Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Комиссаров Валерий Петрович

Disambig gray.svg Комиссаров хушаматлă урăх çынсем çинчен РУВИКИ-ре статьясем пур.

Комиссаров Валерий Петрович (ҫур. 1956 ҫулхи пушӑн 14-мӗшӗ, Яманчурел, Чăваш Автономиллĕ Социализмлă Совет Республики) — журналист, Раҫҫей Журналистсен союзӗн пайташӗ (1980), Чӑваш Республикин тава тивӗҫлӗ культура ӗҫченӗ, Раҫҫей Федерацийӗн тава тивӗҫлӗ культура ӗҫченӗ, филологи ӑслӑлӑхӗсен кандидачӗ, доцент[1].

Пурнӑҫӗпе ӗҫӗ-хӗлӗ

1956 ҫулхи пуш уйӑхӗн 14-мӗшӗнче Чӑваш АССРӗн Елчӗк районӗнчи Яманчӳрел ялӗнче ҫуралнӑ. 1973 ҫулта Елчӗк районӗнчи Лаш Таяпари вӑтам шкултан, 1979 ҫулта М. В. Ломоносов ячӗллӗ Мускав патшалӑх университечӗн журналистика факультетӗнчен вӗренсе тухнӑ[1].

1979—1988 ҫулсенче «Коммунизм ялавӗ» (1991 ҫултанпа — «Хыпар») хаҫатра корреспондент пулса ӗҫленӗ, 1988—1992 ҫулсенче Чӑваш АССРӗн Журналистсен союзӗн яваплӑ секретарӗ, 1992 ҫултанпа — Чӑваш Республикин Журналистсен союзӗн правленийӗн ертӳҫи[1].

Чӑваш Республикин Журналистсен союзне ертсе пынӑ хушӑрах 1996 ҫултанпа И. Н. Ульянов ячӗллӗ Чӑваш патшалӑх университечӗн журналистика факультечӗн доценчӗ, 1996—2000 ҫулсенче Раҫҫей Федерацийӗн Патшалӑх Думин депутачӗн Святослав Николаевич Фёдоровӑн(выр.)чăв. пулӑшуҫи пулнӑ.

2005—2018 ҫулсенче Чӑваш кӗнеке издательство директорӗнче ӗҫленӗ. 2018 ҫултан вӗрентӳ ӗҫӗнче тӑрӑшать — И. Н. Ульянов ячӗллӗ Чӑваш патшалӑх университечӗн чӑваш тата вырӑс филологийӗсен, журналистика факультечӗн доценчӗ шутланса тӑрать[2].

Чӑваш кӗнеке издательствинче

2005 ҫулта Чӑваш Республикин Информаци политикипе массӑллӑ коммуникацисен министерствин «Чӑваш кӗнеке издательстви» патшалӑх унитарлӑ предприятин директорне ҫирӗплетнӗ. Ун чухне предприяти финанс енчен йывӑр лару-тӑрура пулнӑ, ҫӗнӗ пуҫлӑх ҫывӑх вӑхӑтрах ӑна стабильлӗ ӗҫпе тивӗҫтернӗ, издательствӑн пурлӑхпа техника базине ҫирӗплетнӗ, малта пыракан рентабельлӗ предприяти туса хунӑ. Республикӑри экономика ӑмӑртӑвӗн пӗтӗмлетӗвӗсем тӑрӑх Чӑваш кӗнеке издательстви йышӗпе 100 ҫын таран ӗҫлекенлӗ предприятисем хушшинче пӗрре мар малти вырӑнсене йышӑннӑ. 2017 ҫулта предприятие приватизациленӗ, В. Комиссарова «Чӑваш кӗнеке издательстви» АО тӗп директорне суйланӑ, ҫак должноҫра 2018 ҫулхи юпа уйӑхӗччен ӑнӑҫлӑ ӗҫленӗ.

Вӑл ӗҫленӗ тапхӑрта Чӑваш кӗнеке издательстви чӑваш халӑх историйӗпе культури ҫинчен ҫырнӑ 1000 ытла кӗнеке кӑларнӑ. Вӗсен шутӗнче 4 томлӑ «Чӑваш энциклопедийӗ» пек пысӑк кӑларӑмӗсем, «Чӑваш Республикин Президенчӗн библиотеки», «Чӑваш Енӗн чаплӑ ҫыннисем», «Халӑх ӑстисен опытӗнчен», ««Чӑваш халӑх пултарулӑхӗ», ««Чӑваш литературин антологийӗ» ярӑмри кӗнекесем тата ытти те.

