Самойлова Юлия Олеговна

1989 ҫулхи ака уйӑхӗн 7-мӗшӗнче Коми АССРӗн Ухта(выр.)чăв. хулинче ҫуралнӑ. 11 уйӑхра 2-мӗш йышши «Спинальная мышечная атрофия» чир паллисем палӑрнӑ. 13 ҫулта диагноз тӗппипех ҫирӗпленнӗ. Ачаранах 1-мӗш ушкӑн инваличӗ шутланать. Инвалид кӳмипе куҫать^[6][7].

2010 ҫулта Самойлова Хальхи гуманитари академийӗн(выр.)чăв. психологи факультетӗнчен вӗренсе пӗтермесӗр кайма шутланӑ, диплом илеймен.

Самойлова мӗн пӗчӗкренех тӗрлӗ конкурссене хутшӑннӑ. 12 ҫулта Пионерсен ҫуртӗнче вокал енӗпе ӗҫлекен педагогпа аппаланма пуҫланӑ. Вун тӑватӑ ҫулта «Ӗмӗтсен ҫуначӗ ҫинче» музыка фестивалӗн лауреачӗ пулса тӑнӑ^[8].

2005 ҫулта Екатеринбургри «Шлягер» конкурса хутшӑннӑ, унта 2-мӗш вырӑн йышӑннӑ.

Йывӑр альтернативлӑ музыка жанрӗнче ӑсталӑхне туптанӑ. 2008 ҫулта «TerraNova» ушкӑна никӗсленӗ, вӑл 2010 ҫулччен пулнӑ.

2012 ҫулхи ҫурла уйӑхӗнче Самойлова «Пӗрремӗш каналта» иртекен талантсен вокал шоуне хутшӑнма заявка панӑ, анчах та хурав илеймен^[9].

2012 ҫулхи чӳк уйӑхӗнче «Раҫҫей-1» телеканал талантсен Алла Пугачёва проектне «Фактор А» музыка шоу-кӑларӑмӗн виҫҫӗмӗш сезонне хутшӑнакансене суйласа илнӗ. Самойлова Мускава вӗҫсе килнӗ, малтанхи суйлав витӗр иртнӗ. 2013 ҫулхи нарӑс уйӑхӗнчен пуҫласа ака уйӑхӗн 21-мӗшӗччен кӑтартнӑ шоура финала тухнӑ, унта «25 ҫулчченхи соло» категорире тупӑшнӑ. Куракансен сасӑлавӗн кӑтартӑвӗсем тӑрӑх иккӗмӗш вырӑн йышӑннӑ. Пугачёва ӑна хӑй «Аллӑн ылтӑн ҫӑлтӑрӗ» премипе палӑртнӑ^[10].

2014 ҫулхи нарӑсӑн 7-мӗшӗнче Сочире хӗллехи Паралимп вӑййисене уҫнӑ церемонире «Вместе» юрӑ шӑрантарнӑ^[11].

2014 ҫулта икӗ композици ҫырӑннӑ — «Лайт» (Юлия Самойлова сӑмахӗсемпе кӗвви), «Новый день» (сӑмахӗсем: Константин Арсенев, кӗвви: Александр Яковлев). Ҫавӑн пекех Гоша Куценкопа — «Комета» (сӑмахсемпе кӗвӗ: Гоша Куценко) — дуэт ҫырнӑ. Ҫак дуэт Гоша Куценкон иккӗмӗш альбомне кӗнӗ^[12].

2016 ҫул вӗҫӗнче Полина Гагарина, Григорий Лепс, Тимати(выр.)чăв. тата Мот(выр.)чăв. юрӑҫсемпе «#ЖИТЬ» юрӑ тата клип ҫыртарма хутшӑннӑ. Ҫавӑн пекех 2016 ҫулхи раштав уйӑхӗнче Гоша Куценкопа дуэт ҫырӑннӑ — «Не смотри назад»^[13].

2019 ҫулхи юпа уйӑхӗнче Юлия Самойловӑн пӗрремӗш харпӑр клипӗ «Лето» тухнӑ.

2021 ҫулхи акан 27-мӗшӗнче вырӑсла тата украинла «Белая Лилия» сингл макси релизӗ тухнӑ.

2021 ҫул хыҫҫӑн Самойлова никама пӑхӑнман артист пулса музыка карьерине малалла тӑснӑ, хӑй тӗллӗн ҫӗнӗ композицисем кӑларнӑ тата вӗсен прависене тытса тӑнӑ^[14][15]. Вӑл композитор пек те хастар ӗҫленӗ^[16]. 2022 ҫулта «Чувствую небо», «Yeah» тата «Шторм» синглсем тухнӑ^[17][18]. 2023 ҫулта юрӑҫ Алексей Таранпа «Чашка чая» дуэт тата «Без одежд» юррӑн ҫӗнӗ версине кӑларнӑ^[19]. 2024 ҫулта «Некуда бежать»^[20] тата «Спасибо тебеа, Иисус» синглсен релизӗ иртнӗ^[21][19].

2017 ҫулхи пуш уйӑхӗн 12-мӗшӗнче «Пӗрремӗш канал» Киевра иртекен «Еврокурав-2017»(выр.)чăв. конкурса хутшӑнма Юлия Самойловӑна «Flame Is Burning» юрӑпа суйласа илнӗ тесе пӗлтернӗ. «Пӗрремӗш канал» Раҫҫейрен хутшӑнакана суйласа илессипе ӗҫленӗ, мӗншӗн тесен Раҫҫейре конкурса кӑтартакан пулнӑ.

