Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

И. Н. Ульянов ячӗллӗ Чӑваш патшалӑх университечӗ

И. Н. Ульянов ячĕллĕ Чăваш патшалăх университечĕ (выр. Чувашский государственный университет имени И. Н. Ульянова) — Чӑваш Республикин тӗп хулинче Шупашкарта вырнаҫнӑ Раҫҫейри патшалӑх классика университечӗ.

Университетӑн учредителӗ — Раҫҫей Федерацийӗн правительстви, унӑн полномочийӗсене Раҫҫей Федерацийӗн Ӑслӑлӑх тата аслӑ пӗлӳ министерстви пурнӑҫлать. Университетӑн Чӑваш Республикин Улатӑр хулинче филиал пур.

Кун-ҫулӗ

Шупашкарта патшалӑх университетне уҫас ыйтӑва Чӑваш автономлӑ облаҫӗн Революци комитечӗ тата Чӑваш автономлӑ облаҫӗн канашӗсен I съезчӗ 1920 ҫултах ҫӗкленӗ. 1958—1959 ҫулсенче те ҫак ыйту ҫӗкленнӗ, анчах та университета йӗркелесси кашнинчех тытӑнса тӑнӑ.

undefined

1967 ҫул тӗлне Шупашкарта виҫӗ аслӑ шкул ӗҫленӗ: И. Я. Яковлев ячӗллӗ Чӑваш патшалӑх педагогика институчӗ, Чӑваш ял хуҫалӑх институчӗ тата Мускав энергетика институчӗн Атӑлҫи филиалӗ.

Мускав энергетика институчӗн Атӑлҫи филиалӗн лаборатори бази, вӗренӳ ҫурчӗсем, студентсен общежитийӗсем, библиотека (фончӗ ҫӗр пин тома яхӑн) пулнӑ. Унта типографи, шутлав техникин лабораторийӗ, вӗренӳ мастерскойӗсем, диплом проекчӗсем валли кабинетсем те пулнӑ.

undefined

Виҫӗ аслӑ шкулсӑр пуҫне Шупашкарта икӗ ӑслӑлӑхпа тӗпчев институчӗ тата ытти ӑслӑлӑхпа производство тата культура учрежденийӗсем ӗҫленӗ. Вӗсенче нумай ӑслӑлӑхпа педагогика кадрӗсем пулнӑ.

1967—1990 ҫулсем

Чӑваш патшалӑх университетне СССР Министрсен Канашӗн 1967 ҫулхи пушӑн 17-мӗшӗнчи 796-мӗш тата РСФСР Министрсен Канашӗн 1967 ҫулхи ҫурлан 21-мӗшӗнчи 631-мӗш йышӑнӑвӗсемпе 1967 ҫулхи авӑнӑн 1-мӗшӗнче туса хунӑ[К. 1]. Университета Мускав энергетика институчӗн Атӑлҫи филиалӗпе И. Я. Яковлев ячӗллӗ Чӑваш патшалӑх педагогика институчӗн историпе филологи факультечӗн никӗсӗ ҫинче йӗркеленӗ[2].

Университет ректорне техника ӑслӑлӑхӗсен докторне С. Ф. Сайкин профессора лартнӑ. Наука енӗпе проректор С. А. Абруков профессор, вӗренӳ енӗпе проректор А. К. Аракелян пулнӑ. Пӗрремӗш ҫулта аслӑ шкулта ҫичӗ факультет пулнӑ: историпе филологи, медицина, пӗрлехи техника, хими, экономика, электротехника, промышленность электрификацийӗ тата строительство.

РСФСР Министрсен Канашӗн 1967 ҫулхи чӳкӗн 30-мӗшӗнчи 882-мӗш йышӑнӑвӗпе университета И. Н. Ульянов педагог ячӗ панӑ. Вӑл воспитанипе вӗрентӳ ӗҫӗ ҫине либерал-демократи позицисенчен пӑхнӑ, ачасене тӗрлӗ енлӗ пӗлӳ парассишӗн тӑрӑшнӑ. Пӗлӳ арҫын ачасемпе хӗрачасене, мӗнле нацирен пулнине тата пуянлӑхне пӑхмасӑр, пӗр тан тивмелле пулнӑ[3].

