Миронов Борис Гурьевич

Вӑл 1960 ҫулхи раштавӑн 1-мӗшӗнче Чӑваш АССРӗн Тӑвай районӗнчи Енӗш Нӑрваш ялӗнче вӗрентекен ҫемьинче ҫуралнӑ. Ашшӗ — Миронов Гурий Миронович (1913—1994) — историпе географи вӗрентекенӗ, Тӑван Ҫӗршывӑн Аслӑ вӑрҫине хутшӑннӑ, Енӗш Нӑрваш вӑтам шкул директорӗ пулнӑ (1946—1956); амӑшӗ — Егорова Елизавета Егоровна (1920—2008).

1982 ҫулта вӑл И. Я. Яковлев ячӗллӗ Чӑваш патшалӑх педагогика институчӗн физика-математика факультетӗнчен пите лайӑх паллӑсемпе вӗренсе тухса «Математика тата физика» специальноҫе илнӗ. Кайран 1987 ҫулта И. Н. Ульянов ячӗллӗ Чӗмпӗр патшалӑх педагогика институчӗн математика анализӗн кафедринчен аспирантурӑра вӗренсе тухнӑ.

1987 ҫултанпа 1993 ҫулччен вӑл вӗрентекен, аслӑ вӗрентекен пулса ӗҫленӗ. 1993 ҫулта математика анализӗ кафедрин пуҫлӑхӗ пулса тӑнӑ. 2000 ҫултанпа 2011 ҫулччен вӗренӳ ӗҫӗсен проректорӗ пулнӑ.

2011 ҫулхи ҫӑвӑн 19-мӗшӗнче Раҫҫей Федерацийӗн вӗренӳ тата ӑслӑлӑх министерстви И. Я. Яковлев ячӗллӗ Чӑваш патшалӑх педагогика университетӗн пухӑвӗн йышӑнӑвӗпе килӗшӳллӗн Б. Г. Миронова университет ректорӗ пулма ҫирӗплетнӗ. Вӑл ҫак вырӑнта 2016 ҫулхи ҫу уйӑхӗччен ӗҫленӗ.

2016—2017 ҫулсенче Мускав патшалӑх гуманитари-экономика университечӗн филиалӗсен проректорӗ пулса ӗҫленӗ^[2].

2018 ҫулхи авӑнӑн 1-мӗшӗнчен пуҫласа вӑл Раҫҫей транспорчӗн университетӗнче (РУТ (МИИТ)) «Аслӑ математика тата ҫутҫанталӑк ӑслӑлӑхӗсем» кафедра пуҫлӑхӗ пулса ӗҫлет^[1].

1990 ҫулхи ака уйӑхӗнче вӑл В. И. Ульянов-Ленин ячӗллӗ Хусан патшалӑх университетӗнче физика-математика ӑслӑлӑхӗсен кандидачӗн степенне илме диссертаци хӳтӗленӗ. Ӑна «J-симметриллӗ операторӑн тулӑх мар облаҫпа анлӑлатасси» темӑпа хатӗрленӗ (ӑслӑлӑх ертӳҫи — А. В. Штраус).

2006 ҫулхи ҫӗртме уйӑхӗнче вӑл И. Я. Яковлев ячӗллӗ Чӑваш патшалӑх педагогика университетӗнче физика-математика ӑслӑлӑхӗсен докторӗ степенне илме диссертаци хӳтӗленӗ. Ӑна «Хытӑ деформациленекен кӗлеткесен чикӗллӗ лару-тӑрӑвӗн пӗтӗмӗшле теорийӗн хӑш-пӗр ыйтӑвӗсем» темӑпа хатӗрленӗ (ӑслӑлӑх консультанчӗ — Д. Д. Ивлев).

Унӑн ӑслӑлӑх тӗпчевӗсен облаҫӗ — кӗлеткесемпе конструкцисен чикӗллӗ лару-тӑрӑвӗн теорийӗ, анизотроплӑ кӗлеткесен идеаллӑ пластичноҫӗн математика теорийӗ, инволюциллӗ гильберт уҫлӑхӗнчи линиллӗ операторсен теорийӗ.

Вӑл тӗп курсене вӗрентет: «Математика анализӗ», «Дифференциаллӑ танлӑхсемпе харпӑр тӑхӑмлӑ танлӑхсем», «Чӑн улшӑнавлӑ функцисен теорийӗ», «Комплекслӑ улшӑнавлӑ функцисен теорийӗ», «Вероятноҫсен теорийӗ тата математика статистики».

