Степанов Михаил Степанович (Ĕç Паттăрĕ)

1925 ҫулхи чӳкӗн 27-мӗшӗнче Хусан кӗпӗрнинчи Етӗрне уесӗнчи (халӗ Чӑваш Республикини Элӗк районӗ) Хитекушкӑнь ялӗнче ҫуралнӑ. Ашшӗ паллӑ кӑмака ӑсти пулнӑ, Михаил ачаранах унран ӑсталӑха вӗреннӗ.

Тавӑтри шкулта ҫичӗ класс вӗренсе пӗтерсен Элӗк районĕнчи «Сталинист» колхозра тимӗрҫӗ пулса ӗҫленӗ. Тӑван Ҫӗршывӑн Аслӑ вӑрҫине 1943–1945 ҫулсенче хутшӑннӑ.

1950 ҫулта ҫартан таврӑнсан Шупашкарти пир-авӑр комбинатне (ХБК) чул ӑсти пулса ӗҫе кӗнӗ. 1952 ҫулта Шупашкарти ҫурт-йӗр тӑвакан техникумран вӗренсе тухнӑ. 1957 ҫулта 1-мӗш стройтрестра хӑй вӑхӑтӗнче кая юлакан бригадӑна ертсе пыма тытӑннӑ та кӗске вӑхӑтра ӑна малта пыракансен йышне кӗртнӗ.

Степанов бригади 16 ҫул хушшинче республикӑри чи пысӑк промышленность объекчӗсене хӑпартнӑ: Шупашкарти ХБК, лентоткацкая тата чӑлха-трикотаж фабрикисене, агрегат тата приборсем тӑвакан савутсене, электровиҫев механизмӗсен тата приборсен савучӗсене. Вӑл Ҫӗнӗ Шупашкар хулине никӗслекенсенчен пӗри шутланать. Шупашкарпа Ҫӗнӗ Шупашкарти нумай хутлӑ ҫуртсене, шкулсене, пульницӑсене тата ача-пӑча учрежденийӗсене тунӑ ҫӗре пысӑк тӳпе хывнӑ.

Общество ӗҫне хастар хутшӑннӑ: КПСС Шупашкар горкомӗн тата Чӑваш обкомӗн пайташӗ пулнӑ. СССР Аслӑ Канашӗн депутачӗ (1958–1962), Шупашкар хула канашӗн депутачӗ пулса суйланнӑ.

1972 ҫултанпа «Оргтехстрой» тресчӗн тӗп инженерӗ тата технологӗ, 1982–1984 ҫулсенче 2-мӗш Стройтрестӑн тӗп технологӗн тивӗҫӗсене пурнӑҫланӑ. 1984–1994 ҫулсенче 18-мӗш профессипе техника училищинче маҫтӑр пулса ҫамрӑксене ӗҫе вӗрентнӗ.

2004 ҫулхи юпан 3-мӗшӗнче Шупашкарта вилнӗ.

• Социализмла Ӗҫ Паттӑрӗ (1966 ҫулхи ҫурлан 11-мӗшӗ);
• «Ҫурлапа Мӑлатук» ылтӑн медаль (1966);
• Ленин орденӗ (иккӗ хутчен: 1958, 1966);
• 2-мӗш степенлӗ Тӑван Ҫӗршыв вӑрҫин орденӗ (1985);
• Раҫҫей Федерацин тава тивӗҫлӗ строителӗ (1986);
• ЧАССР тава тивӗҫлӗ строителӗ (1961);
• ЧАССР тава тивӗҫлӗ ҫамрӑксен наставникӗ;
• 1967 ҫулхи юпан 26-мӗшӗнче ЧАССР Ӗҫ Мухтавӗпе Паттӑрлӑх Хисеп кӗнекине ҫырса хунӑ.

• Хыпар
• Биографи