Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Люблин Иосиф Вениаминович

Люблин Иосиф Вениаминович (1906 ҫулхи нарӑсӑн 19-мӗшӗ, Рудня[d], Смоленск кӗпӗрни, Раҫҫей империйӗ — 1938 ҫулхи авӑнӑн 22-мӗшӗ, Шупашкар, Чăваш Автономиллĕ Социализмлă Совет Республики, Раççей Федерациллĕ Социализмлă Совет Республики, СССР) — совет тапхӑрӗнчи мусӑкҫӑ, пианист, композитор, педагог тата музыка-общество ӗҫченӗ.

Пурнӑҫӗпе кун-ҫулӗ

1906 ҫулхи нарӑсӑн 19-мӗшӗнче Смоленск кӗпӗрнинчи Рудня хулинче ҫуралнӑ.

1930 ҫулта Мускав консерваторине С. Е. Фейнбергӑн фортепиано класӗнчен вӗренсе тухнӑ та Шупашкара килнӗ. 1930—1936 ҫулсенче Шупашкарти музыка техникумӗнче вӗренӳ пайне ертсе пынӑ, унтах фортепиано тата музыка историйӗ предмечӗсене вӗрентнӗ. Ун патӗнче пулас чӑваш композиторӗсем вӗреннӗ: Г. В. Воробьёв, В. А. Ходяшев, Г. С. Лебедев, Ф. М. Лукин, А. Г. Орлов-Шузьм, Ф. С. Васильев, А. М. Токарев, Т. И. Фандеев. Иосиф Вениаминович музыка училищинче, хулари уҫӑ эстрадасенче иртнӗ концертсене хутшӑннӑ, ҫавӑн пекех радиора пианист-солист е концертмейстер пулнӑ[1].

1936 ҫулта И. В. Люблин Чăваш патшалӑх филармонийӗн пӗрремӗш директорӗ пулса тӑнӑ. 1937 ҫулта Люблинӑн фортепиано кӗввипе пӗрремӗш профессионал чӑваш юрӑҫисем И. В. Васильевпа А. Г. Казакова юрланӑ чӑваш халӑх юррисен 3 хатӗрлевне грампластинкӑсем ҫине ҫыртарнӑ. Вӑл Республикӑри I ӳнер (халӑх ӳнерӗ) олимпиадине йӗркелекенсен[2] шутӗнче пулнӑ[1].

Ҫавӑн пекех Иосиф Вениаминович Люблин Чӑваш Енӗн музыка историйӗн тӗпчевҫи тата критикӗ пек палӑрнӑ. Вӑл «Советская Чувашия. Национально-культурное строительство» (М., 1933) кӗнекере — «Советская музыка Чувашии», «15 лет Советской социалистической Чувашии (1920—1935)» (Шупашкар, 1935) статьясен пуххинче «Чувашская смузыка» очерксем пичетленӗ, ҫавӑн пекех наци культурин строительствин ыйтӑвӗсене хускатакан хаҫатсенче статьясемпе рецензисем кӑларнӑ. В. М. Кривоносовпа тата С. М. Максимовпа пӗрле «Песенное творчество чувашского народа» монографи ҫырнӑ (пичетленмен)[2]. Люблин П. Н. Осиповӑн «Кужар» тата «Кулленхи симфони» драмисем валли ҫырнӑ юрӑсен авторӗ пулнӑ, юрӑ жанрӗнче те палӑрнӑ — В. Е. Митта сӑввисемпе «Акатуй каччисем» хор юррине тата сасӑпа фортепиано валли халӑх юррисен темиҫе хатӗрлевне ҫырнӑ.

Музыка-общество ӗҫне хастар хутшӑннӑшӑн Люблин ятне Чӑваш АССР Тӗп Ӗҫтӑвком Комитечӗн Хӗрлӗ кӗнекине кӗртнӗ[3].

