Иванов Владимир Николаевич (педагог)
Иванов Владимир Николаевич (ҫур. 1957 ҫулхи чӳкӗн 22-мӗшӗ, Элешкушкăнь, Eтĕрнe районĕ, Чăваш Автономиллĕ Социализмлă Совет Республики, Раççей Федерациллĕ Социализмлă Совет Республики, СССР) — Раҫҫей педагогӗ, педагогика ӑслӑлӑхӗсен докторӗ, профессор (2001).
И. Я. Яковлев ячӗллӗ Чӑваш патшалӑх педагогика университечӗн ректорӗ (2016—2023[1][2]).
Пурнӑҫӗпе ӗҫӗ-хӗлӗ
1957 ҫулхи чӳк уйӑхӗн 22-мӗшӗнче Чӑваш АССРӗн Етӗрне районӗнчи (халӗ — Чӑваш Республикин Етӗрне муниципаллӑ округӗ) Элешкушкăнь ялӗнче ҫуралнӑ. Чӑваш.
1978 ҫулта И. Я. Яковлев ячӗллӗ Чӑваш патшалӑх педагогика университетӗнчен вӗренсе тухнӑ хыҫҫӑн Чӑваш АССРӗн Етӗрне районӗнчи Килтӗшри сакӑр ҫул вӗренмелли шкул директорӗнче ӗҫленӗ, 1981 ҫултанпа — Чӑваш АССРӗн Етӗрне районӗнчи Чирӗккасси вӑтам шкулӗн директорӗнче. 1988 ҫулхи пуш уйӑхӗнчен пуҫласа Чӑваш АССРӗн Етӗрне райканашӗн ӗҫтӑвкомӗн РОНО заведующийӗ пулнӑ, 1991 ҫулхи ҫурла уйӑхӗнчен пуҫласа — Етӗрне наци гимназийӗн директорӗн ӑслӑлӑх тата ӑслӑлӑх-методика енӗпе ӗҫлекен ҫумӗ. 2002 ҫулта И. Н. Ульянов ячӗллӗ Чӑваш патшалӑх университечӗн физика вӗрентӗвӗн методикин кафедрин профессорӗ пулса ӗҫлеме тытӑннӑ[1].
Чӑваш Республикин Министрсен Кабинетӗнче 2011 ҫулхи нарӑсран пуҫласа 2016 ҫулхи ҫу уйӑхӗччен Чӑваш Республикин вӗрентӳ тата ҫамрӑксен политикин министрӗ пулнӑ. 2016 ҫулхи ҫу уйӑхӗнче И. Я. Яковлев ячӗллӗ Чӑваш патшалӑх педагогика университечӗн ректорне лартнӑ, ӑна 2023 ҫулччен ертсе пынӑ.
2013 ҫулхи юпан 2-мӗшӗнче И. Н. Ульянов ячӗллӗ Чӑваш патшалӑх университечӗн Ӑслӑлӑх канашӗ ректор вырӑнне лармалли претендентсен списокне ҫирӗплетнӗ, унта университетӑн проректорӗсӗр А. Ю. Александровсӑр пуҫне ҫак ҫынсем кӗнӗ: Чӑваш Республикин ҫамрӑксен политикин вӗрентӳ министрӗ В. Н. Иванов (тӗп претендент тесе йышӑннӑ), Чӑваш патшалӑх гуманитари ӑслӑлӑхӗсен институчӗн директорӗ Ю. Н. Исаев, Раҫҫей халӑх хуҫалӑхӗпе патшалӑх службин академийӗн Шупашкарти филиалӗн Социаллӑ технологисен кафедрин заведующийӗ С Н. Г. Семедова-Полупан, ЧПУн Регионти экономика тата предпринимательлӗх кафедрин заведующийӗ А. Е. Яковлев[3]. 2013 ҫулхи чӳкӗн 8-мӗшӗнче Раҫҫей Федерацийӗн Вӗрентӳпе ӑслӑлӑх министерствин Д. В. Ливанов министр ертсе пынӑ Аттестаци комиссийӗн ларӑвӗнче И. Н. Ульянов ячӗллӗ ЧПУ ректорӗн должноҫне йышӑнма тӑратнӑ кандидатурӑсене пӑхса тухнӑ. Пӑхса тухнӑ май А. Ю. Александровпа Ю. Н. Исаев кандидатурисене ырланӑ[4].
2018 ҫулхи ҫӗртмен 3-мӗшӗнче Чӑваш Республикин Патшалӑх Канашӗн депутатне суйланнӑ. 2020 ҫултан пуҫласа 2024 ҫулччен Чӑваш Республикин Аслӑ экономика канашӗн пайташӗ (2024 ҫулхи ҫу уйӑхӗ тӗлне) шутланать[5].
2023 ҫултанпа И. Я. Яковлева ячӗллӗ Чӑваш патшалӑх педагогика университечӗн ӑслӑлӑхпа инноваци енӗпе ӗҫлекен проректорӗнче вӑй хурать. Пӗтӗм Раҫҫейри «Пӗлӳ» обществӑпа патшалӑх ҫутӗҫ организацийӗн Чӑваш Енри уйрӑмӗн председателӗ[6].
Хисепӗсем
- РСФСР Ҫутӗҫ министерствин Хисеп хучӗ (1987);
- Чӑваш Республикин тава тивӗҫлӗ вӗрентекенӗ (1998);
- К. Д. Ушинский медалӗ (2003)[1];
- Етӗрне районӗн хисеплӗ гражданинӗ (2014);
- «Чӑваш Республики умӗнчи тава тивӗҫлӗ ӗҫсемшӗн» орден медалӗ (2016);
- Раҫҫей Федерацийӗн пӗтӗмӗшле вӗрентӗвӗн хисеплӗ ӗҫченӗ;
- Чӑваш Республикин Патшалӑх Канашӗн Хисеп хучӗ.
Ӑнлантарусем
- ^ 1, 2, 3 Иванов Владимир Николаевич. Единая Россия. Пӑхнӑ кун: 2026 ҫулхи пушӑн 16-мӗшӗ.
- ^ Иванов Владимир Николаевич. Государственный Совет Чувашской Республики. Пӑхнӑ кун: 2026 ҫулхи пушӑн 16-мӗшӗ.
- ^ Мария Грачёва. Ректор Чувашского госуниверситета отстранён от должности. Тӗрӗсленӗ: 2026 ҫулхи пушӑн 16-мӗшӗ.
- ^ Состоялось заседание Аттестационной комиссии Министерства образования и науки Российской Федерации. gigabaza.ru. Пӑхнӑ кун: 2026 ҫулхи пушӑн 16-мӗшӗ.
- ^ Состав Высшего экономического совета Чувашской Республики. Министерство экономического развития и имущественных отношений Чувашской Республики. Пӑхнӑ кун: 2026 ҫулхи пушӑн 16-мӗшӗ.
- ^ Иванов, Владимир Николаевич (ученый; 22.11.1957) (выр.). Наследие Чувашии. Пӑхнӑ кун: 2026 ҫулхи пушӑн 16-мӗшӗ.