Хмелева Эльвира Николаевна

1963 ҫулхи юпа уйӑхӗн 17-мӗшӗнче Чӑваш АССРӗнчи Ҫӗмӗрле районӗнчи Ҫӗнкас ялӗнче ҫуралнӑ. Ҫӗмӗрле районӗнчи Тӑванкасси вӑтам шкулӗнче вӗреннӗ. 1985 ҫулта И. Н. Ульянов ячӗллӗ Чӑваш патшалӑх университечӗн историпе филологи факультетӗнчен «филологи» специальноҫпа вӗренсе тухнӑ. Хыҫҫӑнах Ҫӗмӗрле хулинчи 1-мӗш вӑтам шкулта вырӑс чӗлхипе литературин учителӗ пулса ӗҫлеме пуҫланӑ. 1988—1992 ҫулсенче Шупашкар хулинчи 106-мӗш ясли-садра воспитательте, 1993—1996 ҫулсенче – Шупашкар хулинчи 47-мӗш вӑтам шкулта вырӑс чӗлхипе литературин учителӗнче ӗҫленӗ. 1996—2000 ҫулсенче Шупашкар хулинче тухса тӑнӑ «Бизнес среда» хаҫатра корреспондент тата редактор, 2001—2007 ҫулсенче Чӑваш Республикин Финанс министерствин пресс-секретарӗ пулнӑ.

2008 ҫулхи пуш уйӑхӗнчен пуҫласа Чӑваш Республикин Патшалӑх Канашӗн «Республика» хаҫатӗнче ӗҫлет^[1]. Нумай ҫул хаҫатӑн политика тишкерӳҫи шутланать. Унӑн компетенцийӗнче — республикӑн политикӑпа экономика пурнӑҫне, ҫавӑн пекех Чӑваш Республикин Патшалӑх Канашӗн саккун кӑларас ӗҫ-хӗлне тишкересси. Уйрӑм темӑсене пахалӑхлӑ ҫутатнӑшӑн чылай дипломпа Хисеп грамотине тивӗҫнӗ:

• 2009 ҫулта — Пӗтӗм Раҫҫейри журналистсен «Раҫҫейӗн экономика чӗрӗлӗвӗ» конкурсӗн регионти тапхӑрӗнче чи лайӑх публикацисемшӗн Чӑваш Республикин Суту-илӳпе промышленноҫ палатин дипломне,
• 2016 ҫулта – Пӗтӗм Раҫҫейри «2016 ҫулхи ялхуҫалӑх ҫыравӗ» темӑна ҫутатса чи лайӑх пултарулӑх материалӗшӗн Раҫҫей Федерацийӗн патшалӑх статистика службин Чӑваш Республикинчи территори органӗн дипломне,
• 2017 ҫулта – «Гражданла пуҫару» номинацире чи лайӑх пичет ӗҫӗшӗн Чӑваш Республикин Общество палатин дипломне.

• Чӑваш Республикин Патшалӑх Канашӗн Хисеп грамоти (2016);
• Чӑваш Республикин Пуҫлӑхӗн Тав ҫырӑвӗ (2018);
• Чӑваш Республикин Цифра аталанӑвӗн, информаци политикин тата массӑллӑ коммуникацисен министерствин Хисеп хучӗ (2021);
• Чӑваш Республикин тава тивӗҫлӗ культура ӗҫченӗ^[2] (2023);
• «Ӗҫ ветеранӗ» медаль^[3] (2024).