Пӗтӗм тӗнчери фейерверк фестивалӗ (Шупашкар)

Фестиваль тӗллевӗ — фейерверк искусствинчи чи лайӑх ҫитӗнӳсене кӑтартасси, фейерверк искусствине тата Шупашкар хули Раҫҫейри чи лайӑх хуласенчен пӗри тата Атӑлҫи тӑрӑхӗнчи туризм центрӗ пулнине популяризацилесси^[2].

Фестиваль тӗллевӗсем:

• хамӑр ҫӗршыври тата ют ҫӗршыври чи лайӑх пиротехника коллективӗсен тата фирмисен пултарулӑхпа техника майӗсене демонстрацилесси;
• Раҫҫейри тата чикӗ леш енчи хуласен хушшинче ҫӗнӗ культура ҫыхӑнӑвӗсене йӗркелесси;
• Шупашкар хулин имиджне Раҫҫейри чи лайӑх хуласенчен пӗри тата Атӑлҫи тӑрӑхӗнчи туризм центрӗ пек йӗркелесси.

Фестивале Чӑваш Республикин Министрсен Кабинечӗ Раҫҫейри пиротехниксен тата фейерверксен демонстраторӗсен ассоциацийӗ (РАПИД-Фейерверк) пулӑшнипе йӗркелет.

Фестиваль ирттермелли вырӑн — Шупашкар хули, Шупашкар кӳлмекӗн ҫыран хӗрри тата Атӑл юхан шывӗн акваторийӗ.

Шупашкарта ҫулсерен Пӗтӗм Раҫҫейри халӑхсен хушшинчи фейерверк фестивальне йӗркелес тата ирттерес сӗнӳпе Чӑваш Республикин Правительстви патне «РАПИД-Фейерверк» Раҫҫейри пиротехника Ассоциацийӗн президенчӗ, ФГУП "ФНПЦ «НИИ прикладной химии» Раҫҫейри пиротехника центрӗн директорӗ, Н. Вареных академик тухнӑ.

2008 ҫулхи пуш уйӑхӗн 13-мӗшӗнче фейерверк фестивальне йӗркелес тата ирттерес ыйтупа Чӑваш Республикин промышленноҫпа энергетика министрӗн Юрий Волошинӑн тата «В. И. Чапаев ячӗллӗ ЧПО» ФГУП тӗп директорӗн Михаил Резниковӑн пӗрлехи канашлӑвӗ иртнӗ.

Шупашкарта фейерверк фестивальне ирттерес шухӑша Чӑваш Республикин Президенчӗ Н. В. Фёдоров ырланӑ. Унӑн шухӑшӗпе: «Ҫак проект туристсене чӑваш ҫӗрӗ ҫине ытларах илӗртме пулӑшӗ».

Шупашкарта 2008 ҫулхи ҫу уйӑхӗн 9-11-мӗшӗсенче иртнӗ Пӗтӗм тӗнчери фейерверк фестивальне Раҫҫейри (Санкт-Петербург, Шупашкар, Сергиев-Посад, Челепи), Беларуҫ, Казахстан командисем хутшӑннӑ.

Фейерверк искусствин кӑтартӑвӗсем Шупашкар кӳлмекӗнче шыв ҫийӗн иртнӗ. Уставкӑсен пӗтӗм ӗҫӗсене палӑртса кӗвӗ ҫеммипе тунӑ. Пиротехника изделийӗсене виҫӗ вырӑнтан синхронлӑ харӑс перессине управленин электронлӑ пульчӗсенчен ямалли программӑпа йӗркеленӗ.

Фестиваль ҫу уйӑхӗн 11-мӗшӗнче хӑвӑрт утассипе иртнӗ XXIII Кубокне хупнӑ кун вӗҫленнӗ.

Пиротехника спектаклӗсен темисем:

• Ҫӑвӑн 9-мӗшӗ — «Ҫӗнтерӳ кунӗ!»;
• Ҫӑвӑн 10-мӗшӗ — «Халӑхсен туслӑхӗ»;
• Ҫӑвӑн 11-мӗшӗ — «О, спорт, эсӗ — тӗнче!»^[3]

Пӗтӗм тӗнчери иккӗмӗш фейерверк фестивалӗ ҫӗртмен 23-24-мӗшӗсенче Шупашкар кӳлмекӗн ҫыранӗнче иртнӗ. Икӗ каҫра хӑйсен ӑсталӑхне Раҫҫейри (Шупашкар, Челепи тата Тӗмен), Беларуҫри тата Казахстанри 5 профессионал пиротехника команди кӑтартнӑ.

