Димитриев Николай Владимирович

Николай Владимирович Димитриев 1946 ҫулхи авӑнӑн 22-мӗшӗнче Чӑваш АССРти Тӑвай районӗнчи Тӑрмӑш ялӗнче ҫуралнӑ^[1]. Ачаранпах художество самодеятельноҫне хутшӑннӑ, шкулти тата ялти хорсен солисчӗ пулнӑ^[2].

1963—1966 ҫулсенче Ф. П. Павлов ячӗллӗ Шупашкарти музыка училищинче вӗреннӗ. Вӗреннӗ вӑхӑтрах, 1964 ҫултанпа, Чӑваш патшалӑх юрӑпа ташӑ ансамблӗнче ӗҫлеме тытӑннӑ. Кӗҫех ансамблӗн ертсе пыракан солисчӗ пулса тӑнӑ^[1]. Унӑн репертуарне вырӑс, чӑваш халӑх тата эстрада юррисем кӗнӗ, анчах та вӑл чӑвашсен шӳтлӗ юррисене юрласа уйрӑмах палӑрнӑ^[2].

Ансамбль йышӗнче пӗтӗм Совет Союзӗпе, ҫавӑн пекех ют ҫӗршывсенче — Чехословакире, Польшӑра, Италире, ГДРта, ФРГра, Бельгире, Францире, Португалире тата Испанире гастрольсенче пулнӑ^[1][2].

Николай Димитриев Чӑваш патшалӑх академи юрӑпа ташӑ ансамблӗнче 42 ҫул ӗҫленӗ. 2006 ҫулта тивӗҫлӗ канӑва тухнӑ, анчах та пултарулӑх ӗҫне малалла тӑснӑ.

2026 ҫулхи кӑрлач уйӑхӗнче вилнӗ^[2].

• Чӑваш АССР тава тивӗҫлӗ артисчӗ (1981)^[1][2];
• Чӑваш АССР халӑх артисчӗ (1990)^[1][2];
• «Ял тӑрӑхӗнчи культура шефствин отличникӗ» кӑкӑр палли (1980);
• «Ӗҫ ветеранӗ» медаль (1990);
• Раҫҫейӗн, Чӑваш Республикин, Тутарстанӑн тата Пушкӑртстанӑн Культура министерствисен Хисеп хучӗсем.