Света Яковлева
Смирнова Светлана Михайловна (сцена ҫинчи ячӗ — Света Яковлева) (ҫур. 1977 ҫулхи кӑрлачӑн 22-мӗшӗ, Кивĕ Шăмăршă, Чăваш Автономиллĕ Социализмлă Совет Республики) — Раҫҫей эстрада юрăçи. Чӑваш Республикин тава тивӗҫлӗ культура ӗҫченӗ.
Кун-çулĕ
1977 ҫулхи кӑрлач уйӑхӗн 22-мӗшӗнчи Чӑваш АССРӗн Шӑмӑршӑ районӗнчи Кивӗ Шӑмӑршӑ ялӗнче ҫуралнӑ. Шӑмӑршӑ вӑтам шкулӗнче вӗреннӗ, 9-мӗш класс хыҫҫӑн Шупашкарти Ф. П. Павлов ячӗллӗ Музыка училищине вӗренме кӗнӗ, ӑна «Халӑх хорӗн артисчӗ», «Халӑх хорӗн ертӳҫи» специальнӑҫсемпе вӗренсе пӗтернӗ[1].
И. Н. Ульянов ячӗллӗ Чӑваш патшалӑх университетӗнче «Культура сферинчи менеджер» специальнӑҫпа, Атӑл-Вятка академийӗнче «Патшалӑх тата муниципалитет управленийӗ» специальнӑҫпа аслӑ пӗлӳ илнӗ. Хушма пӗлӳ институтӗнче «Библиотека ӗҫӗ-хӗлне йӗркелесси» программӑпа вӗренсе тухнӑ.
1996—1997 ҫулсенче Шӑмӑршӑри район культура керменӗнче методист пулса ӗҫленӗ[1].
1997—2009 ҫулсенче Чӑваш патшалӑх филармонийӗн «Ҫавал» фольклорпа эстрада ансамблӗнче(выр.)чăв. юрланӑ[1].
2014—2016 ҫулсенче — Чӑваш Республикин Ҫӗрпӳ районӗн культура аталанӑвӗпе библиотека ӗҫӗ-хӗлӗн центрӗн директорӗ[2].
2016—2017 ҫулсенче — Тракторостроительсен Культура керменӗн Республика халӑх пултарулӑхӗн центрӗн директорӗ.
2018 ҫулхи нарӑс уйӑхӗнчен — Ҫӗрпӳ районӗнче:
- Ҫӗрпӳ районӗн администрацийӗн вӗрентӳ пайӗнче специалист (02.02.2018—30.12.2019);
- Ҫӗрпӳ районӗн культура аталанӑвӗпе библиотека ӗҫӗ-хӗлӗн центрӗн директорӗ (30.12.2019—18.08.2023);
- Ҫӗрпӳ районӗн Пӗрлештернӗ клуб тытӑмӗн тата Пӗрлештернӗ библиотека тытӑмӗн директорӗ (18.08.2023—10.11.2023);
- 2023 ҫулхи чӳк уйӑхӗнчен — Ҫӗрпӳ ялхуҫалӑх технологи техникумӗн директорӗн профориентаци тата ӗҫе вырнаҫтарас енӗпе ӗҫлекен ҫумӗ[3].
Пултарулӑхӗ
Шкулта вӗреннӗ чухнех сцена ҫине тухнӑ, районти таврапӗлӳ музейӗ ҫумӗнчи «Мерчен» фольклор ушкӑнӗнче юрланӑ[1].
2000 ҫулта пӗрремӗш альбомне — «Ӗмӗтсем» — кӑларнӑ[1]. Пурӗ 4 альбом кӑларнӑ.
Вячеслав Христофоровӑн «Янра, юрӑ» юрланӑ, Игорь Аркадьевпа пӗрле «Алые зори» ушкӑн, Саша Ҫиларман тата Александр Кокшин юрӑҫсемпе пӗрле «Звонница» ушкӑн йӗркеленӗ, республика тата Раҫҫейри регионсем тӑрӑх гастрольсене ҫӳренӗ[1].
Репертуарӗнче 200 ытла юрӑ: эстрада юррисем, халӑх юррисем, чӑвашлисем те, вырӑслисем те.
Ҫемье
Ҫемьеллӗ, икӗ ача — ывӑлпа хӗр[1].
Хисепӗсем
- Чӑваш Республикин тава тивӗҫлӗ культура ӗҫченӗ.
Кӑсӑклану
Ҫулҫӳреме, пахчара аппаланма, тӗрлеме, ҫӗлеме, кукӑль пӗҫерме кӑмӑллать.
Ӑнлантарусем
- ^ 1, 2, 3, 4, 5, 6, 7 Светлана Яковлева, певица (выр.). Цех культурных проектов. Официальный портал органов власти Чувашской Республики. Пӑхнӑ кун: 2025 ҫулхи утӑн 8-мӗшӗ.
- ^ МБУК "Районный центр развития культуры и библиотечного обслуживания" Межпоселенческая районная библиотека Цивильского района. Структура (выр.). МБУК "Районный центр развития культуры и библиотечного обслуживания" Межпоселенческая районная библиотека Цивильского района. Пӑхнӑ кун: 2025 ҫулхи утӑн 28-мӗшӗ.
- ^ Цивильский аграрно-технологический техникум. Руководство (выр.). Цивильский аграрно-технологический техникум. Пӑхнӑ кун: 2025 ҫулхи утӑн 28-мӗшӗ.
