Тӗмер вӑтам шкулӗ

1885 ҫулхи нарӑсӑн 24-мӗшӗнче Торопова Антонина Осиповна хӑйӗн упӑшки Торопов Д.А. пулӑшнипе килӗшче пӗрремеш земство шкулне уҫнӑ. Шкула 26 арҫын ачапа пӗр хӗрача ҫӳренӗ^[2].

1911 ҫулта шкул 3 комплектлӑ земство шкулӗ пулса тӑнӑ, ачасене ялти виҫӗ килте вӗрентнӗ. Ку вӑхӑтра шкулта 92 ача пӗлӳ илнӗ. 1911–1918 ҫулсенче шкул заведующийӗ Торопова Антонина Осиповна пулнӑ, 1918–1919 ҫулсенче ку ӗҫе Иванова Анастасия Гавриловна пурнӑҫланӑ^[3].

1921 ҫулта земство шкулӗнчен 4 ҫул вӗрентекен 1-мӗш ступеньлӗ совет ӗҫ шкулне туса хунӑ. 1924 ҫултан ачасене ултӑ ҫул вӗрентме пуҫланӑ. 1924–1928 ҫулсенче шкул заведующийӗ пулса Герасимов Е.Ф. ӗҫленӗ. 1928–1929 ҫулсенче шкулӑн пӗрремӗш типлӑ ҫуртне туса лартнӑ^[2].

1931 ҫулта вӑл колхоз ҫамрӑкӗсен шкулӗ пулса тӑнӑ, ачасене ҫичӗ ҫул хушши вӗрентме пуҫланӑ. 1934 ҫултанпа — тулли мар вӑтам шкул, 1937 ҫултанпа — вӑтам шкул^[3].

1982 ҫулта шкулӑн ҫӗнӗ ҫуртне хӑпартма пуҫланӑ, унта 464 ача вӗренмелле пулнӑ. 1985 ҫулхи авӑнӑн 1-мӗшӗнче шкул ҫуртне хута янӑ^[3].

Тӗмер шкулӗн директорӗсем/заведующийӗсем^[2]:

• Торопова Антонина Осиповна (1885–1924);
• Борисов И.Б. (1928–1929);
• Ломоносов В.И. (1930–1931);
• Михайлов А.П. (1931–1933);
• Матвеев К.М. (1933–1937);
• Грачев П.С. (1938–1940);
• Белкин М.М. (1940–1941);
• Зверева Серафима Семёновна (1942–1952);
• Малинин И.Г. (1953–1962);
• Николаев И.Н. (1962–1965);
• Мюресов П.О. (1965–1980);
• Иванов Пётр Андреевич (1980–2002);
• Николаева Альбина Александровна (2002–);
• Якуркина Роза Викторовна.

Шкултан вӗренсе тухнисенчен 250 ытла ача педагогика енӗпе аслӑ пӗлӳ илнӗ, шкултан 50 ытла тухтӑр вӗренсе тухнӑ, 120 ытла ҫамрӑк ял хуҫалӑх вӗренӳ заведенийӗсен дипломӗсене тивӗҫнӗ^[3].

Ачасене ӗҫпе патриотлӑх, экологи тата ӑс-хакӑл енчен ӑнӑҫлӑ воспитани панӑшӑн, спортра ҫитӗнӳсем тунӑшӑн шкула республика органӗсемпе вырӑнти хӑй тытӑмлӑхӑн нумай хисеп хучӗсемпе тата дипломсемпе наградӑланӑ^[3].

Шкулта «Тхэквондо» секцийӗ ӑнӑҫлӑ ӗҫленӗ, Бельский Л.В. тренер вӗренекенӗсем республика ӑмӑртӑвӗсенче ҫӗнтерӳҫӗсем тата призерсем пулса тӑнӑ^[3].

2005 ҫултанпа ӗҫлекен «Короб добра» ача-пӑча пӗрлешӗвӗ ҫамрӑк волонтерсен отрячӗсен республика конкурсӗн ҫӗнтерӳҫи. «Тимуровская молодежь» волонтерсен команди (2008 ҫултанпа, унччен «Короб добра» ятлӑ пулнӑ) район чи лайӑх волонтерсен командисен шутӗнче тӑрать^[2].

2024–2025 вӗренӳ ҫулӗнче вӗренӳ заведенийӗнче шкулчченхи пӗр ушкӑн пулнӑ, унта 8 ача воспитани илнӗ. 1–4 классенче 18 ача вӗреннӗ, 5–9 классенче — 37 ача^[4].

Шкулӑн акт залӗ, спорт залӗ, стадион пур. Ачасене вӗрентес ӗҫре 21 компьютерпа, 7 мультимеди проекторӗпе, 7 мультимеди экранӗпе, 8 принтерпа усӑ кураҫҫӗ^[5].

Шкулта вӗренекен ачасене вӗри апатпа тивӗҫтереҫҫӗ. Ку тӗлӗшпе «Янтиковский общепит» ТМЯП-па килӗшӳ тунӑ^[6].