Михаил Архангел соборӗ (Шупашкар)

Ҫв. Михаил Архангел чиркӗвне 1702 ҫулта прихут ҫыннисен укҫи-тенкипе туса лартнӑ.

1758 ҫулта ҫавӑн пекех прихут ҫыннисен укҫипе Параскева Пятница приделне тата чиркӳ тӑррине туса лартнӑ. Ҫапла майпа архитектура комплексӗн йышӗнче виҫӗ ҫурт пулнӑ: Михаил Архангелӑн сивӗ (ҫуллахи) чиркӗвӗ, Параскева Пятницӑн ӑшӑ (хӗллехи) тата чиркӳ тӑрри.

Революциччен чиркӳре вырӑнти реликви — Турӑ Амӑшӗн истори тата ӳнер хаклӑхне кӑтартакан Тихвин турӑшӗ — упраннӑ^[2]. Ҫапах та совет саманинче вӑл таҫта ҫухалнӑ, ӑҫта пулни халӗ те паллӑ мар.

Совет саманинче чиркӗве хупнӑ (1927), хӗллехи храма тата илемлӗ чиркӳ тӑррине ҫухатнӑ (1930-мӗш ҫулсем), упранса юлнӑ ҫуртра вара чылай ҫул патшалӑх архивӗ (Чӑваш Республикин Наци библиотекин пӗр фончӗ) вырнаҫнӑ пулнӑ.

1993 ҫулта храма Шупашкар-Чӑваш епархине панӑ.

Сайра тӗл пулакан икӗ юпаллӑ куҫӑмлӑ храмӑн тӗсӗ — Шупашкарта упранса юлнӑ ҫакӑн йышри пӗртен-пӗр тӗслӗх.

Чиркӗве «вырӑсла барокко» архитектура стилӗпе тунӑ («четверик», закомара йышшипе, чӳрече анисене илемлетни) .

1996 ҫулта, кӑткӑс юсав ӗҫӗсем туса хӗрессене куполсем ҫине хӑпартнӑ хыҫҫӑн, кӗлӗсем ирттерме пуҫланӑ.

Ҫӗнетнӗ храма уҫнине Шупашкар-Чӑваш епархийӗ 50 ҫул тултарнине тата Мускав тата Пӗтӗм Руҫ патриархӗ II Алексий пӗрремӗш хут килнине халалланӑ. Хальхи вӑхӑтра храм Шупашкарти епархи училищин шутланать^[3], унта пулас священнослужищисем практика тата кӗлӗ ирттереҫҫӗ.

Храм настоятелӗ — Александр Федотов протоиерей^[4].