1967—1968 вӗренӳ ҫулӗнче электротехника тата промышленность электрификацийӗ факультечӗсенче 1300 ытла студент вӗреннӗ. Каҫхи тата куҫӑн мар факультетсенче (пӗрлехи техника факультетне шутласа) 3800 яхӑн студент вӗреннӗ. 200 яхӑн ҫын вӗрентнӗ, вӗсенчен 20-шӗ ӑслӑлӑх докторӗсемпе кандидачӗсем пулнӑ. Историпе филологи факультетӗнче 900 студент вӗреннӗ (вӗсенчен 350 яхӑн кусан мар уйрӑмра). Педагогсенчен 3 профессорпа 30 доцент пулнӑ.

1968—1969 вӗренӳ ҫулӗнче физика-математика факультетне уҫнӑ. Университетӑн сакӑр факультетӗнче 45 пӗрлехи наука тата специальность (профильлӗ) кафедри пулнӑ: тӗп наука (20 кафедра) тата специальность (25 кафедра) 15 специальнӑҫпа (23 специализаци) ҫамрӑк специалистсем хатӗрлесе кӑларнӑ. Пӗрлехи техника факультечӗн никӗсӗ ҫинче каярах машиностроени тата строительство факультечӗсем уҫӑлнӑ.

1981 ҫулхи утӑ уйӑхӗнче университет ректорӗ пулма П. А. Сидоров профессора лартнӑ. Вӑл ҫак должнӑҫе 1990 ҫулччен йышӑннӑ. Унӑн вӑхӑтӗнче Университет урамӗнче нумай хутлӑ вӗренӳ корпусӗсем тума пуҫланӑ.

1990—2010 ҫулсем

1990 ҫулхи раштав уйӑхӗнче университет ректорӗ пулма экономика ӑслӑлӑхӗсен докторне Л. П. Кураков профессора суйланӑ. Унӑн вӑхӑтӗнче университетӑн филиалӗсене, Чӑваш Республикин районӗсенче аслӑ шкулӑн представительствисем уҫнӑ.

undefined

1991 ҫулта университета пӗрремӗш 25 ют ҫӗршыв студенчӗсене йышӑннӑ.

1994 ҫулта университет ҫумӗнче гимнази-интернат ӗҫлеме пуҫланӑ. Унта Чӑваш Республикинчи ялсенчен конкурс тӑрӑх кӗнӗ шкул ачисем тулли пансионпа вӗреннӗ.

Гимназире 10-мӗшпе 11-мӗш классен программисене университетӑн профессор-преподаватель составӗ вӗрентнӗ.

2001 ҫултанпа университет пӗрлехи патшалӑх экзаменӗ (ЕГЭ) кӗртес экспериментра хутшӑннӑ[4].

2002—2004 ҫулсенче университет патшалӑх ятлӑ финанс обязательствисене кӗртес экспериментра та хутшӑннӑ.

2005 ҫулччен университетра ҫар кафедри ӗҫленӗ.

2010 ҫултанпа

Федераци пӗлӳ агентствин 2010 ҫулхи кӑрлачӑн 12-мӗшӗнчи приказӗпе ректор должнӑҫне В. Г. Агаков профессора ҫирӗплетнӗ.

2011 ҫулхи авӑнӑн 27-мӗшӗнче университетӑн попечитель канашне йӗркеленӗ. Унӑн пайташӗсем республика тата федераци шайӗнчи 28 предприяти, учреждени, министерство тата ведомство пуҫлӑхӗсем пулнӑ.

Раҫҫей Федерацийӗн Пӗлӳ тата наука министерствин 2013 ҫулхи раштавӑн 23-мӗшӗнчи приказӗпе ректора А. Ю. Александрова ҫирӗплетнӗ.

undefined

Университетӑн Улатӑрти филиалсӑр пуҫне Канаш хулинче тата Чӑваш Республикин Патӑрьел ялӗнче те филиалсем пулнӑ.

Ректорсем

  • Сайкин С. Ф. (1967—1981);
  • Сидоров П. А. (1981—1990);
  • Кураков Л. П. (1990—2010);
  • Агаков В. Г. (2010—2013);
  • Александров А. Ю. (2013 ҫулхи раштавӑн 23-мӗшӗнчен)[2].

Вӗренӳ тата наука-тӗпчев ӗҫӗ

Университет шутне 15 факультет, Улатӑр хулинчи филиал кӗрет. Унта Хушма пӗлӳ центрӗ пур. Ҫак центра хушма пӗлӳ парас, вӗренӳ ӗҫне тытса пырас, вӗренӳ процесне инноваци проекчӗсемпе моделӗсене кӗртес тӗллевпе йӗркеленӗ.

