Ҫатра-Хочахмат вӑтам шкулӗ

Шкула 1912 ҫулта Ҫатракасси ялӗнче икӗ класлӑ земство шкулӗ пек уҫнӑ. Шкулта ҫывӑхри ялсенчи — Сарапакасси, Пикшик, Мокшин — ачасем вӗреннӗ, пурӗ 58 ача пӗлӳ пухнӑ. Вӗрентӳ ӗҫне А.Санчуговӑпа М.Чинаева пурнӑҫланӑ, турӑ сакунне Мӑнал чиркӗвӗнчи А.Багильдинский дьякон вӗрентнӗ^[3].

1926 ҫулта тӑватӑ класлӑ шкул уҫӑлнӑ. 1930-мӗш ҫулсенче шкулта ултӑ ҫул вӗрентме пуҫланӑ, 1948 ҫулта вӑл ҫичӗ ҫул вӗренмелли шкул пулса тӑнӑ. 1961 ҫулта вӑл сакӑр ҫул вӗренмелли шкул пулса тӑнӑ, вӑтам шкул статусне 1989 ҫулхи авӑнӑн 1-мӗшӗнче тивӗҫнӗ^[4].

1981 ҫулта 320 ача вӗренмелӗх икӗ хутлӑ кирпӗч ҫурт хута янӑ.

1994 ҫулхи ҫу уйӑхӗн 17-мӗшӗнчен пуҫласа Пӗтӗмӗшле пӗлӳ паракан Ҫатра-Хочехмат вӑтам шкулӗ ятлӑ пулса тӑнӑ. Каярахпа ячӗ кӑна кӑшт улшӑнса пынӑ, анчах вӑл малалла та тулли вӑтам пӗлӳ панӑ.

• Алексеев Никон Алексеевич (1912— ?) — шкулта 1935 ҫулччен ӗҫленӗ.
• Амурцев Николай Фёдорович (1916—1963) — Тӑван Ҫӗршывӑн Аслӑ вӑрҫи хыҫҫӑн пуҫламӑш классен вӗрентекенӗ пулса ӗҫленӗ.
• Андреев Василий Игнатьевич (1903—?) — 1950–1953 ҫулсенче шкул директорӗ пулнӑ.
• Андреева Агрипина Андреевна (1923—?) — шкулта 1946–1991 ҫулсенче ачасене вӗрентнӗ.
• Афанасьев Прокопий Афанасьевич (1923—2003) — 34 ҫул хушши шкулта ӗҫленӗ.
• Богданов Иван Николаевич (1902—1943) — шкул директорӗ пулнӑ, Тӑван Ҫӗршывӑн Аслӑ вӑрҫине хутшӑнса пуҫне хунӑ.
• Васильев Федот Васильевич (1915—1985) — ку шкулта ачасене 1958–1973 ҫулсенче вӗрентнӗ.
• Вершинин Прокопий Данилович (1907—1980) — ачасене вӗрентнӗ, Тӑван Ҫӗршывӑн Аслӑ вӑрҫине хутшӑннӑ.
• Димитриева Наталия Вениаминовна (1960 ҫ.ҫ.) — шкул директорӗ пулнӑскер.
• Марков Юрий Егорович (1924—?) — 1948–1950 ҫулта пуҫламӑш классенче ачасене вӗретнӗ.
• Маринова Светлана Ивановна (1953 ҫ.ҫ.) — шкулта ачасене вӗрентнӗ, кайран шкул директорӗ пулнӑ.
• Михайлов Кесарий Михайлович (1922—1981) — ачасене шкулта 1940–1941, кайран вӑрҫӑран таврӑнсан 1946 ҫулччен вӗрентнӗ.
• Петрова Анастасия Захаровна (1925—?) — шкулта 1965—1980 ҫулсенче ӗҫленӗ.
• Тимофеева Галина Ивановна (1948 ҫ.ҫ.) — 1970–1971 ҫулсенче вӗрентнӗ.
• Скворцова (Назарова) Христина Назаровна (1910—2000) — 1970 ҫулччен ку шкулта вӗрентнӗ.
• Смирнов Иван Николаевич (1916—1979) — 1937—1938 ҫулсенче ачасене вӗрентнӗ.
• Фёдоров Михаил Никитич (1921—2009) — 1939–1942 ҫулсенче пуҫламӑш классенчи ачасене вӗрентнӗ.
• Шайманова Лидия Ильинична (1964 ҫ.ҫ.) — музыка вӗрентекенӗ, Раҫҫей Федерацийӗн пӗтӗмӗшле пӗлӳ панин хисеплӗ ӗҫченӗ.
• Шильдякова Нина Егоровна (1914—2001) — 1956–1970 ҫулсенче пуҫламӑш класри ачасене вӗрентнӗ.

• Виноградов (Прохоров) Амфиан Прохорович (1927—1985) — ШӖМ-ре ӗҫленӗскер.
• Жирнов Александр Алексеевич (1925—1995) — тракторист, Тӑван Ҫӗршывӑн Аслӑ вӑрҫине хутшӑннӑскер.
• Игнатьева Нина Захаровна (1939 ҫ.ҫ.) — колхозница, термист.
• Миронов Леонид Яковлевич (1952 ҫ.ҫ.) — милици полковникӗ.
• Михайлов Иван Михайлович (1946 ҫ.ҫ.) — лётчик.
• Петров Александр Петрович (1920—2003) — колхозник, Тӑван Ҫӗршывӑн Аслӑ вӑрҫине хутшӑннӑскер.
• Петров Юрий Алексеевич (1963 ҫ.ҫ.) — аслӑ следователь.
• Сергеев Виталий Петрович (1963 ҫ.ҫ.) — Афганистан вӑрҫине хутшӑннӑскер.

Шкулта спорт залӗ, стадион, вулавӑш (пурӗ 7570 кӗнеке) пур. Спорт залӗнче душевой, хывӑнса тӑхӑнмалли, тата тӗрлӗ спорт инвентарӗпе хатӗр-хӗтӗре упрамалли пӳлӗмсем пур^[5].

Шкулта пуҫламӑш классен тӑватӑ кабинечӗ, ҫавӑн пекех вырӑс чӗлхипе литературин, историпе географин, акӑлчан чӗлхи, математика (иккӗ), информатика, биологипе хими, физика тата технологи кабинечӗсем пур. Пӗтӗмӗшле 13 вӗренӳ кабинечӗ вырнаҫнӑ. Шкулӑн ноутбуксем, компьютерсем, принтерсемпе мультимедиа проекторӗсем пур^[5].

Шкулта вӗренекен ачасене вӗри апатпа тивӗҫтереҫҫӗ. Ку тӗлӗшпе «Атлашевски» агрофирма» тулли мар яваплӑхлӑ предприятипе килӗшӳ тунӑ^[6].