Михайловский Михаил Алексеевич
Михайловский Михаил Алексеевич (ҫур. 1947 ҫулхи акан 21-мӗшӗ, Аслӑ Пӑла Тимеш, Чăваш Автономиллĕ Социализмлă Совет Республики) — 2001 ҫулхи акан 17-мӗшӗнчен пуҫласа 2011 ҫулхи чӳкӗн 22-мӗшӗччен Чӑваш Республикин Патшалӑх Канашӗн председателӗ.
Пӗтӗм Раҫҫейри «Пӗрлӗхлӗ Раҫҫей» политика партийӗн Чӑваш Енри уйрӑмӗн политканашӗн секретарӗ, Пӗтӗм Раҫҫейри «Пӗрлӗхлӗ Раҫҫей» политика партийӗн Тӗп канашӗн пайташӗ.
Биографийӗ
Ӑҫтан тухни
Чӑваш АССРӗн Елчӗк районӗнчи Аслӑ Пӑла Тимеш ялӗнче ҫуралнӑ, чӑваш. Аслӑ пӗлӳ илнӗ, 1971 ҫулта Чӑваш ял хуҫалӑх институчӗн агрономи факультетне пӗтернӗ; 1982 ҫулта — Горькинчи аслӑ парти шкулне.
Карьера
- 1965—1966 ҫулсем — Чӑваш АССРӗнчи Елчӗк районӗнчи Аслӑ Пӑла Тимешри вӑтам шкулӗн физкультура вӗрентекенӗ.
- 1966—1968 ҫулсем — Чӑваш ял хуҫалӑх институчӗн студенчӗ, унтан 1971 ҫулта вӗренсе тухнӑ[1].
- 1968—1970 ҫулсем — Чӑваш АСССРӗн Комсомольски районӗнчи Ульянов ячӗллӗ колхоз экономисчӗ.
- 1970—1973 ҫулсем — Чӑваш АССРӗн Шӑмӑршӑ райӗҫтӑвкомӗн ял хуҫалӑх управленийӗн агрономӗ, тӗп агрономӗ.
- 1973—1976 ҫулсем — Чӑваш АССРӗн Ҫӗрпӳ райӗҫтӑвкомӗн ял хуҫалӑх управленийӗн тӗп агрономӗ.
- 1976—1980 ҫулсем — Чӑваш АССРӗн Ҫӗрпӳ районӗнчи «Булдеевский» совхоз директорӗ.
- 1980—1985 ҫулсем — Чӑваш АССРӗн КПСС Ҫӗрпӳ райкомӗн иккӗмӗш секретарӗ.
- 1985—1988 ҫулсем — Чӑваш АССРӗн Елчӗк районӗнчи «Победа» колхоз председателӗ.
- 1988—1992 ҫулсенче — Смоленск облаҫӗнчи Рославль районӗнчи «Ивановский» совхоз директорӗн ҫумӗ.
- 1993—1996 ҫулсем — Ҫӗрпӳ район администрацийӗн пуҫлӑхӗн пӗрремӗш ҫумӗ, пулӑшуҫи, Ҫӗрпӳ типографийӗн директорӗ.
- 1996 ҫулхи раштавран пуҫласа 1998 ҫулхи чӳкчен — Чӑваш Республикин Ҫӗрпӳ районӗнчи хӑй тытӑмлӑх пуҫлӑхӗ.
- 1998 ҫулхи утӑн 12-мӗшӗнче Чӑваш Республикин Патшалӑх Канашӗн иккӗмӗш чӗнӗвӗн депутатне Чурачӑкри 45-мӗш суйлав округӗнчен суйланӑ.
- 1998 ҫулхи чӳкӗн 27-мӗшӗнче Чӑваш Республикин Патшалӑх Канашӗн Председателӗн ҫумӗ пулма суйланӑ, пӗрмайхи професси шайӗнче ӗҫленӗ.
- 2001 ҫулхи акан 17-мӗшӗнче Чӑваш Республикин Патшалӑх Канашӗн иккӗмӗш чӗнӗвӗнчи черетлӗ ҫирӗм ҫиччӗмӗш сессийӗнче Чӑваш Республикин Патшалӑх Канашӗн Председательне суйланӑ.
- 2002 ҫулхи утӑн 21-мӗшӗнче Чӑваш Республикин Патшалӑх Канашӗн виҫҫӗмӗш чӗнӗвӗн депутатне Туҫари 8-мӗш суйлав округӗнчен суйланӑ.
- 2002 ҫулхи утӑн 26-мӗшӗнче Чӑваш Республикин Патшалӑх Канашӗн виҫҫӗмӗш чӗнӗвӗн пӗрремӗш сессийӗнче Чӑваш Республикин Патшалӑх Канашӗн Председательне суйланӑ.
- 2015 ҫулхи раштавӑн 11-мӗшӗнчен пуҫласа — Чӑваш Республикин Пуҫлӑхӗ ҫумӗнчи Ваттисен канашӗн пайташӗ[2].
Ҫемйи тата харпӑр пурнӑҫӗ
Авланнӑ, икӗ ачаллӑ.
Михаил Михайловский 2011 ҫулхи акан 28-мӗшӗнче вырӑнти парламентра республикӑра «тӗп чӗлхе — чӑваш чӗлхи, кайран кӑна вырӑс чӗлхи» тесе пӗлтернӗ[3].
Наградӑсем
- «Чӑваш Республики умӗнчи тава тивӗҫлӗ ӗҫсемшӗн» орден (2006) — Чӑваш Республикин социаллӑ пурнӑҫпа экономика аталанӑвне тата саккун тӑвакан ӗҫ-хӗле пысӑк тӳпе хывнӑшӑн[4].
- Раҫҫей Федерацийӗн Федераци Пухӑвӗн Федераци Канашӗн Хисеп грамоти,
- Раҫҫей Федерацийӗн Федераци Пухӑвӗн Патшалӑх Думин Хисеп грамоти,
- КПСС обкомӗн тата Чӑваш АССРӗн Министрсен Канашӗн Хисеп грамоти,
- Чӑваш Республикин Патшалӑх Канашӗн Хисеп грамоти[1].
Ӑнлантарусем
- ^ 1, 2 Государственные и политические деятели : Михайловский Михаил Алексеевич // Национальная библиотека Чувашской Республики. — Дата обращения: 23.01.2026.
- ^ Распоряжение Главы Чувашской Республики от 11 декабря 2015 года N 573-рг «О составе Совета старейшин при Главе Чувашской Республики» // Электронный фонд правовой и научно-технической документации «Техэксперт». — Дата обращения: 23.01.2026.
- ^ Для «Единой России» чувашский язык стал главнее русского | KM.RU. Пӑхнӑ кун: 2026 ҫулхи кӑрлачӑн 23-мӗшӗ. Архивланӑ 2013 ҫулхи пушӑн 9-мӗшӗ.
- ^ Архивная версия сайта: Официальный портал органов власти Чувашской Республики » Законодательство » О награждении орденом «За заслуги перед Чувашской Республикой» Михайловского М.А. (выр.). gov.cap.ru. Пӑхнӑ кун: 2026 ҫулхи кӑрлачӑн 23-мӗшӗ.