 4-мӗшӗнче «Фиорентина» Асторие пӗр ҫуллӑха тара илнӗ, сезон вӗҫӗнче унӑн 3,5 млн евро тӳлесе «Кальяринчен» унӑн контрактне туянмалла пулнӑ^[30]. 2017 ҫулта, клубран Гонсало Родригес кайнӑ хыҫҫӑн, Асторие команда капитанӗ туса хунӑ^[31]. 2018 ҫулхи нарӑсӑн 25-мӗшӗнче А ярӑмӑн 26-мӗш турӗнче «Кьево» хирӗҫ вырянӑ килти матч Асторишӗн юлашки пулса тӑнӑ. Ҫакна та палӑртмалла: ку вӑйӑра вӑл мечӗке питӗ вырӑнлӑ куҫарса парса палӑрнӑ^[32].

Тӗнчери шайӗнчи карьерине Давиде Итали сборнӑйӗпе 18 ҫулччен пуҫланӑ, 2004 ҫулта унпа вӑл 4 вӑйӑ ирттернӗ. 2010 ҫулхи ҫурлан 6-мӗшӗнче Асторине «Скуадры Адзурры» пӗрремӗш сборнӑйне Кот-д’Ивуарпа вылямалли матча чӗннӗ^[33], анчах та вӑйӑ уйне ӑна чӗнсе кӑларман^[34]. 2011 ҫулхи пушӑн 29-мӗшӗнче, Украина сборнӑйӗпе юлташла матч ирттернӗ вӑхӑтра, вӑл чи малтанхи хут сборнӑй ушкӑнра вылянӑ, 75-мӗш минутра ӑна вӑйӑ уйӗнчен чӗнсе илнӗ. 2013 ҫулхи ҫӗртмен 30-мӗшӗнче Конфедерацисен Кубокӗнче Уругвая хирӗҫ 3-мӗш вырӑншӑн тупӑшнӑ матчра сборнӑйшӑн выляса 24-мӗш минутра гол ҫапса кӗртнӗ^[7].

Астори 2018 ҫулхи пуш уйӑхӗн 4-мӗшӗнче Италири Удина хулинче 32 кайсан ҫывӑрнӑ вӑхӑтра вилнӗ. «Удинезепе» вӑйӑ ирттерес умӗн хӑна ҫурчӗн номерӗнче унӑн виллине тупнӑ^[35]. «Фиорентина» ҫыннисем вилӗм сӑлтавӗ пирки ыйтсан «вӑл сасартӑк чирлесе ӳкнӗ» тесе пӗлтернӗ^[36], чӑннипе вара, унӑн виллине касса пӑхса тӗпченӗ хыҫҫӑн вӑл брадиаритмине (пӗр минутра чӗре 60-тан сахалран тапни) пула пурнӑҫран уйрӑлни паллӑ пулса тӑнӑ^[6].

Асторине пушӑн 8-мӗшӗнче пытарнӑ^[37]. Сывпуллашу церемонийӗнче «Фиорентинӑн» 7 пин болельщикӗ, ҫавӑн пекех ытти клубсен ҫыннисем те пулнӑ^[38]. «Фиорентинӑпа» «Кальяри» клубсем вылякансене номер панӑ чухне футболист вылянӑ 13-мӗш номере ыттисене памасӑр тытса тӑма калаҫса татӑлнӑ^[39].

Астори авланнӑ пулнӑ. Мӑшӑрӗ — Франческа Фиоретти, модель пулса ӗҫлекенскер^[40]. Хӗрӗ — Виттория, Давиде вилнӗ вӑхӑтра вӑл 2 ҫулта пулнӑ^[41].

Мӑшӑрӗпе Астори 2013 ҫулта паллашнӑ. Франческа Маддалони хулинче ҫуралнӑ, анчах та вӗсем иккӗшӗ паллашнӑ вӑхӑтра вӑл Марано-ди-Наполире пурӑннӑ. Франческа модель пулса ӗҫленӗ, ҫавӑн пекех «Аслӑ Пичче» тата «Пекин Экспресӗ» реалити-шоуна хутшӑннӑ пулнӑ^[42].

Футболсӑр пуҫне, Астори ҫавӑн пекех архитектурӑпа тата дизайнпа вӑйлӑ кӑсӑкланнӑ пулнӑ. Спорт карьерине вӗҫленӗ хыҫҫӑн вӑл ҫак сферӑсенче вӑй хума планланӑ^[43].