Б. Г. Миронов 60 яхӑн ӑслӑлӑх тата вӗренӳпе методика ӗҫӗ пичетлесе кӑларнӑ. Вӑл ертсе пынипе 3 кандидат диссертацийӗ хатӗрленсе хӳтӗленнӗ, хальхи вӑхӑтра вӑл 4 аспирантӑн ӑслӑлӑх ертӳҫи пулса тӑрать.

Вӑл 01.02.04 — Хытӑ деформациленекен кӗлеткесен механики (физика-математика ӑслӑлӑхӗсем) специальноҫпе докторпа кандидат диссертацийӗсене хӳтӗлемелли пӗрлештернӗ Д 212.300.02 канашӑн председателӗ.

2024 ҫултанпа вӑл Тверь патшалӑх техника университечӗн базинче «Хытӑ деформациленекен кӗлеткесен механики» специальноҫ тӑрӑх 24.2.410.03 диссертаци канашӗн членӗ шутланать.

ЧПГУ ректорӗ пулнӑ май вӑл Раҫҫей ректорӗсен союзӗн йышне кӗнӗ. Чӑваш Республикин ВУЗ ректорӗсен канашӗн председателӗн ҫумӗ, Пӗтӗм Раҫҫейри педагогика пухӑвӗн Чӑваш регионти уйрӑмӗн Регион канашӗн председателӗ пулнӑ.

• «Пӗрлӗхлӗ Раҫҫей» парти членӗ.
• Пӗтӗм Раҫҫейри халӑх фрончӗн регионти координаци канашӗн членӗ пулнӑ.
• 2015 ҫулта Шупашкар хула Пухӑвне депутатсене суйлама тӑратас умӑн праймеризра кандидат пулса хутшӑннӑ^[3].

• «Раҫҫей Федерацийӗн аслӑ професси вӗренӗвӗн хисеплӗ ӗҫченӗ» кӑкӑр палли (2003).
• Чӑваш Республикин патшалӑх премийӗн лауреачӗ (ҫутҫанталӑк тата техника ӑслӑлӑхӗсен облаҫӗнче, 2006).
• Чӑваш Республикин вӗренӳ ӗҫӗн тава тивӗҫлӗ ӗҫченӗ (2010).

• Миронов Б. Г. Линеаризированные соотношения ассоциированного закона нагружения теории идеальной пластичности // Доклады Академии наук. 1999. — Т. 366. — № 6. — С. 766—767.
• Математика : Пособие для поступающих в вузы / Б. Г. Миронов; М-во образования Рос. Федерации. С.-Петерб. гос. техн. ун-т, Чебокс. ин-т экономики и менеджмента. — СПб. : Политехника, 2000. — 51 с. ISBN 5-7325-0583-0
• О соотношениях теории анизотропной идеально пластической среды // Известия Российской академии наук. Механика твердого тела. — 2005. — № 1
• О предельно статически определимом состоянии при отрыве // Доклады Российской академии наук. — 2006. — Т. 409. — № 2.
• Миронов Б. Г. Некоторые вопросы общей теории предельного состояния твердых деформируемых тел : диссертация … доктора физико-математических наук : 01.02.04. — Чебоксары, 2006. — 195 с.
• Кручение тел, находящихся под действием переменной внешней нагрузки : учебное пособие [для студентов старших курсов физико-математических специальностей] / Б. Г. Миронов, Л. С. Козлова ; М-во образования и науки Рос. Федерации, Чуваш. гос. пед. ун-т им. И. Я. Яковлева. — Чебоксары : ЧГПУ, 2011. — 51 с.
• Миронов Б. Г., Никитин А. В. Определение упругопластического положения плоскости из анизотропного материала, в котором имеется эллиптическое отверстие // Вестник ЧГПУ им. И. Я. Яковлева. Серия: Механика предельного состояния. — 2021.
• Миронов Б. Г., Миронов Ю. Б. О кручении стержней с трансляционной анизотропией при действии внешнего давления // Вестник ЧГПУ им. И. Я. Яковлева. Серия: Механика предельного состояния. — 2022.
• Миронов Б. Г., Миронов Ю. Б. К вопросу о кручении сектора кольца // Вестник ЧГПУ им. И. Я. Яковлева. Серия: Механика предельного состояния. — 2023.