Университетра 150 яхӑн профессор, ӑслӑлӑх докторӗ тата 600 ытла доцент, ӑслӑлӑх кандидачӗ ӗҫлет.

Тӗнчери ҫыхӑнусен уйрӑмӗ ют ҫӗршывсенчи вӗренӳ заведенийӗсемпе ҫыхӑну тӑвать, преподавательсемпе студентсене тӗнче шайӗнче улӑштарса опыта сарас тата йышӑнас ӗҫе йӗркелет.

Университет ют ҫӗршыв студенчӗсемпе стажёрсем валли вӗренӳ программисене пурнӑҫлать.

Вӗренсе тухнӑ нумай студент университетӑн ординатуринче тата аспирантуринче вӗренӗве малалла тӑсать.

Ют ҫӗршыв студенчӗсен ҫавӑн пекех хӑйсен ҫӗршывӗсенче вырӑс чӗлхине вӗрентме хушма пӗлӳ илме май пур.

Факультетсемпе специальноҫсем

Аслӑ шкулта ҫак факультетсем пур: ют чӗлхесен; информатикӑпа шутлав техникин; ӳнерсен; историпе географи; машина тӑвас; медицина; радиоэлектроникӑпа автоматика; строительство; тытӑмлавпа социаллӑ технологийӗн; прикладлӑ математикӑн, физикӑпа информаци технологийӗн; химипе фармацевтика; экономика; энергетикӑпа электротехника; юридици; вырӑс тата чӑваш филологийӗпе журналистика.

Университетра 57 бакалавриат направленийӗпе, 27 специалист хатӗрлев программипе, 31 магистратура направленийӗпе вӗрентӳ пырать.

Наука-инноваци ӗҫӗ

Университетри наукӑпа инноваци ӗҫне Е. Н. Кадышев проректор ертсе пырать.

Диссертаци канашӗсем

Университетра ултӑ диссертаци канашӗ ӗҫлет:

  • Д 212. 301. 01: специальноҫсем: 08. 00. 01 — Экономика теорийӗ (экономика ӑслӑлӑхӗсем) тата 08. 00. 05 — Экономика тата халӑх хуҫалӑхне тытса пырасси (регион экономики) (экономика ӑслӑлӑхӗсем);
  • Д 212. 301. 02: специальноҫсем: 05. 09. 10 — Электротехнологи (техника ӑслӑлӑхӗсем), 05. 09. 12 — Вӑйӑмлӑ электроника (техника ӑслӑлӑхӗсем), 05. 14. 02 — Электричество станцийӗсем тата энергетика системисем (техника ӑслӑлӑхӗсем);
  • Д 212. 301. 03: специальноҫсем: 10. 01. 02 — Раҫҫей Федерацийӗн халӑхӗсен литератури (чӑваш, мари, коми) (филологи ӑслӑлӑхӗсем), 10. 02. 20 — Танлаштаруллӑ-историллӗ, типологиллӗ тата танлаштаруллӑ чӗлхе пӗлӗвӗ (филологи ӑслӑлӑхӗсем);
  • Д 212. 301. 04: специальноҫсем: 09. 00. 01 — Онтологи тата пӗлӳ теорийӗ (философи ӑслӑлӑхӗсем), 09. 00. 11 — Социаллӑ философи (философи ӑслӑлӑхӗсем);
  • Д 999. 173. 02: специальноҫсем: 07. 00. 02 — Тӑван Ҫӗршыв историйӗ (истори ӑслӑлӑхӗсем), 07. 00. 07 — Этнографи, этнологи, антропологи (истори ӑслӑлӑхӗсем);
  • Д 212. 301. 06: специальноҫсем: 05. 09. 01 — Электромеханика тата электричество аппарачӗсем (техника ӑслӑлӑхӗсем), 05. 09. 03 — Электротехника комплексӗсем тата системисем (техника ӑслӑлӑхӗсем).

Конференцисем

Ҫулсерен кӗркунне Шупашкарта Чӑваш патшалӑх университечӗн никӗсӗ ҫинче Ашмарин вулавӗсем ятлӑ пӗтӗм Раҫҫейри ӑслӑлӑх конференцийӗ иртет. Конференцин ятарлӑ ячӗ: «Наци филологийӗпе культура ыйтӑвӗсем».