Самойловӑна суйлани Украинӑшӑн япӑх хыпар пулнӑ, мӗншӗн тесен Самойлова 2015 ҫулхи ҫӗртмен 27-мӗшӗнче Керчьре «Спорт тӗнчи тата ырӑлӑх» фестивалӗн гала-концертӗнче Украина влаҫӗсенчен ҫӗршыва кӗме ятарлӑ ирӗк илмесӗр килсе юрланӑ-мӗн^[22]. 2017 ҫулхи пушӑн 22-мӗшӗнче Украинӑн хӑрушсӑрлӑх служби Самойловӑна Украина территорине 3 ҫуллӑха кӗме чарни пирки йышӑну тунӑ^[23][24], ҫакӑ Раҫҫей юрӑҫи «Еврокурав-2017» конкурса хутшӑнманнине пӗлтернӗ; Европӑри вещани союзӗ ҫак кӑткӑс ыйтӑва йӗркелеме хӑтланни ӑнӑҫсӑр пулнӑ. Ҫапла вара 2017 ҫулта Раҫҫей конкурса юрӑҫ тӑратман^[25][26][27].

Юлия Самойлова хӑй ҫӑвӑн 9-мӗшӗнче Севастопольте Нахимов лапамӗнче йӗркеленӗ уяв концертӗнче юрланӑ^[28].

2018 ҫулхи пушӑн 11-мӗшӗнче «Пӗрремӗш канал» эфирӗнче Юлия Самойловӑн «I Won’t Break» юрӑ премьери иртнӗ, унпа вӑл «Еврокурав-2018»(выр.)чăв. юрӑ конкурсӗнче хутшӑннӑ. Композиципе Леонид Гуткин, Нэтта Нимроди тата Арье Бурштейн ӗҫленӗ^[29]. Видеоклип режиссёрӗ Алексей Голубев пулнӑ, вӑлах Лиссабонра юрӑҫӑн конкурс номерне лартаканӗ пулса тӑнӑ^[30]. Юрӑҫ иккӗмӗш ҫурма финалта юрланӑ, пӑлханнине пула юрӑ шӑрантарнӑ вӑхӑтра пӑтранса кайнӑ, анчах юрӑҫа бэк-вокалистсем хӑтарнӑ. 65 балл пухса 15-мӗш вырӑн йышӑннӑ, финала иртеймен.

• 2002 — «Кӗмӗл чӗрне — 2002» регион конкурсӗн лауреачӗ — I вырӑн. 13 ҫулчченхи ача-пӑча номинацийӗнче. Инта хули^[33].
• 2003 — «На крыльях мечты» Пӗтӗм Раҫҫейри фестиваль, Мускав хули^[34].
• 2003 — «Кӗмӗл чӗрне — 2003» регион конкурсӗн лауреачӗ — II вырӑн (14—18 ҫулхисем хушшинче), Инта хули.
• 2005 — 30 ҫулчченхи ӳсӗм ушкӑнӗнче регионсем хушшинчи уҫӑ «Ҫурхи тумлам» конкурс лауреачӗ — I вырӑн, тата куракансен парни, Муром хули.
• 2005 — Пӗтӗм Раҫҫейри «ШЛЯГЕР — 2005» конкурс лауреачӗ — 2 вырӑн, Екатеринбург хули^[35].
• 2006 — Пӗтӗм тӗнчери «Роза Ветров» конкурс-фестиваль — 1 вырӑн, Египет, Хургада хули.
• 2012—2013 — «Новая Ухта», Гран-при, Ухта хули.
• 2013 — «Фактор А» Пӗтӗм Раҫҫей телеконкурсӗ — 2 вырӑн, Мускав^[36].
• 2013 — «Аллӑн ылтӑн ҫӑлтӑрӗ» парне.
• 2014 — «Несломленная Нота» номинацире Елена Мухина ячӗллӗ V наци парни^[37].
• 2017 — Раҫҫей музыкине аталантарас ӗҫе пысӑк тӳпе хывнӑшӑн РАО, РСП, ВОИС тата Раҫҫейӗн Суту-илӳпе промышленность палатин парнисем^[38].
• 2018 — «Russian Music Box» преми^[39].

2021 ҫултанпа пурнӑҫра йывӑр тата вӑраха кайнӑ чирсемпе, ҫав шутра сайра тӗл пулакан (орфан) чирсемпе чирлекен «Круг добра» ачасене пулӑшакан фонд попечителӗ. Вӑл Раҫҫей Федерацийӗн Президенчӗн 2021 ҫулхи кӑрлачӑн 5-мӗшӗнчи фонд тӑвасси ҫинчен калакан хушӑвӗпе ҫирӗплетнӗ попечительсен канашӗн малтанхи йышне кӗнӗ^[40][41].

2025 ҫулхи юпа уйӑхӗнче Самойлова инвалидлӑхпа тата сывлӑх енчен хавшак пулнипе пурнӑҫлакансене тӗпе хунӑ ЗАОДНОМузыка музыка конкурсӗн жюри йышне кӗнӗ^[42].

2015 ҫултанпа Алексей Таран мусӑкҫӑпа мӑшӑрлӑ, вӑл унӑн администраторӗ пулса ӗҫлет^[43]. Джиган юрӑҫӑн мӑшӑрӗн — Оксана Самойловӑн — иккӗмӗш сыпӑкри пӗртӑванӗ шутланать^[44]. 2025 ҫул тӗлне уҫӑ ҫӑлкуҫсенче мӑшӑрӑн ача пурри пирки информаци ҫук, унччен мӑшӑр ача ҫуратас кӑмӑл пурри пирки асӑннӑ пулин те^[45].