Шупашкара 500 çул ячĕллĕ культурăпа кану паркĕ

Паркра аттракционсем ĕçлеççĕ, нумаях пулмасть лаша вити, сцена хута кайнă, роликлă тӑркӑч илсе ярăнмалли ятарлă лаптăк уçнă. Паркра чечек клумбисене тирпейлесе илемлетнĕ тата 12 сак туса лартнă. Çавăн пекех кунта суту–илӳ павильонĕсем ĕçлеççĕ, футбол площадки пур.

Шупашкар хули 500 çул тултарнă ятпа 1969 çулта Атӑлăн çӳллĕ çыранĕ хĕрринче Чернышевски варĕ çывăхĕнче çĕнĕ парк никĕслеме пуçланă. Шупашкар хулин ĕç тăвакан комитечĕн 1974 çулхи ака уйăхĕн 18–мĕшĕнчи йышăнавĕпе килĕшӳллĕн тĕп хулан Мускав районĕнчи культурăпа кану паркĕн тĕп планĕпе проектне çирĕплетнĕ. 1978 çулхи кăрлач уйăхĕн 5–мĕшĕнче Шупашкар 500 çул ячĕллĕ парка савăнăçлă лару–тăрура уçнă.

Чылай вăхăт парк “Лакрей вăрманĕ” тĕп культурăпа кану паркĕн филиалĕ пулнă. 1987 çулхи кăрлач уйăхĕнчен пуçласа парк хăй тĕллĕн аталанса пыма тытăннă.

2004 çулта Шупашкар хулин влаç органĕсем 80 çул тултарнă тĕле парк территорийĕнчи “Студентсен хули” обществăлла транспорт чарăнăвĕнчен инçе мар ăрусен аллейи никĕсленнĕ. Унта пурĕ 20 чăрăш лартса хăварнă. Кашни йывăçа лартнă çын ятне пама шутланă.

2005 çулта парк территорине 1989 çулта туса лартнă “Мускав çулĕ” скульптура композицине куçарса килнĕ (авторĕ–скульпторĕ Ф.И. Мадуров).

• Шупашкара 500 çул ячĕллĕ культурăпа кану паркĕ