Вӑл вӑхӑтра Чӑваш кӗнеке издательстви Чӑваш Республикине федераци тата тӗнче шайӗнчи куравсенче тивӗҫлипе паллаштарнӑ: Париж, Лондон, Барселона, Лейпциг, Белград, Ашгабад, Баку тата ытти хуласенче иртекен Пӗтӗм тӗнчери кӗнеке курав-ярмӑрккисенче, Мускаври «Хӗрлӗ площадь» кӗнеке фестивалӗнче. Конкурс-фестивальсен пӗтӗмлетӗвӗ тӑрӑх, ҫавӑн пекех Федерацин Пичетпе массӑллӑ коммуникацисен агентствин тата Раҫҫейри Кӗнеке кӑларакансен ассоциацин «Ҫулталӑк кӗнеки», «Ҫулталӑкри чи лайӑх кӗнекесем» тата «Кӗҫӗн Тӑван ҫӗршыв» конкурсӗсенче тӗрлӗ номинацисенче Чӑваш кӗнеке издательстви 2006 ҫултан пуҫласа кашни ҫулах лауреат пулса тӑнӑ.

Чӑваш кӗнеке издательствин тата Чӑваш Республикинчи Журналистсен союзӗн ертӳҫи пулса чылай проекта авторӗ, редакторӗ, пухса хатӗрлекенӗ, пултарулӑх ушкӑнӗн ертӳҫи пулса хутшӑнса пурнӑҫланӑ. Вӑл хутшӑннипе ҫыхӑннӑ проектсен шутӗнче[3]:

  • «Чӑваш энциклопедийӗ» (4 том),
  • «Чӑваш Республики. Пӗрле ӗҫлеме йыхрав» кӗнекесен ярӑмӗ (16 кӑларӑм),
  • «Чӑваш Ен журналисчӗсем»,
  • «Чӑваш Енри хула тата район хаҫачӗсем»,
  • «Чӑваш журналистикипе пичет энциклопедийӗ»,
  • тата ытти те.

Обществӑлла ӗҫсем

1988 ҫултанпа (малтанхи 4 ҫул — яваплӑ секретарь, 1992 ҫултан — председатель) Чӑваш Республикинчи Журналистсен союзне ертсе пырать, вӑл массӑллӑ информаци хатӗрӗсен 500 яхӑн ӗҫченне пӗрлештерет. Раҫҫей Журналистсен союзӗн(выр.)чăв. Федеративлӑ канашӗн членне суйланӑ, Чӑваш Республикин Цифра аталанӑвӗн, информаци политикипе массӑллӑ коммуникацисен министерствин Обществӑлла канашӗн членӗ шутланать. Нумай ҫул хушши вӑл Раҫҫей кӗнеке кӑларакансен ассоциацийӗн тата Чӑваш Республикин литературӑпа искусство енӗпе патшалӑх премийӗсене парас енӗпе ӗҫлекен комисси правленийӗн пайташӗ шутланнӑ.

Хисепӗсем

  • Чӑваш Республикин тава тивӗҫлӗ культура ӗҫченӗ (1997);
  • Чӑваш Республикин Патшалӑх Канашӗн Хисеп хучӗ (2000);
  • РФ Пичет ӗҫӗсен, телерадиовещани тата массӑллӑ коммуникацисен хатӗрӗсен министерствин Хисеп хучӗ (2002);
  • РФ Ҫыхӑну тата массӑллӑ коммуникацисен министерствин Хисеп хучӗ (2010);
  • Раҫҫей Журналистсен союзӗн Хисеп хучӗ (1997, 1998);
  • Раҫҫей Журналистсен союзӗн ««Профессиллӗ пӗрлӗх умӗнчи тава тивӗҫлӗ ӗҫсемшӗн» паллӑ (2007);
  • Чӑваш Республикин Журналистсен союзӗн Ҫемен Элкер ячӗллӗ преми лауреачӗ (1997);
  • Чӑваш Республикин Президенчӗн Тав хучӗ (2006);
  • Чӑваш Республикин Журналистсен союзӗн Н. Никольский ячӗллӗ преми лауреачӗ (2015);
  • Раҫҫей Журналистсен союзӗн премийӗсен лауреачӗ (1998, 2001, 2006, 2015)[1].

