Денисов Иван Яковлевич
Денисов Иван Яковлевич (1926 ҫулхи пушӑн 14-мӗшӗ, Шӑмалак, Елчĕк районĕ, Чăваш Автономиллĕ Социализмлă Совет Республики, Раççей Федерациллĕ Социализмлă Совет Республики, СССР — 2005 ҫулхи раштавӑн 8-мӗшӗ, Шӑмалак, Елчĕк районĕ, Чӑваш Республики — Чӑваш Ен, Раҫҫей Федерацийӗ) — хуҫалӑх ӗҫченӗ, Чӑваш АССРӗн тава тивӗҫлӗ ялхуҫалӑх ӗҫченӗ (1977), РСФСР тава тивӗҫлӗ ялхуҫалӑх ӗҫченӗ (1986), 1945 ҫулта милитаристла Японине хирӗҫ вӑрҫа хутшӑннӑ[1].
Пурнӑҫӗпе ӗҫӗ-хӗлӗ
1926 ҫулхи пуш уйӑхӗн 14-мӗшӗнче Чӑваш АССРӗн Патӑрьел уесӗнчи (халӗ Чӑваш Республикин Елчӗк муниципаллӑ округӗ) Шӑмалак ялӗнче ҫуралнӑ.
1943—1950 ҫулсенче Хӗрлӗ (Совет) Ҫарта хӗсметре тӑнӑ. 1966 ҫулта Чӑваш совпартшкулӗнчен тата 1974 ҫулта КПСС Тӗп комитечӗ ҫумӗнчи партин аслӑ шкулӗнчен вӗренсе тухнӑ.
1954—1960 ҫулсенче «2-мӗш пилӗкҫуллӑх», 1960-1990 ҫҫ. — «Слава» колхозсене тата 1994—2001 ҫҫ. — «Свобода» ялхуҫалӑх производство кооперативне ертсе пынӑ. Республикӑра чи малтан хуҫалӑх расчётне ӗҫе кӗртнӗ, уй-хирсене, фермӑсене тата ял хуҫалӑх производствин рентабельлӗхне пысӑк тухӑҫлӑх кӳнӗ, колхозниксен пурлӑхпа культура шайне ӳстернӗ[1].
И. Я. Денисов ертсе пынипе «Слава» колхоз правительствӑн пысӑк наградипе – Ӗҫлӗх Хӗрлӗ Ялав орденне – тивӗҫнӗ. 1987 ҫул пӗтӗмлетӗвӗпе хуҫалӑха районти 10 куҫса ҫӳрекен ялавран ҫиччӗшне панӑ. «Слава» колхоза опыт илме Раҫҫейри, Беларуҫри тата Украинӑри облаҫӗсен делегацийӗсем килсе ҫӳренӗ.
Вӑл ертӳҫӗ пулнӑ чухне колхозра ҫӗр ытла пысӑк объект тунӑ. Колхозниксем валли уйрӑм ҫуртсем, специалистсем валли сакӑр хваттерлӗ ҫурт туса лартнӑ. Хуҫалӑх шучӗпе ӗҫре кирлӗ ҫурт-хуралтӑ ҫеҫ мар, социаллӑ ҫурт-йӗр те нумай тунӑ: Лаш Таяпара – культура керменӗ, шкул, больница, ача пахчи, сакӑр хваттерлӗ ҫурт, Елчӗке каймалли ҫул; Шӑмалакра – шкул, ача пахчи, ҫыхӑну ҫурчӗ, перекет касси, аптека тата больница вырнаҫнӑ ҫурт, яла кӗрекен асфальт ҫул; Вӑрӑмхӑвара – шкул.
2005 ҫулхи раштавӑн 8-мӗшӗнче вилнӗ, тӑван ялӗнче пытарнӑ[1].
Хисепӗсем
- Чӑваш АССРӗн тава тивӗҫлӗ ялхуҫалӑх ӗҫченӗ (1977);
- РСФСР тава тивӗҫлӗ ялхуҫалӑх ӗҫченӗ (1986);
- Ленин орденӗ;
- Октябрь Революци орденӗ;
- Ӗҫлӗх Хӗрлӗ Ялав орденӗ;
- Тӑван Ҫӗршыв вӑрҫин орденӗ I степенӗ;
- медальсем.
Ҫемье
- Ашшӗ — Денисов Яков Степанович — Тӑван Ҫӗршывӑн Аслӑ вӑрҫинче пуҫ хунӑ, фронта кайиччен Шӑмалак ялӗнчи «Иккӗмӗш пилӗкҫуллӑх» колхоз председателе пулнӑ.
- Мӑшӑрӗ — Денисова Зинаида Капитоновна, Чӑваш Республикин сывлӑх сыхлавӗн тава тивӗҫлӗ ӗҫченӗ[2].
- Икӗ хӗр — Ольга тата Людмила, пӗр ывӑл — Сергей.
Аставӑм
- 2018 ҫулта Денисов И. Я. пурӑннӑ ҫурт ҫинче асӑну хӑми вырнаҫтарнӑ.
- 2026 ҫулхи пуш уйӑхӗн 13-мӗшӗнче Елчӗк районӗнчи Шӑмалак ялӗнче Денисов И. Я. ҫуралнаранпа 100 ҫул ситнине халалласа асӑну каҫӗ ирттернӗ.
Ӑнлантарусем
- ^ 1, 2, 3 А. М. Шорников. Денисов Иван Яковлевич (выр.). Чувашская энциклопедия. Чувашский государственный институт гуманитарных наук. Пӑхнӑ кун: 2026 ҫулхи пушӑн 10-мӗшӗ.
- ^ Краткая история Яльчикской центральной районной больницы (выр.). Яльчикская центральная районная больница. Пӑхнӑ кун: 2026 ҫулхи пушӑн 10-мӗшӗ.
Вуламалли
- Тимофеев, А. Ӑна аса илмен кун сайра / А. Тимофеев // Хыпар. — 2016. — 22 пуш/март. — С. 14 : сӑн ӳкерчӗк.
- Тимофеев, А. Канӑҫ мӗнне пӗлмен вӑл / А. Тимофеев // Елчӗк ен. — 2016. — 12 пуш. — С. 2 : сӑн ӳкерчӗк.
- Денисов Иван Яковлевич // Энциклопедия агропромышленного комплекса Чувашской Республики. — Чебоксары, 2017. — С. 153-154.
- Денисов Иван Яковлевич // Яльчикский район : краткая энцикл. — Чебоксары, 2007. — С. 101.
- Тимофеева, А. А. Иван Яковлевич Денисов: 1926-2005. Большому кораблю — большое плавание / А. А. Тимофеев // Работники сельского хозяйства. — Чебоксары, 2014. — С. 103-112 : фот.
- Шорников, А. М. Денисов Иван Яковлевич / А. М. Шорников // Чувашская энциклопедия. — Чебоксары, 2006. — Т. 1 : А-Е. — С. 496.