Мальцев Олег Геннадьевич
Мальцев Олег Геннадьевич (ҫур. 1960 ҫулхи юпан 14-мӗшӗ, Комсомольски, Комсомольски районӗ, Чăваш Автономиллĕ Социализмлă Совет Республики, Раççей Федерациллĕ Социализмлă Совет Республики, СССР) — журналист, Раҫҫей Журналистсен союзӗн пайташӗ (1999), Чӑваш Республикин тава тивӗҫлӗ культура ӗҫченӗ (2020).
Пурнӑҫӗпе ӗҫӗ-хӗлӗ
1960 ҫулхи юпа уйӑхӗн 14-мӗшӗнче Чӑваш АССРӗн Комсомольски районӗнчи Комсомольски ялӗнче ҫуралнӑ.
Унӑн ашшӗ — Мальцев Геннадий Степанович (Кенеш Мучи) — паллӑ чӑваш журналисчӗ тата ҫыравҫи[1]. Амӑшӗ — Людмила Захаровна — Вӑрнарти ялхуҫалӑх техникумне пӗтернӗскер, хӑйӗн профессийӗпе ӗҫлеймен, малтан ҫар комиссариатӗнче, унтан Шупашкарти промышленность тракторӗсен заводӗнче вӑй хунӑ.
Кӳкеҫри вӑтам шкула вӗренсе пӗтернӗ хыҫҫӑн салтака кайнӑ, 1978—1980 ҫулсенче Совет Ҫарӗнче хӗсметре тӑнӑ. Ӗпхӳри 1-мӗш полиграфи училищинчен вӗренсе тухнӑ (1982). Училище хыҫҫӑн ВЛКСМ Тӗп Комитечӗн Владивостокри «Океан» пионерлагерӗнче (1983—1984), Приморье крайӗнчи фотоӳнер ӗҫӗсен пӗрлешӗвӗн Арсентьеври фотоучастокӗнче фотограф тата Яковлевка район центрӗнчи «Сельский труженник» хаҫат редакцийӗнче фотокорреспондент (1984—1985) пулса вӑй хунӑ. Унтан Чӑваш Ене таврӑнса «Чӑвашфото» пӗрлешӳре ӗҫленӗ (1986—1987).
Каллех Ҫурҫӗре ҫул тытнӑ: Анадырь райбыткомбинатра (Чукотка автономи округӗн Анадырь районӗнчи Угольные Копи посёлокӗнче) фотограф пулса ӗҫленӗ. 1987 ҫулта Чӑваш Ене таврӑннӑ. Шупашкарти 1-мӗш стройтрестӑн клубӗ ҫумӗнчи фотокружока ертсе пынӑ (1987—1991), Шупашкарти 5-мӗш стройтрест фотографӗ (1991—1995), Ҫӗнӗ Шупашкар хулинчи «Грани» хула хаҫачӗн фотокорреспонденчӗ (1995—1997) пулнӑ.
1997—2022 ҫулсенче республикӑри «Советская Чувашия» хаҫатра ӗҫленӗ.
Унӑн ӗҫӗсем Раҫҫейри тата республикӑри хаҫат-журналта пичетленнӗ. Мускаври тата Шупашкарти професси куравӗсене хутшӑннӑ[2].
Мӑшӑрӗ вилнӗ хыҫҫӑн Оренбург тӑрӑхне куҫса кайнӑ, 2022 ҫултанпа Оренбург хулинче пурӑнать.
Ҫемье
- Мӑшӑрӗ — Рушана. 2021 ҫулта ҫут тӗнчерен уйрӑлнӑ, Оренбург хулинче пытарнӑ.
- Вӗсем пӗр ывӑл — Валерий — ҫитӗнтернӗ.
