Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Ирина Музыкантова

Музыкантова Ирина Анатольевна (ҫур. 1981 ҫулхи пушӑн 2-мӗшӗ, Шупашкар) — Раҫҫейри эстрада юрӑҫи тата ташӑҫи. Вӑл Чӑваш Республикинчи паллӑ культура ӗҫченӗсен хӗрӗ пулать.

Пурнӑҫӗ

Ирина Музыкантова 1981 ҫулхи пушӑн 2-мӗшӗнче Шупашкар хулинче ҫуралнӑ[1]. Вӑл пултарулӑх ҫемйинче ӳснӗ. Унӑн ашшӗ — Анатолий Музыкантов, РФ тава тивӗҫлӗ культура ӗҫченӗ тата «Сувар» халӑх ташӑ ансамблӗн балетмейстерӗ. Амӑшӗ — Валентина Музыкантова, Чӑваш Республикин халӑх артистки[2].

2006 ҫулта Ирина Хусанти патшалӑх культурӑпа ӳнер университечӗнчен вӗренсе тухнӑ. «Хореограф» специальноҫпе диплом илнӗ хыҫҫӑн вӑл хореографи тата вокал енӗпе хастар ӗҫлеме пуҫланӑ.

Пултарулӑх ӗҫӗ-хӗлӗ

2006 ҫултан пуҫласа 2016 ҫулччен Ирина Музыкантова «Суварята» ачасен халӑх ташӑ ансамблӗн ертӳҫи пулнӑ[1]. Вӑл ертсе пынипе ушкӑн нумай конкурс лауреачӗ пулса тӑнӑ. 2008 ҫултанпа вӑл эстрадӑра юрлама пуҫланӑ. Унӑн юррисем чӑваш эстрадинче паллӑ вырӑн йышӑнаҫҫӗ, чӑваш хит-парачӗсен ҫӳлти вырӑнсене йышӑннӑ.

2013 ҫулта Ҫеҫпӗл Мишши ячӗллӗ Ҫамрӑксен театрӗнче «Чӗрӗ сӑмах» спектакль лартнӑ. Ирина ку спектакле ташӑсене лартаканӗ пек хутшӑннӑ[3].

2014 ҫулта юрӑҫ Шупашкарта иртнӗ Олимпиадӑн факелне йӑтакансен эстафетине хутшӑннӑ[4].

2016 ҫулта вӑл качча кайнӑ та Мускава пурӑнма куҫнӑ[1].

Ирина хӑйӗн пултарулӑх ӗҫне малалла тӑсать. Вӑл ҫӗнӗ юрӑсем ҫыртарать, ҫаван пекех Мускаври тата Раҫҫейри ытти хуласенчи чӑваш ентешлӗхӗсен культура мероприятийӗсенче юрлать. Тӗслӗхрен, 2026 ҫулхи акан 24-мӗшӗнче вӑл Трактор тӑвакансен культура керменӗнче иртнӗ «Моя Россия» концерта хутшӑннӑ[5].

Кӑсӑкланӑвӗсем

Иринӑн чи юратнӑ вырӑнӗ — тӗпел. Вӑл тӗрлӗ апат-ҫимӗҫ пӗҫерме юратать.

Ҫавӑн пекех вӑл килсӗр чӗрчунсене пулӑшассипе кӑсӑкланать. 2015 ҫулта панӑ интервьюра килӗнче тӑватӑ кушак пулнине пӗлтернӗ. Вӗсене пурне те урамра тупнӑ. Ырӑ ҫын аллине пама киле илсе килнӗ те вӗсем ҫаплипех ун патӗнче пурӑнма юлнӑ[6].

Ҫемье

  • Ашшӗ — Анатолий Николаевич Музыкантов (1950 ҫ.ҫ.), хореограф.
  • Амӑшӗ — Валентина Владимировна Музыкантова (1954 ҫ.ҫ.), юрӑҫ.
  • Упӑшки — Петр, предприниматель, Мускав ҫынни. Вӑл унпа халӑх тетелӗ урлӑ паллашнӑ[1].

Премисемпе ҫитӗнӳсем

  • «Кӗмӗл сасӑ» республика фестивалӗн лауреачӗ, «Куракансем кӑмӑлланӑ юрӑҫ» номинаци (2010 ҫул).
  • Чӑваш Республикин Культура министерствин Хисеп хучӗсем.

Паллӑ юррисем

  • «Ҫунать чӗрем»;
  • «Ан кай»;
  • «Ташла манпа»;
  • «Эс манӑн»;
  • «Счастье».

Ӑнлантарусем

  1. ^ 1, 2, 3, 4 Елена Клементьева. Ирина Музыкантова: Хореограф пулмасан стилиста вĕренĕттĕм. Хыпар (4 акан 2018). Пӑхнӑ кун: 2026 ҫулхи ҫӑвӑн 22-мӗшӗ.
  2. ^ Елена Клементьева. Ирина Музыкантова Мускава кайĕ. Хыпар (13 юпан 2016). Пӑхнӑ кун: 2026 ҫулхи ҫӑвӑн 22-мӗшӗ.
  3. ^ Чулланнă чĕрене «Чĕрĕ Сăмах» витертĕр! | Хыпар. hypar.ru. Пӑхнӑ кун: 2026 ҫулхи ҫӑвӑн 22-мӗшӗ.
  4. ^ Шупашкарта паян уяв (выр.). Хыпар (27 раштавӑн 2013). Пӑхнӑ кун: 2026 ҫулхи ҫӑвӑн 22-мӗшӗ.
  5. ^ Народные ансамбли народного танца «Сувар» и «Суварята» представили праздничную программу «Моя Россия» (выр.). Министерство культуры, по делам национальностей и архивного дела Чувашской Республики (27 акан 2026). Пӑхнӑ кун: 2026 ҫулхи акан 27-мӗшӗ.
  6. ^ Ирина Музыкантова: «Самое любимое место в доме - кухня» (выр.). Прогород (25 ҫурлан 2015). Пӑхнӑ кун: 2026 ҫулхи ҫӑвӑн 22-мӗшӗ.

Категорисем