Университет тытӑмӗ

Вӗренӳ корпусӗсем

Вӗренӳ корпусӗсем тӗпрен илсен Шупашкар хулин Ҫурҫӗр-Анӑҫ районӗнче вырнаҫнӑ. Строительство факультечӗн корпусӗ хула центрӗнчи историллӗ ҫуртра вырнаҫнӑ.

Студентсен хули

Студентсен хули Шупашкарӑн ҫурҫӗр-анӑҫ пайӗнче вырнаҫнӑ, вӑл сакӑр общежитие пӗрлештерет. Пурӗ 3000 ытла вырӑн. 2009 ҫулта университет Пӗтӗм Раҫҫейри чи лайӑх студент общежитийӗ конкурсӗнче «Студент общежитийӗ (студентсен хулинче) условийӗсенче медицина пулӑшӑвне чи лайӑх йӗркелени» номинацире ҫӗнтернӗ[5].

Ӑслӑлӑх библиотеки

Наука библиотекин кун-ҫулӗ 1958 ҫултанпа пуҫланать. Ун чухне вӑл А. А. Жданов ячӗллӗ Чулхула политехника институчӗн Шупашкарти филиалӗн библиотеки пулнӑ. Библиотека фондӗнче 1,91 млн экземпляр (2010 ҫулхи кӑрлачӑн 1-мӗшӗ тӗлне) тӗрлӗ кӑларӑм пур. Сайра кӗнекесен тата хаклӑ ҫырусен фондӗнче — 24 100 экземпляр. Наука библиотекин мультимедиа класӗнче университет преподавателӗсен монографийӗсен тата вӗренӳ пособийӗсен тулли текстлӑ электронлӑ копийӗсене вулама май пур[6].

Ӑслӑлӑхпа тӗпчев пайӗ

Университетӑн ӑслӑлӑхпа инноваци комплексӗн шутне кӗреҫҫӗ[2]:

  • проблемӑллӑ тата отрасльсен ӑслӑлӑхпа тӗпчев 24 лабораторийӗ;
  • 20 ӑслӑлӑхпа педагогика шкулӗ;
  • Университетра 6 проблемӑллӑ ӑслӑлӑхпа тӗпчев лабораторийӗ, 8 ӑслӑлӑхпа тӗпчев лабораторийӗ, 2 отрасль ӑслӑлӑхпа тӗпчев лабораторийӗ, 3 ӑслӑлӑхпа вӗренӳ лабораторийӗ, «Чӑваш ен» ӑслӑлӑхпа технологи паркӗ, пысӑк технологисен, ҫӗнӗ материалсен, ресурс- тата энергоперекет ӑслӑлӑхпа вӗренӳ тата инноваци комплексӗ;
  • «Нанотехнологи облаҫӗнче пӗрле усӑ куракан центр».

Музейсем

  • А. А. Кокель ячӗллӗ Ӳнер музейӗ;
  • И. Н. Ульяновпа И. Я. Яковлев музейӗ;
  • ЧПУ историйӗн музейӗ;
  • Ҫарпа ӗҫ мухтавӗн музейӗ;
  • археологипе этнографи музейӗ;
  • Тӑван Ҫӗршывӑн Аслӑ вӑрҫин историйӗн музейӗ;
  • анатоми музейӗ[2].

Культура керменӗ

Аслӑ шкулта Культура керменӗ ӗҫлет. Вӑл Чӑваш Республикин чи пысӑк залӗсенчен пӗри шутланать. Унта «Студентсен ҫуркунни» фестиваль, концертсем, ӑслӑлӑх конференцийӗсем, канашлусем иртеҫҫӗ[2].

ЧПУ издательстви

Университетӑн хӑйӗн издательстви пур. Вӑл пичет продукцийӗ кӑларать: «Ульяновец» хаҫат, ЧПУ тата Раҫҫейӗн ытти аслӑ шкулӗсен ӑсчахӗсен кӗнекисемпе брошюрисем[2].

Санатори-профилактори

Университет ҫумӗнче санатори-профилактори ӗҫлет. Ҫавӑн пекех спорт комплексӗ тата «Университет» спортпа кану лагерӗ пур[2].

Информаци политики

Чӑваш университечӗн вестникӗ

1995 ҫултанпа университет периодика кӑларӑмӗ — «Чӑваш университечӗн вестникӗ» ятлӑ наука журналӗ кӑларать[2].