Кӑсӑк самантсем
- Ашшӗ тӗрлӗ район хаҫачӗсенче, ҫав шутра Йӗпреҫ районӗн «Ҫӗнтерӳшӗн» хаҫачӗн тӗп редакторӗнче, Чӑваш АССРӗн Радиопа телевидени комитетӗнче, «Коммунизм ялавӗ» хаҫат, «Капкӑн» журнал редакцийӗсенче вӑй хунӑран, ҫемье тӑтӑш вырӑнтан вырӑна куҫса ҫӳренӗ, ҫавӑнпа та Олег ҫул ҫӳреме пит юратать — ҫӑмӑл ураллӑ.
- Ашшӗн «Мир» тата «Зорий» фотоаппарачӗсем 13-ри ачан куҫӗ тӗлне пулни унӑн пурнӑҫ ҫулне палӑртнӑ.
- Ӗпхӳре вӗреннӗ чухне диплом практикине Шупашкарти «Молодой коммунист» хаҫатра ирттернӗ, унӑн наставникӗ Иван Никифоров фотокорреспондент пулнӑ. Ун чухнех Вячеслав Романов, Борис Иванов («Советская Чувашия»), Юрий Дмитриев, Геннадий Михайлов («Коммунизм ялавӗ») фотокорреспондетсемпе паллашнӑ[2].
Хисепӗсем
- Чӑваш Республикин тава тивӗҫлӗ культура ӗҫченӗ (2020)[3];
- Раҫҫей Журналистсен союзӗн Хисеп хучӗ (2012);
- Чӑваш Республикинчи Журналистсен союзӗн Хисеп хучӗ;
- Чӑваш Республикин Патшалӑх Канашӗн Хисеп хучӗ (2005);
- Чӑвашпотребсоюзӑн Хисеп хучӗ (2000, 2002);
- Чӑваш Республикин Шалти ӗҫсен министерствин дипломӗ (2004);
- Пӗтӗм Раҫҫейри ҫӑмӑл атлетика федерацийӗн Тав хучӗ (2003);
- Пӗтӗм Раҫҫейри «Объективра — Росгварди» конкурсӑн призёрӗ[4].
Ӑнлантарусем
- ^ Мальцев, Геннадий Степанович (писатель; 10.02.1929-09.12.1991) (выр.). Наследие Чувашии. Национальная библиотека Чувашской Республики. Пӑхнӑ кун: 2026 ҫулхи пушӑн 2-мӗшӗ.
- ^ 1, 2 Автор и руководитель проекта С. В. Журавлёв. Фотокорреспонденты Чувашии. Биографии - Чӑваш Ен фотокорреспонденчӗсем. Вӗсен пурнӑҫ ҫулӗ. — Чебоксары: Чувашское книжное издательство, 2021. — Т. 1. — С. 209—220, 261. — 264 с. — ISBN 978-5-7670-3058-3.
- ^ О награждении государственными наградами Чувашской Республики (выр.). Официальный портал органов власти Чувашской Республики (4 ҫурлан 2020). Пӑхнӑ кун: 2026 ҫулхи пушӑн 2-мӗшӗ.
- ^ Фотокорреспондент газеты «Советская Чувашия» стал призером всероссийского конкурса Росгвардии (выр.). Федеральная служба войск национальной гвардии Российской Федерации (27 ҫӑвӑн 2020). Пӑхнӑ кун: 2026 ҫулхи пушӑн 2-мӗшӗ.
Вуламалли
- Автор и руководитель проекта В. П. Комиссаров. Энциклопедия чувашской журналистики и печати. — Региональная общественная организация «Союз журналистов Чувашской Республики», 2014. — Т. 1. — С. 254. — 559 с. — ISBN 978-5-7670-2156-7.
- Автор и руководитель проекта С. В. Журавлёв. Фотокорреспонденты Чувашии. Биографии - Чӑваш Ен фотокорреспонденчӗсем. Вӗсен пурнӑҫ ҫулӗ. — Чувашское книжное издательство, 2021. — Т. 1. — С. 209—220, 261. — 264 с. — ISBN 978-5-7670-3058-3.