Фестивалӗн пӗрремӗш кунӗн темине космоса халалланӑ. Ку темӑна суйлани Чӑваш Республикинче ҫуралса ӳснӗ виҫҫӗмӗш летчик-космонавт Андриян Николаев сакӑрвунӑ ҫул тултарнипе ҫыхӑннӑ. Фестиваль ҫӗртмен 24-мӗшӗнче «Шупашкарти В. И. Чапаев ячӗллӗ производство пӗрлешӗвӗ» ФГУП гала-представленипе вӗҫленнӗ, ку кӑтарту конкурса кӗмен.

Фестивалӗн тӗп призне Беларуҫ Республикинчи Дзержинск хулинчи «Кальвин» ТМЯП команда ҫӗнсе илнӗ, ӑна ҫӗнтерӳҫӗ дипломне тата хӑйне евӗрлӗ статуэткӑна, Амӑшӗн монуменчӗн копине, панӑ. Хутшӑннӑ кашни командӑна тӗрлӗ номинацире палӑртнӑ. Ҫутӑ сӑнар туса кӑтартнӑшӑн Челепи хулинчи «Фейерверк» ТМЯПа чысланӑ; «Чи лайӑх пирокӗвӗллӗ композици» Тӗменти «Фейерверк-Центр» ТМЯПа лекнӗ; «Оригиналлӑ кӑтартушӑн» номинацире Казахстан Республикинчи «Жарылыс и Ко» ТООна палӑртнӑ. Идейӑна творчествӑлла сӑнланӑшӑн ятарлӑ приза фейерверк кӑтартӑвне тӗп пурнӑҫлакана — «Шупашкарти Василий Иванович Чапаев ячӗллӗ производство пӗрлешӗвӗ» ФГУПа панӑ^[4].

2012 ҫулхи ҫӗртмен 23-24-мӗшӗсенче Чӑваш Республикин тӗп хулинче — Шупашкарта — Пӗтӗм тӗнчери III фейерверк фестивалӗ иртнӗ, ӑна ун чухне Чӑваш Республики йӗркеленнӗренпе 90 ҫул ҫитнине халалланӑ, уяв мероприятийӗсем ҫак фестивальпе вӗҫленнӗ.

Фестиваль чӑн-чӑн илеме юратакансене пуҫтарнӑ. Пирокӗвӗллӗ кӑтартӑва Шупашкарти кӳлмек акваторийӗнчен тата Управҫӑ Анне палӑкӗ ҫывӑхӗнчен сӑнама май пулнӑ.

Конкурс кӑтартӑвне тӑватӑ команда хутшӑннӑ:

Санкт-Петербург хулинчи «Петергофри пиротехника картишӗсем» ХАО, Беларуҫ Республикинчи Дзержинск хулинчи «Кальвин» ТМЯП, Шупашкарти «Пироснаб-Атӑлҫи» ТМЯП, Челепи хулинчи «Фейерверкс» ТМЯП.

Фестивале йӗркелекенӗ Чӑваш Республикин Правительстви пулнӑ^[5].

Ӑна 2013 ҫулхи ҫӗртмен 23-24-мӗшӗсенче ирттернӗ. Пӗтӗм тӗнчери IV фейерверк фестивальне Республика кунне уявланӑ май ирттернӗ. Ун чухне фестивале Ҫамрӑксен ҫулталӑкне халалланӑ.

Фестиваль ҫӗнтерӳҫи Беларуҫри команда пулса тӑнӑ (сасӑлавра 45% пухнӑ). Икӗ кун хушшинче иртнӗ фестивале пурӗ пилӗк команда хутшӑннӑ: Шупашкартан, Мускавран, Санкт-Петербургран, Беларуҫрен тата Украинӑран. Шупашкарти ушкӑна «Фейерверк шоуне йӗркелес енӗпе чи лайӑх постановка» енчен палӑртнӑ. Музыкӑпа ӳнер енчен чи лайӑх илемлени тӗлӗшӗнче Мускаври команда мала тухнӑ^[6].