Вырӑсла версиЯтарлӑ проектсем
Чӗлхе суйла
РУВИКИ ҪИНЧЕН

Константинов Леонид Сергеевич

Disambig gray.svg Константинов хушаматлă урăх çынсем çинчен РУВИКИ-ре статьясем пур.

Константинов Леонид Сергеевич (1961 ҫулхи акан 9-мӗшӗ, Çăкалăх (Йĕпреç районĕ), Чăваш Автономиллĕ Социализмлă Совет Республики — 2001 ҫулхи ҫӑвӑн 3-мӗшӗ, Ингушети) — подполковник, Раҫҫей Федерацийӗн Федераллӑ чикӗ службин Ҫурҫӗр Кавказри регион управленийӗн 12-мӗш уйрӑм авиаци полкӗн вертолёт эскадрильин командирӗ. Раҫҫей Федерацийӗн паттӑрӗ (2001, вилнӗ хыҫҫӑн).

Кун-çулĕ

1961 ҫулхи ака уйӑхӗн 9-мӗшӗнче Чӑваш АССРӗн Йӗпреҫ районӗнчи Çăкалăх ялӗнче ҫуралнӑ. Ашшӗ, Сергей Николаевич, колхозра шофёр пулнӑ, амӑшӗ, Федосия Александровна — колхозра тӑрмашнӑ[1]. 1978 ҫулта вӑтам шкулта вӗренсе тухнӑ.

1978—1982 çулсенче Сызраньти аслӑ çар училищинче вĕреннӗ[2]. 1982 çулта Константинов лейтенанта Грузине Чикӗ ҫарне янӑ. Çав çулах хӑйӗнпе пӗр классра вӗреннӗ Козлова Людмила Николаевнӑпа ҫемье ҫавӑрнӑ.

Малтан аслӑ лётчик-штурман пулнӑ, 1983 ҫултанпа Ми-8 командирӗ, каярахпа Ка-27 вертолётпа вӗҫме хӑнӑхнӑ. 1983 ҫултанпа Афганистанри хирӗҫӗве хутшӑннӑ, Ми-8 тата Ка-27 вертолётсемпе вӗҫнӗ. Федераллӑ чикӗ хуралӗн çарӗнче хӗсметре тӑнӑ. 1992 ҫултанпа Çурçӗр Кавказри регион управленийӗнчи уйрӑм авиополкӑн эскадрилья командирӗ пулса тӑнӑ, Осетинсемпе ингушсем хушшинчи хӗҫпӑшаллӑ хирӗҫӗве путарма хутшӑннӑ.

1997 ҫулта ӑна Ҫурҫӗр Кавказри чикӗ округӗн «Аҫтӑрхан» оперативлӑ ҫар пайӗн специалисчӗсен ушкӑнӗн офицерне лартнӑ. 1998 ҫулхи ҫурла уйӑхӗнчен пуҫласа каллех Раҫҫее илсе тухнӑ 12-мӗш уйрӑм авиаци полкӗнче вертолёт эскадрильин командирӗ пулса тӑнӑ.

1999 ҫул вӗҫӗнче — 2000 ҫул пуҫламӑшӗнче «Гизель» РФ ФПСӗн ятарласа йӗркеленӗ авиаци ушкӑнӗн командирӗ вырӑнӗнче Аргун ту хушӑкӗнче Раҫҫейпе Грузи чиккинче десант антарас енӗпе ӑнӑҫлӑ пилӗк операцие хутшӑннӑ. Ун чухне сӑртлӑ-туллӑ вӑрманлӑ вырӑнти кӑткӑс условисенче хӗллехи вӑхӑтра чечен боевикӗсене чикӗ леш енчен пулӑшакан ҫулсене татнӑ, бандӑсем пысӑк ҫухатусем тӳснӗ. Леонид Константинов талӑк хушшинче 7-шер хут вӗҫнӗ. Леонид Константинов хутшӑннӑ виҫӗ вӑрҫӑ хушшинче ҫӗршер хут вӗҫеве тухнӑ.