Журнала икӗ серипе кӑлараҫҫӗ:

  • гуманитари ӑслӑлӑхӗсем (истори, философи, юриспруденци, экономика, лингвистика, литература пӗлӗвӗ, журналистика, педагогика, психологи тата ыттисем);
  • ҫутҫанталӑк тата техника ӑслӑлӑхӗсем (медицина, географи, математика, информатика, физика, хими, электротехника тата электроэнергетика, системӑсен теорийӗ, машина тӑвасси, автоматизациленӗ тытӑмлав системисем тата ыттисем).

2001 ҫултанпа журнала Раҫҫей Федерацийӗнче кӑларакан тӗп рецензиленекен ӑслӑлӑх журналӗсен тата кӑларӑмсен списокне кӗртнӗ, ку журналта доктор диссертацийӗсене хӳтӗлемелли тӗп наука ӗҫӗсене пичетлеме юрать.

Хаҫачӗсем

  • Университет 1968 ҫултанпа эрнере пӗрре тухакан «Ульяновец» хаҫат кӑларать[2].
  • Унсӑр пуҫне «Вести Альма-матер» хаҫат кӑлараҫҫӗ.

Сайт тата Интернет-сервиссем

ChuvSU.ru домен зонине иккӗмӗш тата виҫҫӗмӗш шайри домен ячӗсем кӗреҫҫӗ. Вӗсене Чӑваш патшалӑх университечӗн интернет-сервисӗсене палӑртма тата ӗҫлеттерме усӑ кураҫҫӗ. ChuvSU.ru домен ятне пӗрремӗш хут 1998 ҫулхи ҫу уйӑхӗн 13-мӗшӗнче регистрациленӗ. Хальхи вӑхӑтра ChuvSU.ru домен ятне Чӑваш патшалӑх университечӗ ҫине регистрациленӗ.

Информаци сервисӗсем университетӑн веб-сайчӗсем урлӑ справочник тата хыпар сервисӗсем парассипе ҫыхӑннӑ. Университетӑн веб-сайчӗсен системи www. ChuvSU. ru порталне, ChuvSU. ru ӑслӑлӑхпа техника электронлӑ библиотекин сайтне, Library. ChuvSU. ru ӑслӑлӑх библиотекин сайтне, факультетсен, филиалсен тата ытти структурӑри подразделенисен сайчӗсене пӗрлештерет. www. ChuvSU. ru порталӗ горизонталлӗ (политематикӑллӑ) пулать. Ӑна справочник информацийӗ парас тӗллевпе тунӑ. Унта университетӑн ытти сайчӗсем ҫине каҫӑсем пур.

Чӑваш патшалӑх университечӗн сайчӗсенчен ытларахӑшӗн адресӗнче хост www. ChuvSU. ru/ ҫырсан тильда тата сайт ячӗ лартаҫҫӗ (тӗслӗхрен, www. chuvsu. ru/~jornal — журналистика факультечӗн сайчӗ). Ҫакна сайтсене Debian GNU/Linux ҫинче вырнаҫтарнипе ҫыхӑнтарнӑ. Университетӑн хӑшпӗр сайчӗсем университетӑн мар веб-серверсенче вырнаҫнӑ. Вӗсен виҫҫӗмӗш шайри домен ячӗ пур (тӗслӗхрен, vt.chuvsu.ru — информатика тата шутлав техники факультечӗн сайчӗ). Журналистика факультечӗн тата финанс-экономика институчӗн сайчӗсем Joomla! ҫинче ӗҫлеҫҫӗ. Информатика тата шутлав техники факультечӗн сайчӗ валли Drupal суйласа илнӗ. Университетӑн хӑйӗн ChuvSU.ru почта серверӗ пур. Вӑл электронлӑ ҫырусене илессине тата ярассине тивӗҫтерет.

2011 ҫулта Наци тӗпчев университечӗ «Ӑслӑлӑхӑн аслӑ шкулӗ» «РИА Новости» агентствӑпа пӗрле Раҫҫей Федерацийӗн Пӗрлӗх палати хушнипе «Социаллӑ навигатор» проектӑн ҫаврӑнӑшӗнче Раҫҫей аслӑ шкулӗсен сайчӗсен уҫӑмлӑхне тӗрӗсленӗ[7]. Ҫак тӗрӗслев И. Н. Ульянов ячӗллӗ Чӑваш патшалӑх университечӗн официаллӑ сайтӗнче кӗрекенсем валли информацие мӗнле виҫепе панине хаклама май панӑ.