Ӑнлантарусем

  1. ^ 1, 2, 3, 4 А. И. Михайлов. Комиссаров Валерий Петрович (выр.). Чувашская энциклопедия. Чувашский государственный институт гуманитарных наук. Пӑхнӑ кун: 2025 ҫулхи авӑнӑн 25-мӗшӗ.
  2. ^ Комиссаров Валерий Петрович (выр.). Чувашский государственный университет им. И. Н. Ульянова. Пӑхнӑ кун: 2025 ҫулхи авӑнӑн 25-мӗшӗ.
  3. ^ Комиссаров, Валерий Петрович (журналист; 14.03.1956) (выр.). Наследие Чувашии. Национальная библиотека Чувашской Республики. Пӑхнӑ кун: 2025 ҫулхи авӑнӑн 25-мӗшӗ.

Вуламалли

  • Автор и руководитель проекта В. П. Комиссаров. Энциклопедия чувашской журналистики и печати. — Региональная общественная организация «Союз журналистов Чувашской Республики», 2014. — Т. 1. — С. 215—216. — 559 с. — ISBN 978-5-7670-2156-7.
  • В. П. Комиссаров, А. И. Михайлов. Журналисты Чувашии. — Чувашское книжное издательство, 2005. — С. 134. — 208 с. — ISBN 5-7670-1467-1.
  • Комиссаров, В. П. Ашшӗн ҫулӗпе утса хӑйӗн ҫӑлтӑрне ҫутнӑ : [Чӑваш кӗнеке издательствин директорӗпе Валерий Комиссаровпа калаҫни] / И. Пушкина калаҫнӑ // Тӑван Атӑл. — 2016. — № 3. — С. 98-107 : сӑн ӳкерчӗксем;
  • Комиссаров, В. П. Валерий Комиссаров: «Пичетленме черет кӗтекен статьясене тӗлӗкре те кураттӑм» : [Чӑваш кӗнеке издательствин директорӗпе калаҫни / И. Пушкина ҫырса илнӗ] // Хыпар. — 2016. — 15 пуш/март (№ 33/34). — С. 4 : сӑн ӳкерчӗк;
  • Комиссаров, В. П. Кӗнеке ялан пирӗнпе / В. П. Комиссаров ; В. Николаев ҫырса илнӗ // Урал сасси. — 2009. — 2 ака (№ 14). — С. 3;
  • Комиссаров, В. П. «Кӗнекен те чунӗ пур» / В. П. Комиссаров ; [А. Манякова ҫырса илнӗ] // Тӑван Ен (Шупашкар районӗ). — 2015. — 17-23 ака (№ 14). — С. 8 : сӑн ӳкерчӗк;
  • Тимофеев, А. Иксӗлми талант, пултаруллӑ ертӳҫӗ / А. Тимофеев // Елчӗк ен. — 2016. — 16 пуш (№ 20). — С. 2 : сӑн ӳкерчӗк;
  • Элина, К. Журналистика — уншӑн пурнӑҫ / К. Элина // Пурнӑҫ ҫулӗпе (Элӗк районӗ). — 2016. — 18 пуш (№ 18). — С. 7 : сӑн ӳкерчӗк;
  • Комиссаров Валерий Петрович // Чувашская Республика. Яльчикский район. — Чебоксары, 2005. — С. 75;
  • Комиссаров, В. П. Журналистика — это особый мир : [беседа с председателем Союза журналистов Чувашии Валерием Комиссаровым / записала Е. Зайцева] // Советская Чувашия. — 2023. — 28 декабря (№ 147). — С. 3 : фот.;
  • Комиссаров, В. П. С книгой по жизни / В. П. Комиссаров ; беседовала Е. Зайцева // Советская Чувашия. — 2010. — 13 нояб. — С. 3;
  • Малышкин, Н. Ф. Комиссаров Валерий Петрович / Н. Ф. Малышкин // Яльчикский район : краткая энцикл. — Чебоксары, 2007. — С. 167-168;
  • Михайлов, А. И. Комиссаров Валерий Петрович / А. И. Михайлов // Чувашская энциклопедия. — Чебоксары, 2008. — Т. 2 : Ж-Л. — С. 298-299.

Каҫӑсем

Темӑпа ҫыхӑннисем

Категорисем