2001 çулхи çу уйăхĕн 31-мӗшӗнче Ингушетире вӗҫнӗ чухне унӑн вертолетне чечен боевикӗсем персе лектернӗ. Борт ҫинче 14 çын пулнă, вӗсен хушшинче ҫавӑн пекех Алексей Арбатовпа («Яблоко») Евгений Зелень («Регионы России») Патшалӑх думин депутачӗсем пулнӑ. 100 метр ҫӳллӗшӗнче вӗҫсе пынă май вертолёта пысӑк калибрлӑ пулемётран персе тӑкнӑ. Л. Константинова кӑкӑрӗпе хулпуççинчен 6 пуля лекнӗ. Юнне ҫухатнӑ пулин те вӑл экипажа ертсе пынă, ҫапла май ҫынсен пурнӑҫне ҫӑлса хӑварнӑ. Тӑнне ҫухатсан штурвала В. Норов штурман тытнӑ. Вилмелле амантнӑ командирпа экипаж вертолета Назрань хули патӗнче лартнӑ. Йывӑр аманнине пула тата юн нумай ҫухатнӑран Леонид Константинов госпитале илсе ҫитеричченех вилнӗ.

Çемйи ыйтнипе Шупашкарти Карачура масарӗнче (Паттӑрсен аллейинче) пытарнă[3][1][4].

Раҫҫей Федераци Президенчӗн 2001 ҫулхи августӑн 4-мӗшӗнчи 952 № Хушӑвӗпе ҫар тивӗҫне пурнӑҫланӑ чухне паттӑрлӑх кӑтартнӑшӑн Константинов Леонид Сергеевич подполковника Раҫҫей Федерацийӗн Паттӑрӗ (вилнӗ хыҫҫӑн) ята панӑ.

Хисепӗсем

  • Раççей Федерацийӗн Паттăрĕ (вилнĕ хыççăн).
  • 10 ытла орденпа медаль.

Ҫемье

  • Арӑмӗ — Людмила Николаевна (хӗр чухнехи хушамачӗ Козлова)
    • Хӗрӗсем: Ольга (1984 ҫ.ҫ.) тата Александра (1986 ҫ.ҫ.)[1]. Леонид Константиновӑн икӗ хӗрӗ те, ашшӗ хыҫҫӑн кайса ҫар ҫыннисем пулса тӑнӑ[5].

Астӑвӑм

  • Тăван ялĕнчи пĕр урамне тата вăтам шкула ун ятне панă[6], шкулта Паттӑра халалланӑ музей (2010) ӗҫлет[7].
  • Шупашкарти 38-мӗш вӑтам шкула Константинов Л. С. ятне панӑ.
  • Чӑваш Республикинче ҫулсерен Леонида Константинов Раҫҫей Паттӑрӗ ячӗпе волейбол ӑмӑртӑвӗсем иртеҫҫӗ [7].

Ӑнлантарусем

  1. ^ 1, 2, 3 Герой России — Леонид Сергеевич Константинов , Wayback Machine çинчи 2016 ҫулхи чӳкӗн 10-мӗшӗнчи копийӗ // Администрация Ибресинского района Чувашской Республики
  2. ^ В. П. Куницын, В. М. Толкачев. Военный городок: от Усть-Двинского пехотного полка до вертолетного училища. — Ваш Взгляд, 2013. — 256 с. — 500 экз. — ISBN 978-5-904048-35-8. Архивировано 25 юпан 2021 года.
  3. ^ Константинов Леонид Сергеевич. Надгробный памятник , Wayback Machine çинчи 2016 ҫулхи акан 11-мӗшӗнчи копийӗ // Патриотический интернет-проект «Герои Страны»
  4. ^ Белебенцев Д. Н. Константинов Леонид Сергеевич , Wayback Machine çинчи 2016 ҫулхи чӳкӗн 10-мӗшӗнчи копийӗ // Электронная Чувашская энциклопедия
  5. ^ В рамках празднования Дня Героев Отечества состоялась встреча со вдовой и дочерью героически погибшего подполковника Леонида Константинова , Wayback Machine çинчи 2016 ҫулхи чӳкӗн 10-мӗшӗнчи копийӗ // Официальный портал органов власти Чувашской Республики, 10.12.13
  6. ^ История школы , Wayback Machine çинчи 2016 ҫулхи чӳкӗн 10-мӗшӗнчи копийӗ // Официальный сайт Липовской ООШ Ибресинского района Чувашской Республики
  7. ^ 1, 2 Ибресинцы бережно хранят память о земляке, Герое России Леониде Сергеевиче Константинове , Wayback Machine çинчи 2016 ҫулхи чӳкӗн 10-мӗшӗнчи копийӗ // Централизованная библиотечная система Ибресинского района, 10.04.11

Каҫӑсем

Темӑпа ҫыхӑннисем

Категорисем