1938 ҫулхи пушӑн 5-мӗшӗнче И. В. Люблина контрреволюци ӗҫӗшӗн айӑпласа аресленӗ[3], 1938 ҫулхи авӑнӑн 22-мӗшӗнче персе пӑрахнӑ[4]. 1956 ҫулхи кӑрлачӑн 17-мӗшӗнче ятне реабилитациленӗ[3].

Ӗҫӗсем

Люблин И. В. Олимпиада искусств в Чувашии / И. Люблин; ред. А. Золотов. — Чебоксары: Чувашское государственное издательство, 1934. — портр., фот.[5].

Астӑвӑм

  • Чӑваш Республикин хальхи истори патшалӑх архивӗнче И. В. Люблинпа ҫыхӑннӑ документсем упранаҫҫӗ.
  • Чӑваш патшалӑх филармонийӗнче тата Ф. П. Павлов ячӗллӗ Шупашкарти музыка училищинче И. В. Люблина халалланӑ мероприятисем ирттереҫҫӗ.

Ӑнлантарусем

  1. ^ 1, 2 Ю. А. Илюхин. Люблин Иосиф Вениаминович (выр.). Чувашская энциклопедия. Чувашский государственный институт гуманитарных наук. Пӑхнӑ кун: 2026 ҫулхи ҫӑвӑн 31-мӗшӗ.
  2. ^ 1, 2 Люблин, Иосиф Вениаминович (музыкант; 19.02.1906-22.09.1938) (выр.). Наследие Чувашии. Пӑхнӑ кун: 2026 ҫулхи ҫӑвӑн 31-мӗшӗ.
  3. ^ 1, 2, 3 Константинова Анна Ивановна. Выдающийся деятель музыкального искусства (К 115-летию со дня рождения Иосифа Вениаминовича Люблина (1906-1938), пианиста, композитора, музыковеда, первого директора Чувашской государственной филармонии, заведующего учебной частью и заместителя директора Чебоксарского музыкального техникума) (выр.) (19 нарӑсӑн 2021). Пӑхнӑ кун: 2026 ҫулхи ҫӑвӑн 31-мӗшӗ.
  4. ^ Люблин Иосиф Вениаминович (1906). Тӗрӗсленӗ: 2026 ҫулхи ҫӑвӑн 31-мӗшӗ.
  5. ^ И. Люблин. Олимпиада искусств в Чувашии (выр.). Национальная электронная библиотека. Пӑхнӑ кун: 2026 ҫулхи ҫӑвӑн 31-мӗшӗ.

Вуламалли

  • Дмитриева, Ю. А. Учителя и ученики: становление музыкальной профессиональной культуры в Чувашии (к вопросу о преемственности) / Ю. А. Дмитриева // Н. В. Овчинников и чувашское изобразительное искусство ХХ века : сб. науч. ст. по итогам Междунар. науч.-практ. конф. (Чебоксары, 18 окт. 2018 г.) / Чуваш. гос. пед. ун-т. — Чебоксары, 2021. — С. 69-73.
  • Илюхин, Ю. В памяти народной / Ю. Илюхин // Советская Чувашия. — 1986. — 19 февр.
  • Илюхин, Ю. Люблин Иосиф Вениаминович / Ю. Илюхин // Краткая чувашская энциклопедия. — Чебоксары, 2001. — С. 255.
  • Илюхин, Ю. Люблин Иосиф Вениаминович / Ю. Илюхин // Чувашская энциклопедия. — Чебоксары, 2008. — Т. 2 : Ж-Л. — С. 477.. — См. текст
  • Илюхин, Ю. Педагог, композитор, музыковед / Ю. Илюхин // Советская Чувашия. — 1976. — 19 февр.
  • Кондратьев, М. Г. Иосиф Вениаминович Люблин: 1906—1938. Человек своего времени / М. Г. Кондратьев // Мастера музыкального искусства. — Чебоксары, 2009. — С. 209—218.
  • Кондратьев, М. Человек своего времени / М. Кондратьев // Советская Чувашия. — 1996. — 14 марта.
  • Питернова, В. «Никак не могу согласиться» / В. Питернова // Советская Чувашия. — 2006. — 8 дек.

Каҫӑсем

Категорисем