Иванов Борис Карпович

1950 ҫулхи ҫурла уйӑхӗн 17-мӗшӗнче Чӑваш АССРӗн Етӗрне районӗнчи Анатри Ирҫе ялӗнче ҫуралнӑ. Ашшӗ — Иванов Карп Иванович — Етӗрне районӗн «Ӗҫ ялавӗ» хаҫачӗн фотокорреспонденчӗ пулнӑ. Амӑшӗ — Евгения Григорьевна — Борис тӑватӑ ҫул ытларах чухне ҫӗре кӗнӗ. Ачана Иванова Людмила Григорьевна ҫитӗнтернӗ, ӑна Борис тӑван амӑшне юратнӑ пекех юратнӑ.

Урпашри вӑтам шкултан (1967), И. Я. Яковлев ячӗллӗ Чӑваш патшалӑх педагогика институчӗн ӳнерпе графика факультетӗнчен (1973) вӗренсе тухнӑ.

1974—1975 ҫулсенче Совет Ҫарӗнче хӗсметре тӑнӑ. Хӗсмет вӑхӑтӗнче Ҫарсен Тӗп ушкӑнӗн «Советский солдат» хаҫатӗнче пичетленнӗ.

И. Я. Яковлев ячӗллӗ Чӑваш патшалӑх педагогика институтӗнче ӳнерҫӗ (1973—1974), Чӑваш АССР Министрсен Канашӗ ҫумӗнчи телевиденипе радиовещани комитечӗн фотокорреспонденчӗ (1974, 1975), «Советская Чувашия» хаҫат редакцийӗнче стенографист (1975—1981), фотокорреспондент (1981—1995) пулса вӑй хунӑ.

1996 ҫулхи кӑрлачӑн 2-мӗшӗнче Шупашкар хулинче вилнӗ.

«Чебоксарские новости» хаҫатпа, «Ялав», «Тӑван Атӑл» журналсемпе ҫыхӑну тытнӑ. Унӑн сӑнӳкерчӗкӗсем «Правда», «Советская Россия», «Комсомольская правда» тата ытти хаҫатсенче пичетленнӗ.

Пӗтӗм тӗнчери, Пӗтӗм Союзри тата республикӑри фотокуравсене хутшӑннӑ, Пӗтӗм тӗнче тата Пӗтӗм Союз шайӗнчи фотоконкурссен ҫӗнтерӳҫи тата дипломанчӗ пулнӑ.

• Пӗтӗм тӗнчери VIII «Ассофото-76» конкурсӑн дипломӗ («Икӗ сасӑпа» ӗҫӗшӗн);
• Пӗтӗм Союзри фотокуравӑн бронза медалӗ («Ӗҫ кунӗ хыҫҫӑн» ӗҫӗшӗн);
• Пӗтӗм тӗнчери «Интерпрессфото» куравӑн дипломӗ тата премийӗ («Ҫӑкӑр ҫумӑрӗ» ӗҫӗшӗн);
• Пӗтӗм Раҫҫейри «Кадр-80» конкурсӑн ылтӑн медалӗ («Ял арҫын ачисем» ӗҫӗшӗн).

• Чӑваш АССР Аслӑ Канашӗн Президиумӗн Хисеп хучӗ (1979),
• Чӑваш Республикин Журналистсен союзӗн Ҫемен Элкер ячӗллӗ премийӗн лауреачӗ (1995).

• Чӑваш Енри фотокорреспондентсен музейӗнче Б. Иванова халалланӑ кӗтес пур, музейра унӑн япалисем, ӗҫӗсем упранаҫҫӗ^[1].

• Ача чухнех ӳкерме юратнӑ, ҫавӑнпа та И. Я. Яковлев ячӗллӗ Чӑваш патшалӑх педагогика институчӗн ӳнерпе графика факультетне тӗллевлӗн кайнӑ.
• Шкултах фотоаппаратпа туслашнӑ пулсан та, ку ӗҫ ана малтанласа килӗшсех кайман.
• Хӑйӗн пӗрремӗш фотоаппаратне пӗрремӗш курс хыҫҫӑн стройотрядра ӗҫлесе илнӗ укҫапа туяннӑ^[2].
• Института Валентин Шемаров фотокорреспондент тӗлпулӑва килсен, Б. Иванов унпа паллашнӑ, кайран туслашнӑ та. В. Шемаров унӑн фотожурналистикӑри «хреснашшӗ» пулса тӑнӑ.
• Борис Иванов кинокамера та туяннӑ пулнӑ. Тӑван ялӗ, ял ҫыннисем ҫинчен кӗске киноочерк та ӳкернӗ. Ӑна халӑх ыйтнипе кашни киносеанс умӗн ҫавӑрттарнӑ.
• Унӑн питӗ хаҫатра ӗҫлес килнӗ, анчах «Советская Чувашия» хаҫатра ун чухне штатра вырӑн пулман, вара пултаруллӑ ҫамрӑк фотоӑстана стенографист должноҫне йышӑннӑ^[3].