Чӑваш Республикин Министрсен кабинечӗ

Чӑваш Республикин Министрсен Кабинечӗ Чӑваш Республикин ӗҫ тӑвакан влаҫӗ шутне кӗрекен министерствӑсен, патшалӑх комитечӗсен тата ытти органӗсен ӗҫӗ-хӗлне йӗркелет, вӗсем ӑна пӑхӑнса ӗҫлеҫҫӗ.

Чӑваш Республикин Министрсен Кабинечӗ йышне унӑн членӗсем шутланакан Чӑваш Республикин Министрсен Кабинечӗн Председателӗ, Председатель ҫумӗсем (ҫав шутра пӗрремӗш ҫумӗсем), Чӑваш Республикин министрӗсем, Чӑваш Республики Пуҫлӑхӗн Администраци ертӳҫи тата Раҫҫей Федерацийӗн Президенчӗ ҫумӗнчи Чӑваш Республикин полномочиллӗ представителӗ кӗреҫҫӗ.

Чӑваш Республикин министерствисене, патшалӑх комитечӗсене тата ӗҫ тӑвакан влаҫӑн ытти органӗсене Чӑваш Республикин Пуҫлӑхӗ ятарлӑ хушу кӑларса йӗркелет, реорганизацилет, пӑрахӑҫлать. Чӑваш Республикин Министрсен Кабинечӗ Чӑваш Республикин ӗҫ тӑвакан влаҫӗн министерствисен, патшалӑх комитечӗсен тата ытти органӗсен ӗҫӗ-хӗлне йӗркелет, вӗсем ӑна пӑхӑнса ӗҫлеҫҫӗ.

Чӑваш Республикин вӑйра тӑракан Конституцийӗпе килӗшӳллӗн Чӑваш Республикин министрсен кабинечӗ:

1. Чӑваш Республикин социаллӑ пурнӑҫӗпе экономикине комп­лекс­лӑ аталантарас тӗллевпе мерӑсем хатӗрлет тата пурнӑҫласа пырать;

2. Укҫа-тенкӗ, ӑслӑлӑх, вӗрентӳ, культура, сывлӑх сыхлавӗ, физкультурӑпа спорт, социаллӑ пулӑшу, ҫул ҫӳрев хӑруш­сӑрлӑхӗ тата экологи тӗлӗшӗпе пӗр-пӗтӗм патшалӑх политики тытса пымалла тӑвать;

3. Хӑйӗн полномочийӗсен шайӗнче этем, гражданин прависемпе ирӗклӗхӗсене пурнӑҫлас, тивӗҫтерес тата вӗсене хӳтӗлес, харпӑрлӑха тата обществӑри йӗркелӗхе сыхлас, терроризмпа тата экстре­мизмпа, преступлени тунисемпе кӗрешес енӗпе мӗн кирлине тӑвать;

4. Чӑваш Республикин Пуҫлӑхӗ Чӑваш Республикин Патша­лӑх Канашне тӑратмашкӑн Чӑваш Республикин республика бюджечӗн проектне хатӗрлет;

5. Чӑваш Республикин республика бюджетне пурнӑҫлассине тивӗҫ­терет тата ҫав бюджета пурнӑҫлани ҫинчен калакан отчета Чӑваш Республикин Пуҫлӑхӗ Чӑваш Республикин Патшалӑх Канашне тӑратма туса ха­тӗрлет;

6. Чӑваш Республикин саккунӗсемпе килӗшӳллӗн Чӑваш Республикин патшалӑх харпӑрлӑхне тытса унпа усӑ курать, ҫавӑн пекех, федераци саккунӗсемпе тата Раҫҫей Федерацийӗн ытти нормативлӑ право акчӗсемпе килӗ­шӳллӗн, Чӑваш Республикине пӑхма панӑ федераци пурлӑхне тытса тӑрать;

