Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Крепков Пётр Егорович

Крепков Пётр Егорович (1890 ҫулхи ҫӗртмен 11-мӗшӗ, Кивĕ Тăваньял, Çĕпрел районĕ — 1918 ҫулхи ҫурлан 28-мӗшӗ, Йăлăм Патăръел, Чăваш Автономиллĕ Социализмлă Совет Республики) — чӑвашсен ҫар ӗҫченӗ, Пӗрремӗш Тӗнче тата Граждан вӑрҫисене хутшӑннӑскер. 1918 ҫулта Пăва уесӗн ҫар комиссарӗн ӗҫне пурнăҫланӑ. Шурӑ гвардеецсемпе Йăлăм Патăрьел ялӗ патӗнчи ҫапӑҫура пуҫне хунӑ[1].

Пурнӑҫӗ

Ҫурални тата пӗлӳ илни

1890 ҫулхи ҫӗртмен 11-мӗшӗнче Чӗмпӗр кӗпӗрнин Пăва уесӗнчи Кивӗ Тăваньял ялӗнче (халӗ Тутарстанӑн Ҫӗпрел районӗ) хресчен килйышӗнче ҫуралнӑ[1].

1906 ҫулта Хурӑнвар шкулӗнче вӗренсе тухнӑ, кайран ялти вӗрентекен ятне илме экзаменсене хатӗрленнӗ. 1909 ҫулта Чӗмпӗрти арҫын гимназийӗнче экстерн майпа экзаменсем тытса ялти вӗрентекен пулса тӑнӑ[2].

Вӗрентекен ӗҫӗ

1915 ҫулччен Патăрьел районӗнчи (халӗ Чӑваш Енре) Ишлӗ, Татмăш тата Катек ялӗсенчи шкулсенче вӗрентекен пулса ӗҫленӗ[1].

Пӗрремӗш Тӗнче вӑрҫине хутшӑнни

1915 ҫулта ӑна Раҫҫей император ҫарне чӗнсе илнӗ[1]. Кавказ фронтӗнче Осман империйӗпе ҫапӑҫнӑ. 1917 ҫулта Тифлисри прапорщиксен шкулӗнчен вӗренсе тухнӑ[2].

Граждан вӑрҫине хутшӑнни тата вилӗмӗ

1918 ҫулта тӑван енне таврӑннӑ та Кивӗ Катек ялӗнчи пуҫламӑш шкулта вӗрентекен пулса ӗҫленӗ. Ҫав ҫултах совет влаҫне йӗркелесе ҫирӗплетессине хутшӑннӑ. 1918 ҫулхи ҫӗртме уйӑхӗнче Пăва уесӗн Советсен съездӗнче уесӑн ӗҫ тӑвакан комитечӗн пайташне суйланӑ тата уесӑн ҫар комиссарӗ пулма лартнӑ[1][2].

1918 ҫулхи ҫурла уйӑхӗн вӗҫӗнче шурӑ гвардеецсем Йӗпреҫ — Шӑхран чукун ҫулне ярса илессишӗн тапӑнма пуҫланӑ. Вӗсене хирӗҫ Крепков ертсе пыракан отряд тухнӑ. Ушкӑн ытларах енӗпе чӑвашсенчен тӑнӑ. Вӑл Йăлăм Патăрьел ялӗ патӗнче вырнаҫнӑ.

Кунта йывӑр ҫапӑҫу иртнӗ. Крепков отрячӗ шурӑ гвардеецсене чарнӑ, анчах ҫапӑҫура комиссар хӑйӗн пуҫне хунӑ.

Ӑна Йăлăм Патăрьел патӗнчи пӗрлехи вил тӑпринче пытарнӑ[1].

Астӑвӑм

  • Чӑваш ҫыравҫи Николай Евдокимов Петр Крепков пурнӑҫӗпе паттӑрлӑхӗ ҫинчен «Крепков» повесть хайланӑ, 1964 ҫулта вӑл кӗнекен пичетленсе тухнӑ.
  • Петр Крепков ячӗпе Шупашкарта, Патăрьелте, Йăлăм Патăрьелте, Кивӗ Тăваньялта тата Татмăшра урамсем пур[2].
  • Петр Крепков ячӗпе Патăрьел районӗнчи ял хуҫалӑх предприятине ят панӑ[3].
  • Йăлăм Патăрьелӗнче пӗрлехи вил тӑпри ҫинче палӑк лартнӑ. Ун ҫинче ҫапла ҫырнӑ: «Совет влаҫне шурӑ гвардеецсенчен хӳтӗлеве 1918 ҫулта пуҫӗсене хунӑ П. Е. Крепков отрядӗнчи боецсене асӑнса».
  • Патăрьелти 7-мӗш професси училищин вӗренекенӗсем палӑка хӑйсен шефствине илнӗ[1].

Ӑнлантарусем

  1. ^ 1, 2, 3, 4, 5, 6, 7 Шефство над памятником (выр.). Батыревский район Чувашской Республики (архив) (18 ҫӑвӑн 2012). Пӑхнӑ кун: 2026 ҫулхи пушӑн 1-мӗшӗ.
  2. ^ 1, 2, 3, 4 Крепков Пётр Егорович (выр.). Чувашская энциклопедия. Пӑхнӑ кун: 2026 ҫулхи пушӑн 1-мӗшӗ.
  3. ^ История села Батырева и Батыревского района до 1917 года (выр.). Архивная версия сайта Батыревского района Чувашской Республики. Пӑхнӑ кун: 2026 ҫулхи пушӑн 1-мӗшӗ.

Категорисем