Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Чӑваш Республики умӗнчи тава тивӗҫлӗ ӗҫсемшӗн (орден медалӗ)

«Чӑваш Республики умӗнчи тава тивӗҫлӗ ӗҫсемшӗн» орден медалӗ (выр. Медаль ордена «За заслуги перед Чувашской Республикой») — Чӑваш Республикин чи пысӑк патшалӑх хисепӗсенчен пӗри. Ордена Чӑваш Республикин 2005 ҫулхи акан 12-мӗшӗнчи 15 № «Чӑваш Республикин патшалӑх чыславӗсем пирки» саккунӗпе ҫирӗплетнӗ[1].

«Чӑваш Республики умӗнчи тава тивӗҫлӗ ӗҫсемшӗн» орден медалӗпе граждансене наука, экономика, социаллӑ пурнӑҫпа культура, обществӑпа ыркӑмӑллӑх ӗҫӗ-хӗлӗнчи пысӑк ҫитӗнӳсемшӗн, халӑхсем хушшинчи тӑнӑҫлӑхпа туслӑха ҫирӗплетес ӗҫри тава тивӗҫлӗ ӗҫсемшӗн тата Чӑваш Республикипе унӑн халӑхӗ умӗнчи ытти тава тивӗҫлӗ ӗҫсемшӗн чыслаҫҫӗ[1].

Чыслас йӗрке

«Чӑваш Республики умӗнчи тава тивӗҫлӗ ӗҫсемшӗн» орденпа Раҫҫей Федерацийӗн тата ют ҫӗршыв гражданӗсене, ҫавӑн пекех гражданлӑх ҫук ҫынсене те чыслама пултараҫҫӗ.

Чӑваш Республикин Пуҫлӑхӗн хушӑвӗпе килӗшӳллӗн чыслаҫҫӗ, патшалӑх наградипе чысласси ҫинчен хушу массӑллӑ информаци хатӗрӗсенче пичетленет.

Пӗр хут чысланӑ хисеппе тепӗр хут чысламаҫҫӗ.

Патшалӑх наградисене Чӑваш Республикин Пуҫлӑхӗ е вӑл хушнипе урӑх должнӑҫри ҫын савӑнӑҫлӑ лару-тӑрура парать[1].

Сӑнлани

«Чӑваш Республики умӗнчи тава тивӗҫлӗ ӗҫсемшӗн» орден медальне 925 пробӑллӑ кӗмӗлрен ӑсталаҫҫӗ, вӑл 35 миллиметрлӑ ҫавра, пиччӗн енчен хӗррипе мӑкӑрӑлса тӑрать.

Медалӗн пиччӗн (аверс(выр.)чăв.) енче 16 кӗтеслӗ ҫӑлтӑр, икӗ сакӑр кӗтеслӗ хӗресе урлӑ хурса тунӑскер. Ҫӑлтӑр варринче — медальон, унта Чӑваш Республикин патшалӑх гербне ӳкернӗ. Гербӑн калӑпӑшӗ — 14 мм. Медальона хӑмла турачӗсен кӑшӑлӗ явӑкласа тӑрать.

Медалӗн тӳнтер (реверс(выр.)чăв.) енӗнче хӗррипе «Чӑваш Республики умӗнчи тава тивӗҫлӗ ӗҫсемшӗн» орден медалӗ / Медаль ордена «За заслуги перед Чувашской Республикой» тесе ҫырнӑ, варринче — медаль номерӗ.

Медаль ункӑпа пилӗк кӗтеслӗ колодкӑпа ҫыхӑнать. Колодкӑна 2 сарӑ, 1 хӗрлӗ тӗслӗ йӗрсенчен тӑракан пурҫӑн муар хӑюпа явӑкланӑ[1].

Ҫакса ҫӳремелли йӗрке

Ордена кӑкӑрӑн сулахай енче, кӑкӑр ҫинче «Чӑваш Республики умӗнчи тава тивӗҫлӗ ӗҫсемшӗн» орден пур чухне ун хыҫҫӑн ҫакмалла[1].

Медальпе чысланисем

Ӑнлантарусем

  1. ^ 1, 2, 3, 4, 5 Закон Чувашской Республики от 12 апреля 2005 года N 15 «О государственных наградах Чувашской Республики» (выр.). Электронный фонт правовых и нормативно-технических актов. Пӑхнӑ кун: 2025 ҫулхи авӑнӑн 11-мӗшӗ.

Каҫӑсем

Темӑпа ҫыхӑннисем

Категорисем