7. Чӑваш Республикин налуксене (пуҫтарусене) палӑртасси, вӑя кӗртесси е пӑрахӑҫласси, налук ставкисене (пуҫтарусен ставкисене), налуксене (пуҫ­тарусене) тӳлемелли йӗркене тата вӑхӑта улшӑнусем кӗртесси, налук ҫӑмӑл­лӑхӗсене (пуҫтару ҫӑмӑллӑхӗсене) тата (е) вӗсемпе усӑ курмалли сӑлтавсене тата йӗркене палӑртасси (пӑрахӑҫласси) ҫинчен, Чӑваш Республикин республика бюджечӗн укҫи-тенки шучӗпе тивӗҫтерме палӑртакан тӑкаксене пӑхса хӑварнӑ ытти саккунсен проекчӗсем пирки, Чӑваш Республикин Пуҫлӑхӗ хушнипе, пӗтӗмлетӳсем парать;

8. Вырӑнти хӑй тытӑмлӑх органӗ, вырӑнти хӑй тытӑмлӑхӑн ӗҫӗнчи должноҫри ҫынни кӑларнӑ право акчӗсем Раҫҫей Федерацийӗн Конституцине, федерацин конституци саккунӗсене, федераци саккунӗсене тата Раҫҫей Федерацийӗн ытти нормативлӑ право акчӗсене, Чӑваш Республикин Конституцине, Чӑваш Республикин саккунӗсене тата ытти нормативлӑ право акчӗсене хирӗҫлеҫҫӗ пулсан Чӑваш Республикин Министрсен Кабинечӗ вӗсене ҫав асӑннӑ актсене Раҫҫей Федерацийӗн саккунӗсемпе ки­лӗштермешкӗн сӗнет, ҫавӑн пекех асӑннӑ актсем пирки суда жалоба пама пултарать;

9. Раҫҫей Федерацийӗн Конституцийӗ, федераци саккунӗсем, Чӑваш Республикин Конституцийӗ, Чӑваш Республикин саккунӗсем, Чӑваш Республикин Пуҫлӑхӗн указӗсем, ҫавӑн пекех федерацин ӗҫ тӑвакан власть органӗсен уйрӑм полномочийӗсене Раҫҫей Федерацийӗн субъекчӗсен ӗҫ тӑвакан власть органӗсене парас ӗҫе палӑртса хунӑ Раҫҫей Федерацийӗн Президенчӗн нормативлӑ право акчӗсемпе тата Раҫҫей Федерацийӗн Правительствин нормативлӑ право акчӗсемпе палӑртса Раҫҫей Федерацийӗн Конституцийӗн 78 статйипе килӗ­шӳллӗн федерацин ӗҫ тӑвакан власть органӗсемпе тунӑ килӗшӳсем палӑртса панӑ ытти полномочисене пурнӑҫлать.

Чӑваш Енӗн пӗрремӗш правительстви — Чӑваш автономи облаҫӗн Революци комитечӗ пулнӑ, унӑн председателӗн вырӑнне 1920 ҫулхи ҫӗртмен 24-мӗшӗпе чӳкӗн 7-мӗшӗччен Элмен Даниил Семёнович йышӑннӑ. Малашне Чӑваш автономи облаҫӗн рабочисен, хресченсен тата хӗрлӗармеецсен депутачӗсен канашӗсен облаҫри ӗҫ тӑвакан комитетне суйланӑ, унӑн председателӗсем ҫаксем пулнӑ: Даниил Элмен (1920 ҫулхи чӳкӗн 11-мӗшӗ — 1921, ҫӗртме), Сергей Коричев (1921 ҫулхи ҫӗртмен 30-мӗшӗ — 1924 ҫулхи ҫӑвӑн 14-мӗшӗ), Иван Илларионов (1924 ҫулхи ҫӑвӑн 14-мӗшӗ — 1925, ака).

Чӑваш АССР-не йӗркеленӗ хыҫҫӑн Чӑваш АССР Халӑх Комиссарӗсен Канашне туса хунӑ, 1946 ҫулта унӑн ятне Чӑваш АССР Министрсен Совечӗ ҫине улӑштарнӑ^[2]. 1992 ҫултанпа — Чӑваш Республикин Министрсен Канашӗ.

1994 ҫулхи кӑрлач уйӑхӗнчен пуҫласа Чӑваш Ен правительствин хальхи ячӗ — Чӑваш Республикин Министрсен Кабинечӗ.