Кабалин Иван Андреевич

Чӑваш автономи облаҫӗнчи Ҫӗрпӳ уесӗнчи Александровка ялӗнче (халь Чӑваш Республикинчи Комсомольски районне кӗрет) рабочи ҫемьинче ҫуралнӑ. 7 класс пӗтернӗ. 1938 ҫулта шкултан вӗренсе тухсан ҫемйи Канаш хулине пурӑнма куҫнӑ. Канашри вакун юсакан заводра токарь пулса ӗҫленӗ.

Хӗрлӗ Ҫара Чӑваш АССР Канаш райвоенкомачӗ 1942 ҫулхи ҫу уйӑхӗнче чӗнсе илнӗ. Тӑван Ҫӗршывӑн Аслӑ вӑрҫин ҫапӑҫӑвӗсенче 1942 ҫулхи утӑ уйӑхӗнче пуҫласа кӗнӗ. Кӑнтӑр-Хӗвеланӑҫ тата 3-мӗш Украина фрончӗсенче ҫапӑҫнӑ. Курск ҫапӑҫӑвне, Харьковпа Украинӑри Днепрӑн сулахай ҫыран енне ирӗке кӑларнӑ ҫӗре хутшӑннӑ.

Иван Кабалин 1943 ҫулхи юпан 23-мӗшӗнче Днепрӑн сылтӑм ҫыранӗнчи плацдарма анлӑлатнӑ чухне тӑшманӑн контратакисене сире-сире янӗ май 250 ытла нимӗҫ салтакӗпе офицерне тӗп тунӑ, фашистсен пилӗк пулемётне аркатнӑ.

СССР Аслӑ Канашӗн Президиумӗн 1944 ҫулхи нарӑс уйӑхӗн 22-мӗшӗнчи Указӗпе Кабалин Иван Андреевич гварди сержантне ҫар командованийӗн хушӑвӗсене лайӑх пурнӑҫланӑшӑн, нимӗҫ фашисчӗсемпе ҫапӑҫнӑ чух паттӑрлӑхпа хӑюлӑх кӑтартнӑшӑн Совет Союзӗн Паттӑрӗ ятне панӑ, хисеплӗ ятпа пӗрле Ленин орденне тата «Ылтӑн Ҫӑлтӑр» медальне (№2527) тивӗҫнӗ.

Вӑрҫӑ хыҫҫӑн СССР Хӗҫпӑшаллӑ Вӑйӗсенче хӗсмете малалла тӑснӑ. 1955 ҫултанпа — саппасра. Куҫӑн мар мелӗпе 1956 ҫулта Улатӑрти чукун ҫул транспорчӗн техникумне, 1964 ҫулта Тбилисири чукун ҫул транспорчӗн институтне вӗренсе пӗтернӗ. Канашри вакун юсакан заводра токарь пулса ӗҫленӗ. Институт хыҫҫӑн Украина ССРӗнчи Черкасс облаҫӗнчи тата Карел АССРӗнчи предприятисенче инженерта вӑй хунӑ. 1969 ҫулхи ака уйӑхӗнчен — Канашри вакун юсакан заводра диспетчер ^[1]

1982 ҫулхи чӳкӗн 15-мӗшӗнче Канашра вилнӗ.

• Совет Союзӗн Паттӑрӗ^[2](22.02.1944);
• Ленин орденӗ;
• «Ылтӑн Ҫӑлтӑр» медаль;
• Тӑван Ҫӗршывӑн Аслӑ вӑрҫин 2 степеньлӗ орденӗ^[3] (25.02.1944);
• Хӗрлӗ Ялав орденӗ^[4] (13.02.1943);
• «1941—1945 ҫҫ. Тӑван Ҫӗршывӑн Аслӑ вӑрҫинче Германие ҫӗнтернӗшӗн» медаль^[5];
• медальсем.

• Унӑн ятне Чӑваш АССРӗн Ӗҫ мухтавӗн тата паттӑрлӑхӗн Хисеп кӗнекине кӗртнӗ^[6].
• Комсомольски салинче Кабалин И. А. бюстне вырнаҫтарнӑ, вӑл вӗреннӗ шкул ҫурчӗ ҫине — асӑну хӑми.
• Чӑваш Республикинчи Комсомольски салинче И. А. Кабалина халалласа урам (микрорайон) ятне панӑ.
• Канаш хулинче И. А. Кабалин ячӗпе лицей тата урам хисепленсе тӑраҫҫӗ.
• Канаш хулинче тӗп лапамра унӑн бюстне вырнаҫтарнӑ.
• Канашри И. А. Кабалин ячӗллӗ пӗтӗмӗшле пӗлӳ паракан вӑтам шкулта «Паттӑр партти» вырнаҫтарнӑ^[7].