Чӑваш Енри фотокорреспондентсен музейӗ

Чӑваш Енри фотокорреспондентсен музейӗ — Шупашкарти Пичет ҫуртӗнче (Иван Яковлев проспекчӗ, 13-мӗш ҫурт, 2-мӗш хут) вырнаҫнӑ, Чӑваш АССРӗнче ҫуралнӑ, ӗҫленӗ фотокорреспондентсен пурнӑҫӗпе ӗҫӗ-хӗлӗпе паллаштаракан музей.

Чӑваш Енри фотокорреспондентсен музейӗ^[1] — «Чӑваш Ен» издательствӑпа полиграфи комплексӗн музей комплексӗн пӗр пайӗ, тепри — Полиграфи музейӗ.

Музея никӗслекенӗ — Чӑваш Республикин тава тивӗҫлӗ культура ӗҫченӗ, республикӑри паллӑ фотоӳнерҫӗ, фотожурналист Журавлёв Сергей Витальевич.

Музейра 10 пин ытла япала упранать: фотоаппаратсем, фото кӑлармалли аппаратура, ӗлӗкхи фотоплёнкӑсем, сӑнӳкерчӗксем, кӗнекесем. Пурте вӗсем музейра каласа, кӑтартса панӑ фотокорреспондентсен япалисем е ӗҫӗсем. Пурте тенӗ пекех ӗҫлеҫҫӗ, юсавлӑ.

Чи «аслӑ» сӑнӳкерчӗк 1928 ҫулта тунӑскер, апла пулсан музейра Чӑваш Республикин ӗмӗрне сӑнлакан ӗҫсем упранаҫҫӗ.

Музейра Чӑваш Республикинче ҫуралнӑ е ӗҫленӗ 20 паллӑ фотокорреспондент ҫинчен харпӑр стендсем, вӗсен япалисене, ӗҫӗсене вырнаҫтарнӑ^[1]:

Костин Александр Александрович фотокорреспондентӑн «Зоркий» фотоаппарачӗ;
Паллӑ совет фотокорреспонденчӗ Халдей Евгений Ананьевич(выр.)чăв. (унӑн Егоровпа Кантария Рейхстаг таррине Хӗрлӗ ялав ҫакнӑ саманта сӑнланӑ ӳкерчӗкне пурте пӗлеҫҫӗ) хӑй алӑ пуснӑ «Антология советской фотографии» кӗнеке;
Георгий Александрович Костинӑн Тӑван Ҫӗршывӑн Аслӑ вӑрҫи умӗнхи докуменчӗсем;
Пӗтӗм тӗнчери «World Press Photo» конкурсра(выр.)чăв. «Ылтӑн куҫ» парнене 5 хутчен ҫӗнсе илнӗ Васильев Сергей Григорьевич фотоӑстан «Зенит ЕТ» фотоаппарачӗ;
Чӑваш Енри чи паллӑ фотокорреспондетсен пӗрлехи пысӑклатнӑ сӑнӳкерчӗкӗ
тата ытти те.

Музей икӗ хутчен «Общественное признание» конкурс лауреачӗ пулнӑ:

2019 ҫулта «Советская Чувашия» хаҫат ирттерне конкурсра,
2024 ҫулта Шупашкар хула администрацийӗ Шупашкар 555 ҫул тултарнӑ тӗлне ирттернӗ конкурсра.

Чӑваш Енри фотокорреспондентсен музейӗн никӗслевҫине С. В. Журавлёва музей уҫнӑшӑн Чӑваш Республикин литературӑпа ӳнер енӗпе патшалӑх премине илме тӑратнӑ пулнӑ^[2].