Власова Роза Анатольевна

1973 ҫулхи ака уйӑхӗн 12-мӗшӗнче Чӑваш АССРӗнчи Красноармейски районӗнчи Вӑрманкас ялӗнче ҫуралнӑ. Красноармейски районӗнчи вӑтам шкулӗнчен веренсе тухнӑ (1990). Шкулта вӗреннӗ чухнех республикӑри ачасен «Пионер сасси» (халӗ — «Тантӑш») хаҫатпа ҫыхӑну тытнӑ, редакци ирттерекен конкурссене хутшӑнса пӗрре мар мала тухнӑ. Хаҫатӑн 1988 ҫулхи лауреачӗ. 1990 ҫулта 11-мӗш класс хӗрӗ «Ҫамрӑк журналист — 90» республика конкурсӗнче мала тухнӑ. 1990—1995 ҫулсенче И. Н. Ульянов ячӗллӗ Чӑваш патшалах университечӗн чӑваш филологийӗпе культура факультетӗнче вӗренсе «Чӑваш чӗлхипе литератури вӗрентекенӗ» специальноҫне (квалификацийӗ — «Филолог, чӑваш чӗлхипе литератури вӗрентекенӗ, журналист») алла илнӗ. Университетран вӗренсе тухсанах 1995 ҫулхи ҫурла уйӑхӗн 1-мӗшӗнчен «Хыпар» хаҫатра ӗҫлеме пуҫланӑ.

1995—1997 ҫулсенче вӗренӳпе наука пайӗн корреспонденчӗ пулнӑ. 1997 ҫулта «Хыпар» Издательство ҫурчӗн «Ҫамрӑксен хаҫачӗн» корреспондентне куҫарнӑ. 2004 ҫултан «Ҫамрӑксен хаҫачӗн» редакторӗ пулнӑ. 2007 ҫултан — «Хыпар» хаҫатӑн журналист тӗпчевӗсемпе куҫарусен пайӗн корреспонденчӗ. 2008 ҫулхи юпа уйӑхӗн 15-мӗшӗнчен — хроникӑпа харпӑр корреспондентсен пайӗн редакторӗ. 2016 ҫулхи кӑрлачӑн 1-мӗшӗнчен — «Хыпар» хаҫатӑн социаллӑ пурнӑҫ, культура тата спорт пайӗн тишкерӳҫи^[1].

«Хыпар» хаҫатра социаллӑ пӗлтерӗшлӗ проектсене пурнӑҫа кӗртме хастар хутшӑнать, юлашки ҫулсенче хаҫатра пичетленсе пынӑ ҫак ятарлӑ страницӑсене вулакансем хапӑлласа йышӑннӑ:

• Тӗрлӗ професси ҫыннисем;
• Хам куртӑм!
• Журналист блокнотӗнчен;
• Мухтавлӗ ентешсем;
• Халах медицини;
• Тухтӑрпа канашлар-и?
• Вырсаникунхи тӗлпулу;
• Республика тантӑшӗсем;
• Хальхи саманан 100 паллӑ ҫынни;
• Арҫынпа хӗрарӑм;
• Шур аппа;
• Шурсухал сакки;
• Пӗчӗк ял шӑпи;
• тата ытти те.

• Чӑваш Республикин Ҫамрӑксен патшалӑх премийӗн лауреачӗ (1998)^[2];
• Чӑваш Республикинчи Журналистсен союзӗн Хисеп грамоти (2001, 2003);
• Чӑваш Республикин Культура, национальноҫсен ӗҫӗсен, информполитика тата архив ӗҫӗн министерствин Хисеп грамоти (2006);
• Чӑваш Республикинчи Культура ӗҫченӗсен профсоюзӗн Хисеп грамоти (2009);
• Раҫҫей Федерацийӗнчи Журналистсен союзӗн Хисеп грамоти (2011);
• Чӑваш Республикин Журналистсен союзӗн Н. В. Никольский ячӗллӗ премийӗн лауреачӗ (2010);
• Чӑваш Республикин тава тивӗҫлӗ культура ӗҫченӗ (2014)^[3];
• «2016 ҫул — Чӑваш Енри ӗҫ ҫынни ҫулталӑкӗ» республика конкурсӗн ҫӗнтерӳҫин дипломӗ (2016);
• Чӑваш Республикин Сывлӑх сыхлавӗн министерстви ирттернӗ «Медицина — ман призвани» республика конкурсӗн ҫӗнтерӳҫин дипломӗ (2019);
• Нестер Янкас ячӗллӗ преми лауреачӗ (2023)^[4].