2011 ҫулта И. Н. Ульянов ячӗллӗ Чӑваш патшалӑх университечӗ бакалавриата/специалитета кӗрекенсем валли аслӑ шкул суйлама кирлӗ материалсем пуррипе чи ҫӳллӗ хак (135 балл) илнӗ. Магистратурӑна кӗрекенсем валли вӑл 35 баллпа аслӑ шкулсен иккӗмӗш ушкӑнне кӗнӗ.

Унсӑр пуҫне анлӑрах аудитори валли усӑллӑ материалсем пуррине те хакланӑ: аслӑ шкул преподавателӗсем ҫинчен, вӗренӳ программисемпе вӗренсе тухнӑ студентсем ҫинчен хыпарсем. Иккӗмӗш касӑвӑн результачӗсем тӑрӑх И. Н. Ульянов ячӗллӗ Чӑваш патшалӑх университечӗ 20 балл илнӗ[8].

Студентсем

Университетра Раҫҫей Федерацийӗн 40 ытла субъекчӗн студенчӗсем вӗренеҫҫӗ. Ҫавӗн пекех кунта ҫывӑх тата инҫет ют ҫӗршывсенчен студентсем пур: АПШран, Анӑҫ Европӑран, Ҫывӑх Тухӑҫран, Кӑнтӑр-Тухӑҫ Азирен, Африкӑран, Латин Америкӑран.

2015 ҫул тӗлне аслӑ професси пӗлӗвӗн 17 специальноҫӗ тӑрӑх 30 патшалӑхран 446 ют ҫӗршыв гражданинӗ университетӑн дипломне илнӗ.

2015—2016 вӗренӳ ҫулӗнче кунта Ази, Африка, Европа 40 патшалӑхӗнчен тата Пӑхӑнман Патшалӑхсен Пӗрлешӗвӗн 8 патшалӑхӗнчен 600 ытла гражданинӗ вӗреннӗ. Вӗсем 14 факультетра 20 специальноҫпа 15 хатӗрлев направленийӗ тӑрӑх вӗреннӗ.

Студент организацийӗсем

Студентсен ӑслӑлӑхпа техника пултарулӑхне аталантарма тата пулӑшма Студентсен ӑслӑлӑх обществи (СНО) ӗҫлет.

Аслӑ шкулӑн студентсен хӑйтытӑмлӑх органӗ пулса Студентсен канашӗ ӗҫлет. Вӑл куҫӑн вӗренӳ форминчи студентсене координацилекен орган пулать. Унӑн тӗллевӗ — вӗренекенсен вӗренӳ процесне тытса пырассине хутшӑнмалли прависене пурнӑҫласси, студентсен пурнӑҫӗн чи пӗлтерӗшлӗ ыйтӑвӗсене ҫӗклесси, вӗсен социаллӑ активлӑхне аталантарасси, социаллӑ пуҫарусене пулӑшасси тата пурнӑҫласси. Студентсен канашӗн председателӗ университетӑн Ӑслӑлӑх канашӗн шутне кӗрет.

Вӗренекенсен социаллӑ правилисене тивӗҫтерме И. Н. Ульянов ячӗллӗ Чӑваш патшалӑх университечӗн вӗренекенӗсен Пуҫламӑш профсоюз организацийӗ тӑрӑшать. Вӑл Раҫҫей Федерацийӗн Халӑх пӗлӗвӗпе наука ӗҫченӗсен профсоюзӗн шутне кӗрет. Ку организаци ыттисенчен аслӑ шкул санатори-профилакторине, санатори-курортпа сывлӑх ҫирӗплетӳ учрежденийӗсене путевкӑсем парать, экскурсисемпе ҫулҫӳревӗсем йӗркелет. Организацие 1970 ҫулхи кӑрлачӑн 23-мӗшӗнче никӗсленӗ. Вӑл хӑй тӗллӗн юридици органӗ шутланать. Организацин председателӗ университетӑн Ӑслӑлӑх канашӗн шутне кӗрет.

Студентсен мероприятийӗсем

Университетра йӑлана кӗнӗ студентсен культурӑллӑ-массӑллӑ мероприятийӗсем иртеҫҫӗ: «Мисс ЧПУ» илем конкурсӗ, «Суперстудент» конкурс, факультетсем хушшинчи КВН, «Студентсен ҫуркунни» фестиваль, факультетсем хушшинчи «Университет Татьяни» конкурс, «Ӗҫченсен ҫуралнӑ кунӗ» тата «Ҫӑлтӑр пул».

