Бычков Игорь Иванович

1962 ҫултанпа Йошкар-Олара пурӑннӑ. Унтах 1968 ҫулта Николай Смола тата Анатолий Подойников тренерсем ертсе пынипе футболпа кӑсӑкланма тытӑннӑ. Вун ҫиччӗре чухне Йошкар-Олари СССР первенствин иккӗмӗш лигинче вылякан «Дружба» команда йышӗнче пӗрремӗш хут вылянӑ. 1976 ҫулта «Дружбӑн» аслӑ тренерӗ Александр Афонин Тренерсен аслӑ шкулне вӗренме кайнӑ та Мускавра Бычкова СССРӑн юниорсен пӗрлештернӗ командин тренерне Сергей Мосягина сӗннӗ. 1977 ҫулхи тӗнче чемпионачӗ хыҫҫӑн ЦСКна чӗнсе илнӗ. Икӗ ҫул хушшинче пурӗ 17 вӑйӑ кӑна ирттерсе армеецсен йышӗнче ҫирӗпленсе юлман. Сӑлтавсенчен пӗри тренерсем час-часах улшӑнни пулнӑ. Сӑмахран, Бычков Всеволод Бобров хӑйӗнпе лайӑх хутшӑннипе усӑ курнӑ, Олег Базилевич вара ӑна команда йышӗнче курман. 1980 ҫулта Бычкова тепӗр армеецсен командине сӗннӗ — Смоленскри пӗрремӗш лигӑра вылякан «Искра» командӑна. Офицер пулнӑ май вӑл ҫар клубӗсене пӑрахса каяйман, Мускаври «Локомотива» тата «Пахтакора» хирӗҫленӗ. Карьерӑна 1986 ҫулта вӗҫленӗ.

1977 ҫулхи нарӑс уйӑхӗнче Ташкента 20 ҫул тултарман спортсменсенчен тӑнӑ СССР командин вӗренӳпе тренировка сборне чӗннӗ^[3] . Кӗҫех Тунисри тӗнче чемпионатне хутшӑнма хатӗрленнӗ пӗрлештернӗ команда йышне кӗртнӗ. Бычкова тапӑнакан пек кӗртнӗ, ҫапах та ытларах чухне сулахай ҫурма хӳтӗлевҫӗ позицийӗнче вылянӑ. Турнирӑн пилӗк матчӗнче те вӑл старт йышӗнче тухнӑ, вӗсенчен виҫҫӗшне, ҫав шутра ҫурма финалпа финала, никампа ылмашӑнмасӑрах выляса пӗтернӗ. Уругвайӑн пӗрлештернӗ командине хирӗҫ ҫурма финалта вылянӑ чухне Бычков хӑйӗн ӑсталӑхӗпе ӑмӑртуҫӑсен лидерне Виктор Диогӑна нейтрализацилеме пултарнӑ, хӑй те темиҫе хӑрушӑ самант туса хунӑ. Совет команди 11 метрлӑ паллӑран тапса кӗртмелли серире ҫӗнтерсе финала тухнӑ. Ҫавнашкалах татӑклӑ матч вӗҫленнӗ, унта совет командин тупӑшуҫи Мексикӑн пӗрлештернӗ команди пулнӑ. Финал матчӗнче Бычков сулахай кӗтесе тапса кӗртсе хӑйӗн хӑтланӑвне пурнӑҫа кӗртнӗ (хапхаҫӑ тытас тесе ӗлкӗрнӗ пулин те мечӗк хапхаран вӗҫсе кӗнӗ)^[3]..

Чемпионат умӗн СССР Спорткомитечӗ ҫӗнтерсен кашни вылякана икшер пин доллар, вунӑ пин совет тенки тата «Жигули» автомобиль пама шантарнӑ. Анчах та чемпионат вӗҫленсен кашнине сакӑр ҫӗр совет тенки тивӗҫнӗ — юлнӑ укҫана тӗрлӗ ыр кӑмӑллӑх организацийӗсене паллӑ мар сӑлтавсене пула панӑ.

Пӗрлештернӗ команда йышӗнче иккӗмӗш лигӑн пӗртен-пӗр представителӗ пулнӑ. Команда СССРа таврӑнсан тӳрех ЦСКАна чӗнсе илнӗ.

Вӑйӑ карьерин профессинал тапхӑрӗ вӗҫленнӗ хыҫҫӑн Бычков Анӑҫ ҫар ушкӑнӗн командишӗн кӑмӑллакансен шайӗнче вылянӑ. Киле таврӑнсан вӑл хӑйӗн тусӗ тата пӗрлештернӗ командӑри партнёрӗ Александр Новиков автокатастрофӑра вилни ҫинчен пӗлнӗ, вӑл тӗнче чемпионатӗнче хапхаҫӑ пулнӑ. 1990 ҫулсенче ҫӗршыври йывӑр лару-тӑрӑва пула Игорь Ивановичӑн пасарта атӑ-пушмак сутма, шофёрта ӗҫлеме тивнӗ. Каярахпа вӑл футбола таврӑннӑ, Мускав ҫывӑхӗнчи «Химки» клубра, ҫав вӑхӑтра Раҫҫей первенствин аялти дивизионӗсенче тупӑшнӑскерте, ӗҫлеме тытӑннӑ. Ҫамрӑксемпе тата тӗп составпа тренировка ирттернӗ. 1998 ҫулхи авӑн уйӑхӗнче тивӗҫтермен кӑтартусене пула клубран тухса кайнӑ. Кӗҫех тухтӑрсем вӑл сипленми чирпе аптӑранине — сапаланчӑк склерозпа — тупса палӑртнӑ^[4] . Бычков I ушкӑн инваличӗ пулса тӑнӑ. Пурнӑҫӗн юлашки ҫулӗсенче консьерже пулса ӗҫленӗ.

2009 ҫулхи ҫӗртмен 8-мӗшӗнче нумай вӑхӑт хушши чирленӗ хыҫҫӑн вилнӗ.