Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Буркин Михаил Иванович

Михаил Иванович Буркин (1912 ҫулхи нарӑсӑн 10-мӗшӗ, Мускав — 2001 ҫулхи кӑрлачӑн 10-мӗшӗ, Самар) — совет саманин мина-торпеда авиацийӗн лётчикӗ, Тӑван Ҫӗршывӑн Аслӑ тата совет-япон вӑрҫисене хутшӑннӑскер, Совет Союзӗн Паттӑрӗ (1945). Авиаци генерал-майорӗ (27.01.1951).

Пурнӑҫӗ

1912 ҫулхи нарӑсӑн 10-мӗшӗнче Мускавра ҫуралнӑ[1]. 1935 ҫултанпа — Тинӗс-Ҫар флотӗнче. 1936 ҫулта И. В. Сталин ячӗллӗ Ейскри тинӗс лётчикӗсен училищине вӗренсе пӗтернӗ. Лӑпкӑ океан тата Хура тинӗс флочӗсенче хӗсметре тӑнӑ. 1939 ҫултанпа ВКП(б) пайташӗ.

1941 ҫултанпа Тӑван Ҫӗршывӑн Аслӑ вӑрҫинче. 1944 ҫулхи нарӑс уйӑхӗнче ӑна 5-мӗш гварди мина-торпеда авиаци полкӗн командирне лартнӑ. Вӑл ертсе пынипе полк лётчикӗсем 688 хут ҫар вӗҫевне вӗҫнӗ. Румынири объектсене бомбӑланӑ, Севастополь хулине хӳтӗленӗ, Кавказшӑн пыракан ҫапӑҫӑва, Крым тата Яссы-Кишинев тапӑну операцисене хутшӑннӑ. 1942—1944 ҫулсенче М. И. Буркин Ил-4 самолётпа 88 хут ҫапӑҫӑва вӗҫсе тухнӑ[2].

1944 ҫулхи чӳк уйӑхӗнче М. И. Буркина каллех Лӑпкӑ океан флотне куҫарнӑ, 52-мӗш мина-торпеда авиаци полкӗн командирӗ пулма хушнӑ. 1945 ҫулхи ҫурла уйӑхӗнче советсемпе яппунсем хушшинчи вӑрҫа хутшӑннӑ. Буркин Михаил подполковник ертсе пыракан полк Японин портри объекчӗсене (Сейсин, Расин) аркатнӑ, пӗр ҫухату та тӳсмен[3].[4]

СССР Аслӑ Канаш Президиумӗн 1945 ҫулхи авӑнӑн 14-мӗшӗнчи Хушӑвӗпе, яппун милитарисчӗсене хирӗҫле ҫапӑҫу фронтӗнче командованин ҫар заданийӗсене тӗслӗхлӗ пурнӑҫланӑшӑн тата паттӑрлӑх кӑтартнӑшӑн Буркин Михаил Иванович подполковника Совет Союзӗн Паттӑрӗ хисеплӗ ят панӑ, Ленин орденӗпе тата «Ылтӑн Ҫӑлтӑр» медальпе (7138 №) чысланӑ.

Вӑрҫӑ хыҫҫӑн хӗсметре юлнӑ. Авиаци дивизийӗсене ертсе пынӑ, 1949 ҫулта К. Е. Ворошилов ячӗллӗ Аслӑ ҫар академине вӗренсе пӗтернӗ. 1955—1958 ҫулсенче — Куйбышеври 12-мӗш Тинӗс-ҫар авиаци училищин пуҫлӑхӗ. 1958 ҫулхи раштавран Буркин М. И. генерал-майор — запасра.

Куйбышев (Самар) хулинче пурӑннӑ. Хулан хисеплӗ гражданӗ. 2001 ҫулхи кӑрлачӑн 10-мӗшӗнче вилнӗ. Самарти хула ҫӑвинче Паттӑрсен аллейӗнче пытарнӑ.

Хисепӗсем

Астӑвӑм

  • Паттӑр ятне Самарти 24-мӗш вӑтам шкула панӑ, ҫурт ҫинче асӑну хӑми вырнаҫтарнӑ, шкул музейӗнче экспозици пур[5].
  • Камчатка Крайӗнчи Елизово гарнизонӗнчи Паттӑрсен аллейӗнче бюст вырнаҫтарнӑ.
  • Тула хулинчи Паттӑрсен монуменчӗ ҫинче асӑну хӑми пур.
  • 2020 ҫулхи ҫӗртмен 22-мӗшӗнче Самарта мемориал хӑмине уҫнӑ[6].

Ӑнлантарусем

  1. ^ Буркин Михаил Иванович. Учётно-послужная картотека. Память народа. Пӑхнӑ кун: 2026 ҫулхи утӑн 8-мӗшӗ.
  2. ^ Наградной лист на награждение М. И. Буркина орденом Отечественной войны // ОБД «Память народа» , Wayback Machine çинчи 2021 ҫулхи юпан 25-мӗшӗнчи копийӗ.
  3. ^ Наградной лист на присвоение М. И. Буркину звания Героя Советского Союза // ОБД «Память народа».
  4. ^ 52-й минно-торпедный авиационный полк ВВС ВМФ. Авиаторы Второй мировой. Пӑхнӑ кун: 2026 ҫулхи утӑн 8-мӗшӗ.
  5. ^ Михаил Иванович Буркин. Экспозиция. Музей Самарской городской Думы. Пӑхнӑ кун: 2026 ҫулхи утӑн 8-мӗшӗ.
  6. ^ В Самаре открыли мемориальную доску Герою Советского Союза Михаилу Буркину. Samru.ru (22 ҫӗртмен 2020). Пӑхнӑ кун: 2026 ҫулхи утӑн 8-мӗшӗ.

Вуламалли

  • Герои Советского Союза: Краткий биографический словарь / Пред. ред. коллегии И. Н. Шкадов. — Воениздат, 1987. — Т. 1 /Абаев — Любичев/. — 100 000 экз. — ISBN отс., Рег. № в РКП 87-95382.
  • Лурье В. М. Адмиралы и генералы Военно-морского флота СССР (1946—1960). — Кучково поле, 2007. — 672 с. — 3000 экз. — ISBN 978-5-9950-0009-9.
  • Бессмертен подвиг их высокий / Пред. ред. коллегии А. А. Елькин. — 2-е изд. — Приокское книжное издательство, 1983. — С. 101—102. — 646 с. — 10 000 экз.
  • День Победы. — Куйбышев, 1980. — 351 с. — С.23-41.
  • Золотые звезды тихоокеанцев. — Владивосток: Дальневосточное книжное издательство, 1982. — 384 с. — С.70-72.
  • Михайлов А. И. Герои Земли Самарской. — Самара, 2002. — 288 с.
  • Туляки — Герои Советского Союза. — Тула: Приокское книжное издательство, 1967. — 446 с.

Каҫӑсем

Темӑпа ҫыхӑннисем

Категорисем