Символика

Университетӑн гербӗ[9], ялавӗ[10], гимнӗ[11], тавар палли[12] пур.

Университет гимнӗн чӑвашла тата вырӑсла варианчӗсен сӑмахӗсен авторӗ — Анатолий Смолин поэт. Музыки — Пётр Фёдоровӑн.

Университет гербӗпе ялавӗн авторӗ — Чӑваш Республикин халӑх художникӗ Элли Юрьев.

Ӑнлантарусем

  1. ^ Единый государственный реестр юридических лиц
  2. ^ 1, 2, 3, 4, 5, 6, 7, 8, 9 Сергеев Т. С. Чувашский государственный университет им. И.Н. Ульянова (выр.). Чувашская энциклопедия. Чувашский государственный институт гуманитарных наук. Пӑхнӑ кун: 2026 ҫулхи ҫӑвӑн 30-мӗшӗ.
  3. ^ Ульянов // Пысӑк Раҫҫей энциклопедийӗ : [в 35 т.] / гл. ред. Ю. С. Осипов. — М. : Большая российская энциклопедия, 2004—2017.
  4. ^ Приказ Минобразования РФ от 26.04.2001 № 1901 «О проведении эксперимента по введению единого государственного экзамена в Чувашской Республике»
  5. ^ Чувашский Государственный Университет. chuvsu.ru. Пӑхнӑ кун: 2026 ҫулхи ҫӑвӑн 30-мӗшӗ.
  6. ^ Научная библиотека Чувашского государственного университета. library.chuvsu.ru. Пӑхнӑ кун: 2026 ҫулхи ҫӑвӑн 30-мӗшӗ.
  7. ^ Рейтинг качества приема в российские вузы – 2010 (выр.). Национальный исследовательский университет «Высшая школа экономики». Пӑхнӑ кун: 2026 ҫулхи ҫӑвӑн 30-мӗшӗ.
  8. ^ Мониторинг качества приёма в вузы (выр.). ege.hse.ru. Пӑхнӑ кун: 2026 ҫулхи ҫӑвӑн 30-мӗшӗ.
  9. ^ Герб Чувашского госуниверситета (выр.). www.chuvsu.ru. Чувашский государственный университет им. И.Н. Ульянова. Пӑхнӑ кун: 2026 ҫулхи ҫӑвӑн 28-мӗшӗ.
  10. ^ Флаг Чувашского госуниверситета (выр.). www.chuvsu.ru. Чувашский государственный университет им. И.Н. Ульянова. Пӑхнӑ кун: 2026 ҫулхи ҫӑвӑн 28-мӗшӗ.
  11. ^ Гимн Чувашского госуниверситета (выр.). www.chuvsu.ru. Чувашский государственный университет им. И.Н. Ульянова. Пӑхнӑ кун: 2026 ҫулхи ҫӑвӑн 28-мӗшӗ.
  12. ^ Товарный знак Чувашского госуниверситета (выр.). www.chuvsu.ru. Чувашский государственный университет им. И.Н. Ульянова. Пӑхнӑ кун: 2026 ҫулхи ҫӑвӑн 28-мӗшӗ.

Комментарисем

  1. ^ СССР Аслӑ тата ятарлӑ вӑтам вӗрентӗвӗн министерствин 1967 ҫулхи авӑнӑн 5-мӗшӗнчи 574-мӗш тата РСФСР Аслӑ тата ятарлӑ вӑтам вӗрентӗвӗн министерствин 1967 ҫулхи ҫурлан 26-мӗшӗнчи 386-мӗш хушӑвӗсем.

Вуламалли

  • Сайкин С. Ф. Чувашский университет им. И. Н. Ульянова // БСЭ. 2-е изд. Т. 29. М., 1978;
  • Страницы истории высшей школы Чувашии. Ч., 1982;
  • «Учёные Чувашского университета (1967—1992)». — Чебоксары, 1992.
  • «Кто есть кто: учёные Чувашского государственного университета имени И. Н. Ульянова». — Чебоксары, 2002.
  • «Чувашский государственный университет имени И. Н. Ульянова: 40 лет». — Чебоксары, 2007.

Каçăсем

Темӑпа ҫыхӑннисем

п • с • т
Раççей классика университечĕсен ассоциацийĕ
Йĕркелекен пайташсем
Пайташсем

Категорисем